Inka 2000 n’ibihingwa by’abahinzi basaga 6600 byatangiwe ubwishingizi mu mezi atandatu

Yanditswe na Evariste Nsengimana
Kuya 19 Ukwakira 2019 saa 12:59
Yasuwe :
0 0

Minisiteri y’Ubuhinzi n’Ubworozi (Minagri) itangaza ko umushinga w’ubwishingizi bw’amatungo n’ibihingwa uheruka gutangizwa umaze kwitabirwa n’abahinzi barenga 6600 mu gihe amatungo maremare arenga 2000 yabutangiwe.

Muri Mata uyu mwaka nibwo Minisitiri w’Ubuhinzi n’ubworozi, Dr Mukeshimana Gerardine, yatangije ku mugaragaro gahunda y’ubwishingizi bw’amatungo n’ibihingwa mu rwego rwo kuziba icyuho baterwa n’ihindagurika ry’ibihe.

Iyi gahunda ya Leta y’ubwishingizi yiswe ‘Tekana Urishingiwe Muhinzi-Mworozi’ ishyirwa mu bikorwa na Minagri ifatanyije n’abafatanyabikorwa batandukanye barimo Ikigo cy’Ubwishingizi Radiant, Ikigo Access to Finance Rwanda, Prime Insurance Company na Sonarwa.

Kuri ubwo bwishingizi Leta itangira umuturage uruhare rwa 40% nka nkunganire na we akitangira 60%. Ku ikubitiro gahunda y’ubwishingizi bw’amatungo yatangiye gukorera mu turere twa Nyanza, Gicumbi, Musanze, Ruhango, Nyagatare na Burera.

Gahunda y’ubwishingizi bw’ibihingwa izatangira gushyirwa mu bikorwa mu gihembwe cy’ihinga A cya 2020 mu turere twa Gasabo, Nyagatare, Bugesera, Gisagara, Kirehe, Gicumbi, Huye, Rulindo Ngoma na Rwamagana.

Imibare ya Minagri igaragaza ko kuva iyi gahunda itangijwe, abahinzi 6671 bamaze kwiyandikisha no gushinganisha ibihingwa (umuceri n’ibigori) byabo bafite hegitari 1500.11, mu basaga ibihumbi 19 babishishikarijwe.

Ku matungo, Minagri igaragaza ko inka zigera kuri 2025 zamaze gutangirwa ubu bwishingizi. Inka zigera kuri 25 zifite agaciro ka miliyoni 15.6 Frw mu zashinganishijwe zimaze gupfa, aho 20 zahise zishyurwa n’ibigo zashinganishijwemo.

Umunyamabanga wa Leta muri Minisiteri y’Ubuhinzi n’Ubworozi, Musabyimana Jean Claude, avuga ko iyi gahunda ikiri mu igeragezwa ryatangijwe ku nka.

Ati “Uko tugenda turikora [igerageza] hari ibyo twiga, turimo gushakisha ubwoko bw’ubwishingizi buberanye n’ubuhinzi n’ubworozi bwahabwa Abanyarwanda, igerageza rizamara umwaka twaritangirije ku nka, umuceri n’ibigori, amasomo tuzakuramo niyo azatuma dushobora kongera ibyo twishingira.”

Ku bwishingizi bw’amatungo bwahise butangira gushyirwa mu bikorwa, ikigo cy’ubwishingizi kizajya cyishyura inka zishwe n’impanuka, indwara cyangwa ibyorezo.

Ikiguzi cy’ubwishingizi kingana na 4.5% by’agaciro k’inka mu gihe nkunganire ya Leta ingana na 40% ku kiguzi cy’ubwishingizi.

Nk’uko byasobanuwe ubwo bwishingizi bureba inka z’inzungu n’iz’ibyimanyi, zifite kuva ku minsi 90 zivutse (inyana) kugeza ku myaka umunani (imbyeyi) hatarimo ibimasa.

Urugero rw’umuntu ufite inka imwe y’agaciro k’ibihumbi 400Frw itangirwa ubwishingizi bw’ibihumbi 18 Frw arimo 10800 Frw yitangira Leta ikamutangira 7200 Frw asigaye. Nk’inka ifite agaciro ka miliyoni 1 Frw, itangirwa ubwishingizi bw’ibihumbi 45 Frw arimo ibihumbi 27 Frw yitangira.

Inka igiye guhabwa ubwishingizi iterwa iherena ku gutwi kw'ibumoso
Umunyamabanga wa Leta muri Minisiteri y’Ubuhinzi n’Ubworozi, Musabyimana Jean Claude, yavuze nyuma y'umwaka hazamenyekana niba ubwishingizi butangwa ku yandi matungo n'indi myaka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza