00:00:00 IGIHE NETWORK KN KINYARWANDA EN ENGLISH FR FRANCAIS

Yitiriwe iya ‘Pilato’: Ibyihariye ku ntebe ya Nsabimana yari ku cyobo cyajugunywemo Abatutsi 60 000

Yanditswe na Akimana Jean de Dieu
Kuya 14 April 2022 saa 03:23
Yasuwe :

Abarokotse Jenoside yakorewe Abatutsi mu Karere k’Amayaga mu yahoze ari Komini ya Ntongwe, ubu ni mu Karere ka Ruhango, baravuga ko Nsabimana Jacques wari umwalimu mu mashuri abanza yari yarateye intebe ku cyobo cyakuwemo imibiri ibihumbi 60.000 yajugunywemo muri Jenoside yakorewe Abatutsi mu 1994.

Iyi ntebe yiswe iya "Pilato" yicarwagaho n’uyu Nsabimana Jacques wari Perezida w’Impuzamigambi za CDR muri Komini ya Ntongwe yari munsi y’Igiti cy’Umunyinya cyahoze ahegereye iki cyobo cyacukujwe n’uyu mugabo mu Murenge wa Kinazi ho mu Kagari ka Rutabo mu Mudugudu wa Nyarunazi mu Kigo cy’ishuri ryisumbuye rya Rutabo A.

Umuyobozi wa Ibuka mu Murenge wa Kinazi, Ntakirutimana Marie Josée avuga ko iki cyobo cyitiriwe CND cyacukujwe na Nsabimana Jacques ahagana mu 1993 kugira ngo kizatabwemo Abatutsi ndetse anabigeraho.

Yagize ati "Iki cyobo bajugunyemo abavandimwe, ababyeyi n’abari inshuti zacu cyacukuwe mu 1993 na Nsabimana Jacques wakomokaga mu Bunyambiriri kugira ngo kizatabwemo Abatutsi. Gicukurwa mbere bacyitaga ko kizagirwa ubwiherero bw’ishuri ariko iyo urebye aho cyacukuwe ni kure y’ishuri.”

Akomeza avuga ko Jenoside yakorewe Abatutsi yari yarateguwe kuko barateguye uko bazatemba abatutsi kuko nyuma yo gucukuza iki cyobo Nsabimana Jacques ubwe yahateye intebe akanagira uruhare mu guhitamo abagomba kugitabwamo baba bazima cyangwa bamaze kwicwa.

Yagize ati" Nsabimana yateye intebe kuri iki cyobo mu nsi y’umunyinya maze ujya kwicwa wese akabanza kumuca imbere agacibwa urubanza ari na yo mpamvu twayise intebe ya "Pilato".

Nzigiyimana Célestin warokotse Jenoside muri iki gice cy’Amayaga avuga ko Jenoside yakorewe Abatutsi yakozwe n’impunzi z’Abarundi zotsaga imitima y’Abatutsi babaga bishwe zabashije no gutinyura abandi baturage bakica Abatutsi ntacyo bishisha ariko akagaruka ku bugome bwa Nsabimmana Jacques wari umuyobozi w’Impuzamugambi za CDR muri komini Ntongwe ndetse n’uwari Burugumesitiri w’iyi Komini, Kagabo Charles warundanyije Abatutsi kuri Komini afite umugambi wo kubamaraho.

Abishe Abatutsi mu Mayaga barahanwe ?

Benshi mu bakoze Jenoside muri iki gice bahaniwe ibi byaha byakozwe ariko hari abatarafatwa barimo Abarundi kuko nyuma yaho bisubiriye iwabo ariko Ndabimana Jacques bivugwa ko yaba ari mu gihugu aho yakomokaga mu Bunyambiriri (Nyamagabe na Nyaruguru).

Ni mu gihe uwari Burugumesitiri Kagabo Charles we bivugwa ko yaba ari muri Repuburika Iharanira Demokarasi ya Congo cyangwa i Burundi ariko bagasaba ko aba bakoze aya mahano bacyidengembya bakwiye gushakishwa bagashyikirizwa ubutabera.

Minisiteri y’Ubutabera iherutse gutangariza Radio&TV10 ko hari amadosiye asaga 2000 yashyikirijwe ibihugu 33 kugira ngo abasize bagize uruhare muri Jenoside yakorewe Abatutsi mu Rwanda bafatwe bashyikirizwe inkiko.

Urwibutso rwa Kinazi mu Karere ka Ruhango rushyinguyemo imibiri ibihumbi 65.000 byiciwe mu gice cy’Amayaga harimo ibihumbi 60.000 byakuwe mu cyobo nyuma yo kwicirwa muri iki gice, nyuma yo kuhahungira bazi ko bazaharokokera.

Babaga baturutse mu bice bya Mugina ubu ni mu Karere ka Kamonyi, Kanzenze na Ngenda ubu habaye mu Karere ka Bugesera, Ntyazo mu yari Perefegitura ya Butare na Tambwe ikibarizwa mu Karere ka Ruhango.

Iki cyobo cyari cyacukuwe bivugwa ko kizakoreshwa nk'imisarane y'ikigo cy'ishuri
Icyobo cyajugunywemo abatari bake mu gihe cya jenoside yakorewe Abatutsi mu Karere ka Ruhango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .