Minisitiri muri Perezidansi ya Repubulika , Tugireyezu Venantie yamaze gutangariza Abanyarwanda ko ibibazo byugarije imiryango yabo, yo shingiro ry’imibereho y’igihugu aribyo byashyizwe ku isonga mu bizigirwa mu Nama y’Umushyikirano ya 12, iteganyijwe kuwa 18 na 19 Ukuboza 2014.

Mu nama n’abanyamakuru kuri uyu wa kane ku ya 11/12/2014, Tugireyezu yavuze ko nubwo iyi nama izaganirirwamo n’ibindi bibazo, ibibazo byugarije umuryango nyarwanda bizafata umwanya munini kuko iyo umuryango utajegajega aribwo igihugu cyizera ejo hazaza.

Yagize ati “Ibibazo byugarije umuryango tuzabiha umwanya kuko iyo bikemutse, gihugu cyagira abana bazima, abayobozi beza b’ahazaza.”

Minisitiri muri Perezidansi ya Repubulika, Venantie Tugireyezu

Bimwe mu bibazo byugarije umuryango bizaganirwaho, Minisitiri Tugireyezu yavuzemo icuruzwa ry’abana n’ icuruzwa ry’ibiyobyabwenge.

Iyi ngingo y’icuruzwa ry’abantu yanagarutsweho cyane n’umukuru w’igihugu mu bihe bitandukanye muri uyu mwaka, asaba inzego zose kubirwanya kuko abantu badakwiye gucuruzwa nk’amatungo.

Usibye ibibazo byugarije umuryango nyarwanda, umunsi wa kabiri w’iyi nama, ngo uzaharirwa Inama Ngishwanama ya Komisiyo y’Igihugu yo Kurwanya Jenoside (CNLG), ngo ishyireho ingamba zo gukumira no kurwanya Jenoside.

Umuyobozi wa CNLG Jean de Dieu Mucyo yavuze ko Abanyarwanda bazarebera hamwe uburyo bahangana n’abapfobya Jenoside haba mu Rwanda no mu Mahanga.

Mu mushyikirano wa 2013 abaturage babwiye Perezida Kagame akabari ku mutima

Iyi nama y’Umushyikirano ya 12, ifite insanganyamatsiko igira iti “Icyerekezo kimwe twongere imbaraga.”

Biteganijwe ko hazanarebwa urugendo u Rwanda rwanyuzemo nyuma y’imyaka 20 Jenoside yakorewe Abatutsi ihagaritswe, kugira ngo hafatwe ingamba ku buryo ibyagezweho bitasenywa cyangwa ngo igihugu gisubire inyuma.

Tugireyezu yavuze ko iyi nama ya 12 y’Umushyikirano isanze imyanzuro 23 kuri 26 yafatiwe mu yayibanjirije, yarashyizwe mu bikorwa ku kigero kiri hagati ya 80 n’ 100%, naho indi myanzuro itatu ngo yatangiye gukorwaho n’ubwo itararangira.

Imyanzuro itarashyirwa mu bikorwa ni umushinga wo gushyiraho ikigega kizagoboka abagore bari mu kiruhuko cy’ababyeyi bakazajya barihirwa ibyumweru 6 by’umushahara usanzwe ibindi 6 bakarihirwa n’ubwiteganyirize.

Kujyanisha amafaranga agenerwa abari mu kiruhuko cy’izabukuru n’ibiciro byo ku isoko muri iki gihe. No kwishakira ibisubizo bukorerabushake bw’abaturage.

Minisitiri Tugireyezu yatangaje ko ko buri Munyarwanda aho ari hose mu gihugu azakurikirana iyi nama hifashishjwe ibitangazamakuru n’ikoranabuhanga.

Yagize ati“Iyi nama izabera mu cyumba cy’Inteko Ishinga Amategeko, hari urubyiruko 2000 ruzaba ruri muri Petit Stade rurimo abahanze bazahabwa umwanya mu biganiro, abandi basigaye bazakurikirana ibi biganiro kuri radiyo na televiziyo, abandi batange ibitekerezo ku bakoresheje ubutumwa bugufi, abandi bifashishe imbuga nkoranyambaga za twitter na facebook.”

Inama y’igihugu y’Umushyikirano yashyizweho n’Itegeko Nshinga ryo mu mwaka wa 2003 nk’uburyo bwo kwishakira ibisubizo, iba buri mwaka ikaba iyoborwa na Perezida wa Repubulika.

Iy’uyu mwaka izitabirwa n’abaturage 1000 barimo abagize Guverinoma, abayobozi b’inzego z’ibanze, ab’Intara n’Umujyi wa Kigali, abagize Inteko Ishinga Amategeko, Abacamanza, abayobozi b’ibigo, abahagarariye amashyaka ya politiki, abahagarariye amadini n’imiryango itegamiye kuri Leta ndetse n’ abahagarariye Diaspora.