Ingo zisaga ibihumbi 232 zahawe amashanyarazi umwaka ushize

Yanditswe na Evariste Nsengimana
Kuya 6 Mutarama 2020 saa 04:27
Yasuwe :
0 0

Imibare ya Sosiyete y’u Rwanda ishinzwe ingufu mu Rwanda (REG), igaragaza ko umwaka ushize wa 2019, wasize ingo zisaga 232,000 zihawe amashanyarazi zirimo izigera ku bihumbi 147 zahawe afatiye ku muyoboro mugari mu gihe izigera ku bihumbi 85 zahawe amashanyarazi adafatiye ku muyoboro mugari.

Iyi mibare yatangajwe mu cyumweru gishize ubwo ubuyobozi bwa REG bwari mu nama n’abakozi byo bakorera mu Mujyi wa Kigali no mu mashami ya Kamonyi na Bugesera, barebera hamwe uko umwaka wagenze no kwizihiza umushya.

Umuyobozi Mukuru wa REG Eng. Ron Weiss yasabye abakozi gukomeza gushyira hamwe kuko bagifite akazi kenshi ko kugera ku muhigo u Rwanda rwihaye wo kugeza amashanyarazi ku baturarwanda bose bitarenze umwaka wa 2024.

Imwe mu mihigo iki kigo cyiyemeje muri uyu mwaka harimo gutanga amashanyarazi ku Mirenge 10 isigaye idafite amashanyarazi mu gihugu.

Hri kandi gusimbura imiyoboro yubatswe cyera idafite ingufu izwi nka ‘single phase’ ikongererwa ingufu ikagirwa ‘Three phase’ no kongera ubukangurambaga mu baturage bagakoresha ibicanwa birengera ibidukikije.

Abakozi bongeye gushimirwa uruhare bagira mu kurushaho kunoza imitangire ya serivisi, basabwa gukomeza guharanira ko ruswa irandurwa burundu muri serivisi z’amashanyarazi.

Umuyobozi w’umuryango urwanya ruswa n’akarengane (Transparency International Rwanda), Ingabire Marie Immaculée, yavuze ko REG yateye intambwe mu kurwanya ruswa.

Ubushakashatsi bakora buri mwaka kuri ruswa nto (Rwanda Bribe Index) bwerekanye ko mu mwaka wa 2019 REG ari cyo kigo cyateye imbere cyane mu kurwanya ruswa ugereranyije n’ibindi bigo mu Rwanda.

Ubu bushakashatsi bwerekana ko REG, yagize amanota meza kuko abayitunze agatoki ku birebana no kurya ruswa ari 5.3 % bavuye kuri 12.93 % umwaka wari wabanje wa 2018.

Ati “Ubu nta burenganzira mufite bwo gusubira inyuma kuko mwaba mutatiye igihango. Turifuza ko umwaka wa 2020 uyu mubare uzagabanuka na none, mukazaba mugeze byibuze kuri 3%.”

Umuyobozi w’Inama y’Ubutegetsi ya REG, Nyamvumba Robert, yasabye abakozi bose gukomeza kubaka icyizere abanyarwanda bafitiye REG, bageza ku banyarwanda serivisi nziza nk’uko bimaze iminsi bikorwa.

Ati “Dufite umuhigo ukomeye ko mbere ya 2024 nta muturarwanda waba agikoresha itoroshi cyangwa acana inkwi kugira ngo abone nijoro. Uwo niwo muhigo dufite kandi ukomeye, ariko ujyana no kurushaho kunoza serivisi. Uretse kurwanya ruswa imunga ubukungu, no mu gucunga umutungo w’ikigo tugomba naho kuzira amakemwa”.

Iyo nama yarangiye abakozi bose ba REG bafashe ingamba zo kurushaho kunoza serivisi nziza baha abakiriya no gukomeza kuzikoresha abakozi bo mu yandi mashami yayo mu gihugu hose muri Mutarama 2020.

Imibare ya REG igaragaza ko ubu ingo zisaga 52.2% zifite amashanyarazi, zirimo 38.2% zifite akomoka ku muyoboro mugari naho izigera kuri 14% zifite amashanyarazi adafatiye ku muyoboro mugari yiganjemo akomoka ku mirasire y’izuba.

Ubwo abayobozi ba REG bakorera mu Mujyi wa Kigali no mu turere twa Kamonyi na Bugesera bari mu nama
Ingabire yavuze ko REG yateye intambwe mu kurwanya ruswa
Ingo zisaga ibihumbi 232 zahawe amashanyarazi umwaka ushize
Umuyobozi Mukuru wa REG Eng Ron Weiss yasabye abakozi gukomeza gushyira hamwe
Umuyobozi w'inama y'ubutegetsi ya REG, Nyamvumba Robert yasabye abakozi bose gukomeza kubaka icyizere abanyarwanda babafitiye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza