00:00:00 IGIHE NETWORK KN KINYARWANDA EN ENGLISH FR FRANCAIS

Indege y’igisirikare cya RDC yongeye kuvogera ikirere cy’u Rwanda

Yanditswe na Iradukunda Serge
Kuya 28 Ukuboza 2022 saa 08:53
Yasuwe :

Guverinoma y’u Rwanda yatangaje ko kuri uyu wa Gatatu indege ya Repubulika Iharanira Demokarasi ya Congo yavogereye u Rwanda yinjiriye mu kirere cy’i Rubavu hejuru y’Ikiyaga cya Kivu.

Amakuru dukesha Ibiro by’Umuvugizi wa Guverinoma y’u Rwanda avuga ko iyi ndege yo mu bwoko bwa Sukhoi-25 yinjiye mu kirere cy’u Rwanda, ahagana saa 12h00 ariko ihita isubira muri Repubulika Iharanira Demokarasi ya Congo.

Mu itangazo u Rwanda rwashyize hanze rwavuze ko “iby’uku kwinjira mu kirere cy’u Rwanda kw’indege y’igisirikare ya Repubulika Iharanira Demokarasi ya Congo byahise bimenyeshwa Guverinoma y’iki gihugu.”

Iri tangazo rikomeza rigira riti “Ibyabaye uyu munsi ni igikorwa kimwe kigize ubushotoranyi bumaze iminsi burimo n’ubusa nk’ubu bwabaye ku wa 7 Ugushyingo mu 2022, ubwo indege y’igisirikare ya RDC yinjiraga mu Rwanda ndetse igahagarara gato ku kibuga cy’i Rubavu mbere yo gusubira muri RDC.”

U Rwanda rwavuze ko ibi bikorwa by’ubushotoranyi bikomeje bibangamira ibigenwa n’amasezerano ya Luanda, ndetse ruhamya ko iyi myitwarire ya RDC itizwa umurindi n’amahanga akomeza kugereka k’u Rwanda ibibazo biri muri iki gihugu byose ariko akirengagiza ubushotoranyi gikomeje kurukorera.

Igikorwa nk’iki cyaherukaga kuba mu Ugushyingo 2022, ubwo indege yo mu bwoko bwa Sukhoi-25 nabwo yinjiraga mu kirere cy’u Rwanda ndetse igahagarara akanya gato ku kibuga cy’indege kiri i Rubavu.

Sukhoi Su-25 ni indege z’intambara zakozwe na Leta Zunze Ubumwe z’Abasoviyete guhera muri Gashyantare 1975. Izi ndege zakikorwa n’uruganda rw’Abarusiya rwa Sukhoi, zifite ubushobozi bwo kugenda kilometero 950 mu isaha.

Ku wa Gatatu, tariki ya 30 Ugushyingo 2022, ubwo yakiraga indahiro za Dr Sabin Nsanzimana wagizwe Minisitiri w’Ubuzima na Dr Yvan Butera wagizwe Umunyamabanga wa Leta muri iyo minisiteri, Perezida Paul Kagame yabwiye abaturage bo ku mipaka iri aho u Rwanda ruhana imbibi na Repubulika Iharanira Demokarasi ya Congo, RDC, kuryama ntacyo bishisha kuko umutekano wabo ucunzwe neza.

Ati “Abantu baturiye hafi y’umupaka, bashobora kuryama mu ijoro bazi neza ko bafite umutekano. Bitabaye ibyo, tuzatuma undi muntu arara amajoro menshi adasinziriye.’’

Mu bihe bitandukanye, abasirikare ba RDC bakoze ubushotoranyi ku Rwanda aho bagerageje kwinjira ku butaka bwarwo i Rubavu ariko bagakumirwa batarahungabanya umutekano.

Ibiheruka ni ku wa 19 Ugushyingo 2022, ubwo umusirikare wa RDC yinjiye ku butaka bw’u Rwanda arasa amasasu ane aho Abasirikare b’u Rwanda baba bari ku burinzi hafi ya Petite Barrièrre ariko mu kwirwanaho bakamurasa kuko yari yambutse umupaka uhuza ibihugu byombi nko muri metero 50, yarenze agace katagira nyirako.

Indege y’igisirikare cya RDC yongeye kuvogera ikirere cy’u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .