00:00:00 IGIHE NETWORK KN KINYARWANDA EN ENGLISH FR FRANCAIS

Indimi ebyiri z’u Bwongereza ku baryamana bahuje ibitsina bashobora koherezwa mu Rwanda

Yanditswe na Musangwa Arthur
Kuya 17 May 2022 saa 01:14
Yasuwe :

Ku wa 14 Mata 2022 u Bwongereza bwasinyanye n’u Rwanda amasezerano ateganya ko buzoherezayo abimukira binjiye muri icyo gihugu mu buryo butemewe n’amategeko, guhera ku wa 1 Mutarama 2022.

Ni amasezerano y’imyaka itanu agamije gushakira umuti ikibazo cy’abimukira bajya mu Burayi mu buryo butemewe, babifashijwemo n’abantu babihinduye ubucuruzi bubinjiriza agatubutse.

Ikinyamakuru The Independent cyo mu Bwongereza, mu minsi ishize cyatangaje ko iriya minisiteri mu isesengura yakoze, yemeje ko "hari impungenge" ku buryo abaryamana bahuje ibitsina n’abafite imikorere y’umubiri itandukanye n’igitsina cyabo (LGBTQ+: Lesbian, Gay, Bisexual, Transgender, and Queer or Questioning), bashobora kwakirwamo mu Rwanda.

Muri iryo sesengura ry’ingaruka icyemezo cy’u Bwongereza gishobora kugira, havugwamo ko nubwo izo mpungenge zaba zihari, nta gahunda yo kurobanura bene abo bimukira mbere yo koherezwa mu Rwanda.

Ahubwo ngo "hazaba hari uburyo bwo kubikurikirana", ndetse Guverinoma "izagenzura ibimenyetso byose mu gihe buriya bufatanye buzamara."

Ni amasezerano y’ibanze azamara imyaka itanu, agamije kunganira uburyo butagitanga umusaruro bwo guhangana n’ikibazo cy’abimukira muri iki gihe.

U Bwongereza kandi bwagaragaje ko mu Rwanda, abasaba ubuhungiro bamara igihe kirekire bategereje icyemezo bafatiwe ndetse ngo hejuru ya bibiri bya gatatu barahakanirwa. Mu bashobora guhakanirwa kandi ngo ba LGBTQ+ baba bafite ibyago byinshi, nubwo nta bimenyetso bitangwa.

Hagati aho, ngo usanga bene aba bantu batinya kuvuga kuri Polisi n’izindi nzego ihohoterwa bashobora kugirirwa n’abantu batandukanye, kubera ipfunwe no gutinya guhezwa kurushaho.

Nyamara ku rundi ruhande, Ambasaderi w’u Bwongereza mu Rwanda, Omar Daair, aheruka kubwira itangazamakuru ko nta mpungenge bene aba bantu bakwiye kugira. Hari mu kiganiro n’itangazamakuru cyabaye mu kwezi gushize.

Yavuze ko amasezerano yasinywe hagati y’impande zombi ateganya inshingano za buri ruhande, harimo gucungira umutekano abantu bazaba bimuriwe mu Rwanda.

Yakomeje ati "Ku bijyanye n’abantu b’aba LGBT, ni byo mu Rwanda nta tegeko ryihariye rirengera abantu ba LGBT, ariko itegeko nshinga rirasobanutse, ribuza ivangura iryo ariryo ryose ryakorerwa umuntu ryaba rishingiye ku wo ari we, harimo na ba LGBT."

"Bitandukanye no mu bihugu bimwe byo mu Karere, u Rwanda ntabwo ruhana kuryamana kw’abahuje ibitsina cyangwa abantu ba LGBT, ntekereza ko ari ikintu cyiza kandi hano tugenda tubona ubwiyongere bw’icyizere bw’imiryango ya ba LGBT, ku buryo ari ikintu cyiza."

Ibyo ngo ntibisobanuye ko uburenganzira bwabo mu Rwanda ari nta makemwa, ariko ngo no mu Burayi ni uko, hashobora kubaho ivangura.

Yavuze ko hateganyijwe uburyo bwo kurindira umutekano aba bantu bose bazoherezwa mu Rwanda, kimwe n’abandi baturage nk’uko biteganywa n’amategeko.

Isesengura ry’u Bwongereza kandi ryagaragaje ko hashobora kuzaba impungenge ku Bayisilamu bashobora koherezwa mu Rwanda, mu gihe umubare munini w’Abanyarwanda ari abakirisitu.

Nyamara mu Rwanda hari umuryango mugari w’Abayisilamu bahabwa uburenganzira bwose.

Itegeko Nshinga ry’u Rwanda riteganya ko "ivangura iryo ari ryo ryose cyangwa kurikwirakwiza" byaba bishingiye ku bwoko, ku ibara ry’umubiri, ku gitsina, ku karere, ku byiciro by’ubukungu, ku idini cyangwa ukwemera, ku bitekerezo" n’irindi vangura iryo ari ryo ryose, "birabujijwe kandi bihanwa n’amategeko."

Umuvugizi wa Home Office mu Bwongereza, yanzuye ko "isesengura ry’ingaruka za kiriya cyemezo ryanzuye ko abantu ba LGBT+ badafite ibyago bikomeye byo kuba bahohoterwa."

Yakomeje ati "Ibyavuyemo muri rusange ni uko u Rwanda rutekanye, ari igihugu gituje, gifite amateka ahamye yo gushyigikira abashaka ubuhungiro kandi rukorana na UNHCR yemeje ko ari igihugu gitekanye kandi kirengera impunzi."

Icyiciro cya mbere cy’abimukira bari mu Bwongereza binyuranyije n’amategeko, cyamenyeshejwe gahunda yo kwimurirwa mu Rwanda bijyanye n’amasezerano yasinywe hagati y’ibihugu byombi.

Bitewe n’impamvu zabo zitandukanye, "bafite iminsi 14 yo gutanga impamvu bumva zatuma batoherezwa mu Rwanda" nk’uko umwe mu bayobozi muri Ambasade y’u Bwongereza i Kigali yabitangarije IGIHE.

Mu isesengura ry’u bwongereza kandi bwagaragaje ko impamvu zose zerekana neza ko koherezwa mu Rwanda atari "igihano" ku bimukira, ahubwo bigamije guca intege ibikorwa byo gutwara abimukira mu buryo butemewe, bunateye inkeke ku buzima bwabo.

Ambasaderi w’u Bwongereza mu Rwanda, Omar Daair, aganira n'itangazamakuru mu kwezi gushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .