Ingabire Immaculée yasabye ko abanyereza umutungo wa leta bajya bashyirwa ku karubanda

Yanditswe na Evariste Nsengimana
Kuya 24 Nzeri 2018 saa 12:32
Yasuwe :
0 0

Umuyobozi w’umuryango urwanya ruswa n’akarengane (Transparency International Rwanda), Ingabire Marie Immaculée, yasabye ko ubushinjacyaha bwajya bushyira ku karubanda amazina y’abantu bashinjwa ruswa no kunyereza umutungo wa Leta, bwashyikirije inkiko.

Ingabire yabivuze kuri iki cyumweru, mu kiganiro cyatambutse kuri Radiyo Rwanda, kibanze ku bikwiye gukora ngo umutungo wa Leta ukoreshwe uko bikwiye.

Nkusi Juvénal, wayoboraga Komisiyo ishinzwe gukurikirana imikoreshereze y’umutungo wa leta mu Nteko Ashinga Amategeko y’u Rwanda (PAC), yabanje kugaragaza ko hakiri imbogamizi mu kugaruza umutungo unyerezwa.

Muri izo yavuzemo nko kuba abayobozi bashinjwa kuwunyereza usanga benshi bawandika ku bandi bantu bikagorana kumenya aho bawerekeje ngo ugaruzwe.

Iki nicyo Ingabire yahereyeho yemeza ko usanga zimwe mu nzego zishinzwe kurinda umutungo wa Leta, zigenda biguruntege mu kuwugaruza no kuwukurikirana.

Ati “Iyo umugenzuzi mukuru w’Imari ya Leta amaze gutanga raporo, PAC ikayisesengura hari bimwe bihita bijya no mu bushinjacyaha.”

Ingabire avuga ko kugeza ubu umunyarwanda aba afite amatsiko yo kumenya uwanyereje umutungo cyangwa uwariye ruswa wagejejwe mu nkiko, ariko bikamugora kubamenya.

Ati “Igihe kizagera dusabe ubushinjacyaha ko buzajya bubatangaza nka kuriya Urwego rw’Umuvunyi rubikora. Dusabe rwose ko iryo tegeko rijyaho, ibirego bijyanye no kunyereza umutungo w’igihugu na ruswa bakiriye n’uko babikurikiranye.”

Yakomeje agira ati “Bajye babitangaza bijye ku karubanda. Batwereke izo bagejeje mu nkiko wenda barekere aho. Uko inkiko zabikurikiranye ni ibyazo.”

Yavuze ko bizafasha abaturage bari mu kababaro k’umutungo wanyerejwe na ruswa yariwe.

Ati “Ubushinjacyaha bukwiye kugira inshingano zo kutubwira buti ‘Dore bya bindi badushyikirije, mu by’amategeko atwemerera dore icyo twabikozeho.’”

Ingabire avuga ko hakiri ikibazo kuko usanga hari dosiye z’abantu bashinjwa ibyo byaha, dosiye zabo zo mu 2017 kugeza ubu ntacyo zirakorwaho.

Ubushinjacyaha bugaragaza ko ibyaha bimunga igihugu bikomeza kwiyongera umunsi ku wundi.

Mu myaka itatu ishize, bwakiriye dosiye 1736, bugeza mu nkiko 1026 ziregwamo abantu 1609 banyereje miliyari 40Rw. Muri abo, 1192 bahamijwe ibyaha baregwaga, bategekwa kugaruza miliyari 16,2Frw.

Muri Dosiye 643 zifite agaciro ka miliyari zisaga 3Frw zaburanishijwe zikarangira, ubushinjyacyah bumaze kugaruza miliyoni 413,9Frw mu gihe miliyoni 167,2Frw yatanzwe nk’amande.

Ubwo yakiraga indahiro z’abadepite bashya, Perezida Kagame yavuze ko igihugu kitazihanganira abanyereza umutungo wagakwiye kuzamura abaturage n’iterambere ryabo.

Yagize ati “Bwa mbere ni ukubanza tukabikwereka cyangwa tukumvikana nawe niba ariko bimeze koko kuko. Ntawe dushaka kubeshyera. Nawe ukamera ukavuga uti ‘Nibyo koko’ ibyageze aho byajyaga ni 25%. Icyo gihe tukakubaza ngo 75% byagiye he?” ibyo kutubwira gusa ngo ntago mbizi. Ntabwo bihagije.”

Yakomeje agira ati “Tuzabishakisha dukurikirane, tumenye nibyo utunze mu mazina yawe cyangwa ibyo washyize mu y’abandi tubigarure. Ariko muri uko kubigarura, tuzagira aho tukubika.”

Ingabire asanga ubushinjacyaha bukwiye kujya bugaragaza abanyereje umutungo wa leta


[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza