Inganda zenga urwagwa 13 zaciwe miliyoni 24Frw yo kutubahiriza ubuziranenge

Yanditswe na Evariste Nsengimana
Kuya 15 Mutarama 2019 saa 05:32
Yasuwe :
0 0

Ikigo cy’igihugu gitsura ubuziranenge (RSB), cyatangaje ko mu nganda 54 zemerewe gutunganya inzoga mu bitoki (urwagwa) harimo 13 zanyuranyije n’amabwiriza y’ubuziranenge zahawe, zihanishwa amande ya miliyoni 24Frw.

Mu 2016 mu Rwanda habarurwaga inganda zenga urwagwa 218 ariko zose siko zari zujuje ubuziranenge. Zimwe zavangagamo ibintu bishobora kugira ingaruka ku buzima bw’abantu nk’ifumbire, amatafari, umwayi cyangwa bakazifunga mu macupa ya pulasitiki kandi bitemewe.

Icyo gihe hakozwe ubugenzuzi zimwe zirahagarikwa, hasigara 54 zujuje ibisabwa, zinahabwa icyemezo cy’ubuziranenge na RSB, zitunganya ubwoko bw’inzoga bugera kuri 103, burimo 67% bw’izikomoka ku bitoki.

Kuri uyu wa kabiri ubwo Komisiyo y’Ububanyi n’Amahanga, Ubutwererane n’Umutekano muri Sena yaganiraga n’ubuyobozi bwa Minisiteri y’Ubucuruzi n’inganda (Minicom), RSB n’Ikigo gishinzwe ubushakashatsi n’iterambere ry’inganda (NIRDA), hagaragajwe ko hari inganda zateshutse ku mabwiriza zahawe.

Byari ibiganiro bigamije kugenzura ishyirwa mu bikorwa ry’umwanzuro washyikirijwe Guverinoma mu bijyanye n’iyubahirizwa ry’ibikubiye mu cyemezo cy’ubuziranenge cyo gukora ibinyobwa bikomoka ku bitoki n’ibindi binyobwa.

Umuyobozi mukuru wa RSB, Murenzi Raymond, yavuze ko muri 54 zahawe icyangombwa cy’ubuziranenge harimo izakoze amakosa bitewe n’ubushobozi bw’amafaranga n’ubumenyi buke bw’abakozi.

Ati “Mu igenzura duheruka gukora mu kwezi kwa 11 tugenzura izo nzoga zose ziri ku isoko zigera ku 100, twongeye gusura izo nganda 54 navuze ndetse dusanga amabwiriza twabahaye n’amasezerano twagiranye batabyubahiriza 100%.”

Mu byo batubahiriza harimo uburyo bwo gutunganya no gupfunyika inzoga zikomoka ku bitoki n’izindi ariko ahanini bitewe n’ubumenyi buke cyangwa ubushobozi bw’amafaranga.

Murenzi ati “Twasanzemo inganda 13 zikora amakosa adashobora kwihanganirwa. Abongabo twabaciye amande ndetse miliyoni zigeze kuri 24Frw zinjiye mu isanduku ya Leta, rumwe rurahagarikwa hanyuma izindi zihanangirizwa kutongera kurenga ku mabwiriza y’ubuziranenge.”

Abasenateri bavuze ko ari ikibazo gikomeye kuko inzoga zitujuje ubuziranenge arizo ntandaro y’amakimbirane mu muryango nyarwanda.

Perezida wa komisiyo y’ububanyi n’amahanga, ubutwererane n’umutekano, Senateri Rugema Michel, yavuze ko izo nganda zikwiye kongererwa ubushobozi kuko ari yo ntandaro yo gukora rwihishwa, ibitujuje ubuziranenge.

Senateri Rugema yanasabye ko hajya habaho ubugenzuzi buhoraho kuko bigaragara ko bamara kugenzurwa, bakarenga ku mabwiriza bahawe. Gusa RSB ivuga ko ubugenzuzi buhoraho kandi buzakomeza.

Minisitiri w’Ubucuruzi n’Inganda, Soraya Hakuziyaremye, yavuze ko abafite inganda bazakomeza kwigishwa akamaro ko gukora urwagwa rwujuje ubuziranenge ndetse bakongererwa n’ubushobozi, ku buryo ruzaba ikinyobwa nyarwanda cy’umwimerere.

Hari inganda zari zemerewe kwenga urwagwa ariko zikabikora mu buryo butujuje ubuziranenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza