Intambwe ku yindi: Ibyafashije Akarere ka Gisagara kugamburuza ubukene bwari bwarahacumbitse

Yanditswe na Prudence Kwizera
Kuya 25 Kanama 2020 saa 11:53
Yasuwe :
0 0

Abazi neza Akarere ka Gisagara bavuga ko kavuye kure mu bijyanye n’ibikorwa remezo, iterambere ndetse n’imibereho myiza y’abaturage kuko amateka yerekana ko ari ko kigeze kubaho mu Rwanda katagira umuhanda wa kaburimbo mu gihe utundi twose twari tuyifite.

Kuri ubu imibereho y’abagatuye iri mu nzira nziza kuko hari ibikorwa remezo by’ibanze bagejejweho ku buryo byahinduye imyumvire n’imitekerereze y’abagatuye, bituma kuri ubu gasigigaye kaza imbere y’utundi twose muri gahunda zitandukanye zirimo gutanga umusanzu w’ubwisungane mu kwivuza, kurwanya ruswa n’izindi zituma kegukana ibikombe.

Zimwe muri gahunda twavuga zagezweho muri Gisagara ni uko ubu muri buri Kagari hamaze kugezwamo ivuriro ry’ibanze (Poste de Santé), amashuri, amashanyarazi n’amazi meza.

Aka karere gatuwe n’abaturage 362,698 bari mu ngo 88,201; abagera kuri 90% ku ijana ni abahinzi-borozi.

Umuyobozi w’Akarere ka Gisagara, Rutaburingoga Jérome, yabwiye IGIHE ko ibyo bagezeho byose babikesha imiyoborere myiza iri mu gihugu irangajwe imbere na Perezida Kagame Paul.

Ubuhinzi n’Ubworozi

Hagamijwe guteza imbere ubuhinzi mu Karere ka Gisagara hatoranyijwe ibihingwa bine byibandwaho; ibigori, umuceri, urutoki n’ibishyimbo kugira ngo abahinzi babashe kwihaza no gusagurira inganda n’amasoko.

Umuyobozi w’Akarere ka Gisagara, Rutaburingoga Jérome, avuga ko bafite uruganda rw’umuceri mu Murenge wa Gikonko rutunganya toni zigera ku 7800; n’uruganda rutunganya inzoga mu bitoki rufite ubushobozi bwo kwakira Toni zisaga 900 z’ibitoki mu kwezi kumwe.

Rugemura inzoga mu turere twa Gisagara, Huye, Nyaruguru na Nyamagabe ku buryo ku kwezi rwinjiza amafaranga agera kuri Miliyoni 90.

Yavuze ko batangiye no kubaka uruganda rutunganya ibigori kugira ngo nabyo bigirire akamaro kanini abahinzi babyo ndetse bari gutekereza n’uko ibishyimbo nabyo bakongererwa agaciro.

Ati “Urwo ruhererekane nyongeragaciro rw’ibyo bihingwa niturukomeza, gukira tuzabigeraho mu gihe gito.”

Yasobanuye ko kera Akarere ka Gisagara kakoraga ubuhinzi bwa gakondo gusa ariko kuri ubu basigaye bahinga kijyambere kandi bari kwiga uko amakoperative yagira imikorere myiza kugira ngo abanyamuryango bayo bose abateze imbere.

Ati “Nko ku muceri umwaka ushize heze ungana na toni 7800, amafaranga yinjira mu baturage uruganda rwatanze ni Miliyari ebyiri na Miliyoni 200.”

Ubworozi nabwo bwatejwe imbere mu Karere ka Gisagara kuko ingo 28 449 zingana na 32% zoroye inka. Hari kandi n’aboroye andi matungo magufi abafasha kubona ifumbire no kwiteza imbere.

Muri izo ngo zoroye inka, hafi ibihumbi 15 zazihawe muri gahunda ya Girinka Munyarwanda.

Guhabwa inka muri gahunda ya Girinka byafashije abaturage bo mu Karere ka Gisagara kuva mu bukene

Gutunganya ibishanga

Mu Karere ka Gisagara haboneka ibishanga binini bihingwa bigera kuri 16, byose bikaba byaratunganyijwe kugira ngo abahinzi babashe kubibyaza umusaruro. Bikunze guhingwamo umuceri n’ibigori.

Abahinga igishanga cya Duwani kiri mu Murenge wa Kibilizi bavuga ko kuba cyaratunganyijwe byatumye umusaruro wiyongera.

Nziyonizeye Mark ati “Mbere twihingiraga ibyo dushaka, ugasanga hariya hahinze amateke undi agahinga ibijumba undi ibirayi ntitubone umusaruro ushimishije ariko aho igishanga gitunganyirijwe umuceri uraboneka, cyaba ari igihe cyo guhinga ibigori cyangwa ibindi ukabona umusaruro ushimishije.”

Umuyobozi w’Akarere ka Gisagara, Rutaburingoga, avuga ko kuri ubu hagiye gutunganywa n’igishanga cya Rwamporera gikora ku mirenge ya Mamba na Gikonko, gifite hegitali 600 kigiye gutunganywa ku bufatanye n’abanya-Korea kandi cyitezweho guteza imbere abahinzi.

Guhinga imboga mu turima tw'igikoni byafashije guhangana n'imirire mibi
Guhinga kijyambere mu byatumye abaturage bo mu Karere ka Gisagara batera intambwe mu iterambere

Amashanyarazi

Akarere ka Gisagara kari mu turere dufite amashanyarazi menshi mu gihugu kuko abaturage bayafite bangana na 63%. Kavuye kure kuko mu 1994 kari kuri 0% ndetse n’aho akarere kubatse ntayahari. Mu 2010 abayafite banganaga na 2.2% naho mu 2015 kari kuri 13%.

Umuyobozi w’Akarere ka Gisagara, Rutaburingoga Jérome avuga ko mu myaka 10 amashanyarazi yikubye inshuro hafi 32.

Ati “Umuvuduko turiho, iyo abandi biruka twe ubanza tuba tuguruka kuko kuva 2010 kugeza uyu munsi mu myaka 10 dukubye inshuro hafi 32. Ni ibintu bikomeye cyane umuntu yakwishimira.”

Yatanze urugero ku Murenge wa Mukindo wagezemo amashanyarazi mu 2018 ko ari wo wa mbere ufite abaturage bayafite ku bwinshi kuko ingo zaho zingana na 80% zose zicana.

Kuvana abaturage muri Nyakatsi

Ubuyobozi bw’Akarere ka Gisagara butangaza ko ako karere kari mu twa mbere twari dufite abaturage benshi batuye mu nzu za nyakatsi kuko mu 2012 ingo zigera ku 11,600 zingana na 15% zari zituye mu nzu zisakaje ibyatsi.

Kuri ubu abaturage benshi batuye mu nzu nziza zisakaje amabati cyangwa amategura.

Bamwe muri abo baturage bemeza ko kuva muri nyakatsi byabafashije kugira isuku kandi batakirwara indwara zituruka ku mwanda.

Nteziryayo Samuel wo mu Murenge wa Kansi ati “Mbere byari bibi cyane wasangaga abana barwaragurika kubera kuba ahantu habi hafite umwanda; ariko tukimara gutura ku mudugudu tuvuye muri nyakatsi, ntabwo bakirwaragurika.”

Mu myaka yashize Akarere ka Gisagara kari gafite umubare munini w’abaturage badafite aho kuba kuko habarurwaga imiryango irenga 2332 isembera ariko 1906 bamaze kubakirwa bangana na 81%.

Mu mwaka ushize hubakiwe ingo 551 bitwara amafaranga 462,840,000. Biteganijwe ko muri uyu mwaka wa 2020 hazubakirwa ingo 426 bikazatwara 357,840,000 Frw.

Ingo zigera ku 2088 zitagiraga ubwiherero bwujuje ibisabwa nazo zafashijwe kububona binyuze mu kuziha imiganda no gukora ubukangurambaga kugira ngo abaturage babyiteho.

Imihanda

Imihanda yo mu Karere ka Gisagara yaratunganyijwe, ariko by’umwihariko mu 2019 kabonye umuhanda wa kaburimbo wa mbere mu mateka yako.

Ni umuhanda wa kilometero 13.8 uturuka i Huye ukagera ku Biro by’Akarere ka Gisagara; bemerewe na Perezida Kagame Paul. Watangiye kubakwa tariki ya 8 Ukwakira 2018 wuzura utwara asaga kuri Miliyari 6.5Frw.

Ni igikorwa remezo gikomeye abaturage bishimiye bavuga ko cyongereye agaciro ibyo bakora.

Mukamusoni Marie Claire ati “Aho dukorera hongerewe agaciro kuko batuzaniye kaburimbo. By’umwihariko nk’abagore twishimiye ko iterambere rigeze iwacu kandi bitwongerera imbaraga mu byo dukora.”

Kuri ubu uwo muhanda wamaze gushyirwaho amashanyarazi awucanira.

Korora kijyambere byafashije abaturage kwiteza imbere
Mu Karere ka Gisagara hera urutoki abahinzi bakabigemura ku ruganda kugira ngo bizengwemo inzoga yujuje ubuziranenge
Mu Ugushyingo 2019, Urwego rw'Umuvunyi rwashyikirije Akarere ka Gisagara igikombe

Uruganda wa Nyiramugengeri

Mu Karere ka Gisagara hagiye kuzura uruganda rwa nyiramugengeri ruri kubakwa mu Murenge wa Mamba ruzatanga megawati 80 zizatuma amashanyarazi asanzwe yifashishwa mu Rwanda yiyongeraho 40%.

Imirimo yo kubaka igice cya mbere cy’urwo ruganda igeza ku kigero kiri hejuru ya 90%.

Urwo ruganda ruri kubakwa na Sosiyete yigenga ya Quantum Power mu gishanga cy’Akanyaru rwatangiye kubakwa muri Gicurasi 2017 ruha akazi abaturage barenga 900.

Gasana Gerard ukora akazi k’izamu ati “Bampemba buri kwezi kandi amafaranga y’ukwezi uba uyizeye kuko uyabona atubutse akakugirira akamaro.”

Gutura ku mudugudu

Gutuza abaturage ku mudugudu ni kimwe mu bikorwa byafashije abaturage mu iterambere no guhindura imibereho yabo.

Urugero ni urw’imiryango 120 yo mu Murenge wa Mamba mu Karere ka Gisagara yahoze iba mu nzu za nyakatsi n’indi yari ituye mu manegeka, yarahavanwe ijya gutuzwa mu mudugudu w’icyitegererezo wa Mamba (IDP Model Village) yubakiwe na Leta y’u Rwanda utwaye amafaranga 1,203,000,000.

Abawutujwemo bavuga ko imibereho yabo yahindutse iba myiza.

Mukantabana Béata ati “Nabaga mu nzu ya nyakatsi mvirwa narihebye ariko Perezida wacu yaduhaye inzu nziza. Ubu njyewe numva nezerewe kandi ubuzima bwaragarutse; bampaye inka ku buryo amata nyabona. Kuba narabonye ahantu heza ho kuba ni ibyishimo kandi mpora nshimira Imana n’ubuyobozi bwacu bwiza.”

Abatujwe muri uyu mudugudu wa Mamba bose hamwe ni abantu 659 barimo abahoze baba muri nyakatsi n'abari batuye muri ntuye nabi

Inzu mpuzamikino (Gymanase)

Leta y’u Rwanda yubakiye Akarere ka Gisagara inzu mpuzamikino “Gymnase” yo ku rwego rwo hejuru, yagafashije gufungura imiryango kakaba kabasha kwakira amarushanwa akomeye.

Iyo nzu mu 2016 nibwo hasojwe imirimo yo kuyubaka, ikaba ikinirwaho imikino ya Volleyball, Basketball, Sitball na Sitting Volleyball ikakira abantu barenga 1200. Iyi nzu ikaba yaruzuye itwaye Miliyoni 922 Frw.

Leta y'u Rwanda yubakiye Akarere ka Gisagara inzu mpuzamikino 'Gymnase' yo ku rwego rwo hejuru

Gushyira hamwe kw’abayobozi

Gushyira hamwe kw’abayobozi ku nzego zose ni kimwe mu byihutisha iterambere ry’abaturage. Umuyobozi w’Akarere ka Gisagara, Rutaburingoga Jérome, avuga ko kuba besa imihigo neza bishingiye ku mikorera myiza n’imikoranire.

Yavuze ko kuba ari aba mbere mu gutanga umusanzu w’ubwisungane mu kwivuza mu gihugu ari imikorere myiza y’abayobozi b’imidugudu.

Ati “Imiyoborere y’ubufatanye no kudacogora, gukurikirana umuturage kandi umuzi ni ingenzi. Ubu muri mituweli tugeze kuri 94.3% mu mezi abiri ashize dutangiye umwaka wa mituweli. 6% gasigaye ntabwo katunanira.”

Mu Ugushyingo 2019 Urwego rw’Umuvunyi rwashyikirije Akarere ka Gisagara igikombe nk’akabaye aka mbere mu Ntara y’Amajyepfo mu bikorwa byo kurwanya ruswa no kuyikumira.

Mu 2019 mu kwezi kwa Kamena, Akarere ka Gisagara kagize umudugudu wahize indi mu kwesa imihigo mu midugudu umunani iza ku isonga mu turere tw’Intara y’Amajyepfo.

Uwo mudugudu witwa Kaburanjwiri wagabiwe inka itazigera iteka na Repubulika Paul Kagame, kubera ibikorwa byiza abawutuye bagezeho bafatanyije.

Akarere ka Gisagara kandi kaje ku mwanya wa kabiri mu bikorwa byimakaza ubumwe n’ubwiyunge mu Banyarwanda, gahabwa igikombe muri Nzeri 2019.

Umudugudu wa Kaburanjwiri wahize indi mu kwesa imihigo mu midugudu umunani iza ku isonga mu Ntara y'Amajyepfo
Umuyobozi w'Akarere, Rutaburingoga yabwiye IGIHE ko ibyo bagezeho byose babikesha imiyoborere myiza irangajwe imbere na Perezida Kagame
Uruganda GABI Ltd rutunganya inzoga mu bitoki rukageza kuri toni 900 ku buryo ku kwezi rwinjiza amafaranga agera kuri Miliyoni 90 ku kwezi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .