00:00:00 IGIHE NETWORK KN KINYARWANDA EN ENGLISH FR FRANCAIS

Inyungu ziri mu kwandukuza uwapfuye ku Muturarwanda

Yanditswe na Manzi Angelo
Kuya 28 Ukuboza 2022 saa 08:56
Yasuwe :

Ikigo cy’Igihugu gishinzwe Ubuzima(RBC) n’Ishami ry’Umuryango w’Abibumbye ryita ku buzima(OMS) bashishikarije abaturage kwandukuza mu buryo bw’ikoranabuhanga abitabye Imana mu bitabo by’irangamimerere kuko bikiri hasi kandi ari ingenzi ku igenamigambi.

Kugeza ubu mu Rwanda kwandukuza abapfuye (gusibisha) mu bitabo by’irangamimerere biri ku kigero cya 26%.

Muri Kamena 2020, Leta yavuguruye itegeko rigenga abantu n’umuryango, aho ryahaye ububasha abanditsi mu mavuriro n’abo mu tugari, bwo kwandika mu bitabo by’irangamimerere abavukira n’abapfira kwa muganga.

Mu gihe umuntu yavukiye cyangwa yapfiriye mu miryango, yandikirwa mu kigo cy’ubuvuzi cyangwa mu kagali bimwegereye hifashishijwe ikoranabuhanga.

Abanyarwanda bose kandi bafite uburenganzira bwo kwandukuza uwapfuye, kuko itegeko riteganya ko umuntu yandikishwa cyangwa yandukuzwa mu gihe kitarenze iminsi 30 kuko nyuma y’aho bisaba kujya mu nkiko ndetse agacibwa n’amande.

Umuhuzabikorwa w’Irangamimerere mu kigo cy’Igihugu gishinzwe Ubuzima(RBC), Ngoboka Godfrey, yabwiye IGIHE ko ubu buryo bwo kwandukura umuntu witabye Imana mu irangamimerere bituma mu rwego rw’ubuzima bamenya abapfuye mu gihugu, gukora igenamigambi rinoze rishingiye ku mibare bikoroha n’ibindi.

Ati “Urugero naguha ni nko mu gihe cya COVID-19, haje inkingo abanyarwanda bose barazibona gusa byari mu rwego rwo kugira ngo abantu birinde icyorezo kugira ngo kidatwara ubuzima bwa benshi.”

Kwandukuza umuntu witabye Imana harimo inyungu zitandukanye ku muturage nko guhabwa icyangombwa cy’uwapfuye, kubona ubureganzira ku mutungo nk’ubutaka, koroherwa mu kubona mituweli n’ibindi byangombwa.

Umuyobozi ushinzwe Abaforomo n’Ababyaza mu bitaro bikuru bya Kaminuza bya Kigali (CHUK) akaba n’umwanditsi ushinzwe irangamimerere, Muhawenimana Immaculée yasabye abaturage kumva akamaro n’uburenganzira bwabo mu birebana n’irangamimerere.

Yagize ati “Kwandukuza uwawe wapfuye ni ikintu cy’ingenzi kuko iyo ugiye utabikoze haba harimo ikibazo kinini cyane kuko nkatwe mu kwandika n’iyo tuvuganye n’abasigaye bagenda bishimye. Iyo yandukuje uwe bimufitiye akamaro nko ku mutungo wari umwanditseho bakaba bawandika ku wundi. Igihugu kibyungukiramo kuko bituma igenamigambi ry’abaturage rigenda neza.”

Ati “Iyi gahunda kuva yatangira muri 2020 […] tumaze kwandukura abantu bapfuye 2409 naho abavutse banditswe ni 5366.”

Niyomahoro Martin, umubyeyi twasanze aje kwandukuza umwana we witabye Imana mu bitaro bya CHUK i Kigali, yavuze ko yamaze gusobanukirwa akamaro ko kwandukuza uwitabye Imana.
Ati “Naje kwandukuza umwana kuko nzi ko bifasha Igihugu kumenya umubare w’abaturage gifite n’abo kidafite kandi nzi ko bifite inyungu umuturage kuko Leta hari amafaranga rimwe na rimwe imugomba bigatuma niba hari n’icyo agenerwa biborohera."

Umukozi mu Ishami ry’Umuryango w’Abibumbye ryita ku buzima(OMS), Dr Candide Tran Ngoc avuga ko nko mu mwaka wa 2021 nibura 30% by’abapfuye aribo bandukujwe mu bitabo by’irangamimerere, asaba ubufatanye bwa buri wese kugira ngo byitabirwe.

Ati “Turasaba Leta y’u Rwanda kudufasha gushishikariza abaturage bagize ibyago kwandikisha ababo kuko bifitiye inyungu umuturage n’igihugu.”

Ikigo cy’Igihugu gishinzwe indangamuntu(NIDA) gisanga kuba uburyo bw’ikoranabuhanga bwarashyizweho, hari intambwe igenda iterwa ariko hakwiye gushyirwamo imbaraga,abaturage bakarushaho kubyitabira kuko bikiri hasi.

Kwandukuza abapfuye biracyari kuri 26% ugereranije n’abandikisha abavutse biri kuri 84.2%.

Kugeza ubu imibare igaragaza ko kuva 2020 gahunda yo kwandika umuntu wavutse n’uwapfuye yatangira ibihumbi 715,211 by’abavutse banditswe naho ibihumbi 35,270 by’abapfuye banditswe hifashishijwe uburyo bw’ikoranabuhanga rya CRVS.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .