Ingaruka zizakomeza kubageraho - CP Kabera yateguje abahinduye restaurant utubari

Yanditswe na Niyitanga Jean Paul
Kuya 11 Ugushyingo 2020 saa 12:07
Yasuwe :
0 0

Umuvugizi wa Polisi y’u Rwanda, CP John Bosco Kabera, yabwiye abantu bakomeje kurenga ku mabwiriza yo kwirinda Covid 19 bagakora ibitemewe, ko ingaruka zirimo ibihano biremereye zigiye kubageraho.

Nubwo Abanyarwanda benshi bubahiriza amabwiriza yo kwirinda ikwirakwira rya Coronavirus, hari abakomeza kurenga kuri ayo mabwiriza bagakora ibintu bitemewe cyangwa bagatanga serivisi zitarakomorerwa.

Mu kiganiro yagiranye na RBA kuri uyu wa 10 Ugushyingo 2020, CP Kabera yatunze agatoki amahoteli n’utubari, avuga ko bamwe buririra kuri serivisi bemerewe gutanga maze bakanarenzaho izo batemerewe.

Ati “Hari abantu bacuruza utubari kandi mu by’ukuri bitwaza ko bacuruza serivisi za resitora (restaurant), ugasanga baracuruza inzoga kurusha amafunguro. Ntabwo byemewe! Turasaba ko bakwiye gukora ibyemewe bigenwa n’amabwiriza.”

“Hari abagaragara ko barimo kudohoka, haba ari ukwambara agapfukamunwa, guhana intera, gukaraba intoki, ariko noneho no gukora ibitemewe muri serivisi zitari zafungurwa.”

“Turabibona rero kandi ntibikwiye, abakomeza kubirengaho bazafatwa bahanwe, abacura umugambi ukomeye, bakabigambirira bagacura umugambi wo kugira ngo bice amabwiriza cyangwa bakore ibitemewe, abo na bo ingaruka zizakomeza kugenda zibageraho z’ibihano.”

CP Kabera yavuze ko gukomeza gukora ibitemewe bizashyira ubuzima bwa benshi mu kaga, bityo n’ibyo bari bemerewe gukora bikongera gufungwa.

Ati “N’abo bacuruza serivisi za restaurant, bagacuruza inzoga bikagaragara ko barenze ku mabwiriza, iyo serivisi batangaga y’ibyo kurya na yo ishobora guhagarara.”

Yavuze ko abarenga ku mabwiriza barimo gutuma intambwe yari yatewe mu kwirinda iki cyorezo isubira inyuma, kuko nubwo hari imirimo nyinshi irimo gukorwa, icyorezo ntaho cyagiye.

Ati “Coronavirus ntabwo yarangiye, irahari ahubwo ikinagaragara ni uko iri hirya no hino mu gihugu, […] imibare y’abitaba Imana yariyongereye, imibare y’abandura na yo igenda yiyongera, n’iyo handuye umwe ashobora kwanduza benshi, byumvikane ko nta rwitwazo abantu bafite rwo kuvuga ngo Coronavirus yararangiye.”

Kuri uyu wa 10 Ugushyingo 2020, abantu babiri bo mu Karere ka Rwamagana bishwe na COVID-19, ndetse mu bipimo 2 974 byafashwe, abagera kuri 20 basanzwemo iki cyorezo.

Ni ku munsi wa kabiri wikurikiranya mu Karere ka Rwamagana hatangajwe abantu babiri bishwe na Covid 19 kuko no ku itariki 9 Ugushyingo Covid 19 yishe abantu babiri.

Minisitiri w’Ubutegetsi bw’Igihugu, Prof Shyaka Anastase, aheruka gutangaza ko abaturarwanda nibakomeza kwirara, bishoboka ko mu minsi mike iri imbere basubizwa muri guma mu rugo, mu gihe icyorezo cya COVID-19 cyaba cyongeye gukaza umurego.

Kuva ku wa 14 Werurwe 2020, ubwo umurwayi wa mbere yabonekaga mu Rwanda, hamaze gufatwa ibipimo 574 876; muri byo abantu 5262 basanzwemo ubwandu mu gihe abagera ku 4967 bakize. Kuri ubu abarwayi 255 ni bo bari kwitabwaho mu gihe 40 bitabye Imana.

CP Kabera yaburiye abakomeje kurenga ku mabwiriza yo kwirinda COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .