Intandaro y’ugufungwa na CMI kwa Lt Manzi watorotse igisirikare cy’u Rwanda

Yanditswe na Musangwa Arthur
Kuya 23 Nzeri 2020 saa 06:54
Yasuwe :
0 0

Ku wa 22 Nzeri 2020, ikinyamakuru cya Leta ya Uganda, New Vision cyatangaje inkuru iteye urujijo ivuga ko “Umusirikare w’u Rwanda yafunzwe akekwaho gutunga imbunda”. Uwo musirikare wavugwaga ni Lt Ivan Manzi w’imyaka 28 ufungiye muri Gereza ya Kitalya mu gihe Urukiko rwa Gisirikare muri Uganda ruzamuburanisha ku wa 19 Ukwakira 2020.

Muri iyo nkuru, New Vision igoreka ukuri ku buryo uyu Manzi yageze muri Uganda n’uko yaje guhinduka uwo ariwe uyu munsi.

Lt Manzi watorotse igisirikare cy’u Rwanda, aba muri Uganda kuva mu 2018. Amakuru yizewe avuga ko ku wa 18 Ukwakira 2018 yatawe muri yombi mu Karere ka Kisoro muri Uganda ashinjwa kuba “intasi y’u Rwanda”.

Kuva icyo gihe, yoherejwe ku Biro bikuru bya CMI, Urwego Rushinzwe Ubutasi mu Gisirikare cya Uganda biri i Mbuya mu Mujyi wa Kampala, aho yafungiwe kugera ku wa 30 Nzeri 2019 ubwo yarekurwaga hamwe n’abandi bose ari barindwi batorotse igisirikare cy’u Rwanda, bashinjwaga kuba intasi bagafungirwa nabo aho hantu.

Bivugwa ko abo basirikare barindwi barimo na Lt Manzi ari Habimana Evode, Rugengamanzi Damascène, Sezibera Emmanuel, Ntezirayayo Ethanael, Mugiraneza Eric na Ndayambaje Emmanuel.

Nyuma y’umwaka wose bahatwa ibibazo anakorerwa iyicarubozo, inzego za Uganda zananiwe kubumvisha ngo bemere ko ari intasi z’u Rwanda.

Hari amakuru avuga ko muri icyo gihe bari bafunzwe, Ambasade y’u Rwanda muri Uganda yandikiye Minisiteri y’Ububanyi n’Amahanga ya Uganda isaba ko aba basirikare batorotse bakohereza mu Rwanda bakagezwa imbere y’ubutabera.

Nta gisubizo Minisiteri y’Ububanyi n’Amahanga ya Uganda yigeze itanga kuri iyo baruwa ya Ambasade y’u Rwanda. Aho kurekura aba basirikare batorotse ngo boherezwe mu Rwanda, abayobozi ba Uganda barabarekuye babohereza muri RNC ya Kayumba Nyamwasa, umutwe w’iterabwoba ufashwa na Leta ya Uganda.

CMI yashinze Lt Manzi kugenzura ibikorwa by’ubukangurambaga no gushaka abantu bajya muri RNC mu Karere ka Kakumiro, kamwe mu duce two muri Uganda tubamo abantu bafite inkomoko mu Rwanda.

Ibibazo byatangiye kuba isibaniro kuri we ubwo yatatiraga inshingano yari yahawe ahubwo agashaka akazi ko kuba umurinzi (bodyguard) wa Baltazar Kasirivu Atwooki, Umunyamabanga wa Leta muri Uganda ushinzwe kugenzura Ubukungu.

Uyu muyobozi yashatse uburinzi mu gihe yari muri gahunda zo kwiyamamariza umwanya wo kwinjira mu Nteko Ishinga Amategeko anyuze mu gace ka Bugangaizi. Ni amatora yaranzwe n’imvururu ndetse n’imirwano y’abashakaga intebe.

Ku wa 1 Nzeri 2020, abashyigikiye Fred Byamukama wari uhanganye na Atwooki basagarariye imodoka ye. Muri iyo mirwano yo gushaka uko uwo mu minisitiri yarokorwa, bivugwa ko imbunda ye yaguye hasi hanyuma ikaza gutoragurwa na Manzi wari umurinzi we.

Icyo gihe polisi yarahageze kugira ngo ihoshe imirwano, ifata Manzi n’imbunda yari afite ifite ibirango No. UG/012801417 byatanzwe na Sitasiyo ya Polisi ya Katwe yanditse kuri Atwooki.

Ngo aho kubaza Manzi impamvu yari atwaye imbunda ya sebuja, ikintu cyagombaga kuba cyumvikana bitewe n’ibihe yari arimo ndetse no kuba yari umurinzi we, inzego za Uganda zahise zitangira kuvuga ko intasi y’u Rwanda yafashwe ifite imbunda.

Manzi yahise atabwa muri yombi aho i Bugangazi aho kuba Nakulabye nk’uko New Vision yabitangaje.

Kuba CMI yarahise ifata umwanzuro wo kumwohereza gukorana na Kayumba Nyamwasa ubwo yafungurwaga biri mu mugambi mugari wa Uganda wo gutera ingabo mu bitugu abashaka guhungabanya umutekano w’u Rwanda. Mu yandi magambo nk’umuntu watorotse igisirikare cy’u Rwanda, ntakiri umusirikare wacyo ahubwo ni uwa Uganda na RNC.

Ni mu gihe ubusanzwe abasirikare batorotse baba bagomba koherezwa mu gihugu bavuyemo bakagezwa imbere y’amategeko kuko ibyo baba bakoze ari icyaha gikomeye gihanirwa.

Itabwa muri yombi rya Manzi ni ihurizo rikomeye kuri we kuko azisanga ari gusobanura impamvu yari yaranze akazi yahawe muri RNC, dore ko ajya kurekurwa aricyo cyari cyagendeweho.

Ivan Manzi amaze imyaka ibiri aba muri Uganda kuva yatoroka igisirikare cy'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .