Imwe mu Mirenge Sacco yatangiye gukoresha ikoranabuhanga rizayihuza

Yanditswe na Evariste Nsengimana
Kuya 6 Mutarama 2020 saa 12:19
Yasuwe :
0 0

Ubuyobozi bw’Ikigo cyo guteza imbere amakoperative mu Rwanda (RCA), bwatangije ko ikoranabuhanga rifasha abanyamuryango guhabwa serivisi aho bageze hose mu gihugu ryari rimaze igihe ritegerejwe, ryatangiye gukoreshwa mu Mirenge SACCO imwe n’imwe.

Mu 2014 nibwo Perezida Kagame yasabye ko umushinga wo gutangiza ‘Cooperative Bank’ yagombaga guhuriza hamwe Imirenge SACCO, 416 utangizwa ku buryo bwihuse.

Muri Gashyantare 2015, ikigo FinTech International Limited, cyahawe isoko ry’umushinga wo kuyihuza, gusa imyaka itatu cyari cyahawe yarangiye kitageze ku byateganywaga n’amasezerano y’isoko.

Uyu mushinga wahise ushyirwa mu maboko y’intiti mu ikoranbuhanga z’abanyarwanda, watangiye gutanga umusaruro kuko guhera ku wa 4 Mutarama 2020, nyuma y’amezi arindwi, Umurenge Saccco wa Rutunga waganuye kuri iri koranabuhanga.

Mu kiganiro yagiranye na IGIHE, Umuyobozi Mukuru wa RCA, Prof. Harelimana Jean Bosco, yavuze ko abarikoragaho bari abakozi bo mu bigo bitandukanye byo mu Rwanda.

Ibyo bigo harimo RCA, Minisiteri y’Imari n’Igenamigambi (Minecofin), Ikigo cy’Igihugu gishinzwe Ikoranabuhanga mu Itumanaho n’Isakazabumenyi (RISA).

Ati “Ikigaragara ni uko rigeze ku cyiciro cya nyuma, ryamaze kuboneka. Icyakozwe ni igerageza ku Mirenge SACCO itatu. Umurenge SACCO wa Rutunga umaze iminsi ibiri uri kurikoresha, uwa Gisenyi na Kanombe nibigenda neza irarara irifite, izo nizo zirimo gukorerwaho igerageza.”

Prof. Harelimana yavuze ko nyuma y’iyo mirenge Sacco itatu irimo gukorerwaho igerageza bazahita batangira gukwirakwiza ikoranabuhanga mu yindi yose mu gihugu ariko bikorwe gahoro gahoro.

Ati “Dufite uyu mwaka wose wo kuba twarishyizemo, bikunze uyu mwaka warangira Sacco zose zifite iri koranabuhanga.”

Uyu mushinga RCA ivuga ko bigoye kubona agaciro kawo kuko wakozweho n’abahanga basanzwe ari abakozi mu bigo bitandukanye bya Leta, bakaba barawukoragaho n’ubundi bari mu kazi basanzwe bahemberwa.

Ati “Twarikoze nk’abikorera mu buryo bwo kwishakamo ibisubizo.”

Mu bihe bitandukanye koperative zo kubitsa no kwizigama hirya no hino mu gihugu (Imirenge Sacco) zagiye zivugwaho imikorere idahwitse, bamwe mu bakozi bazo bakanyereza imitungo yazo n’indi mikorere yatumye abanyamuryango bazo bazijujutira ko zibasubiza inyuma aho kubafasha kwiteza imbere.

Prof. Harelimana yavuze ko ikoranabuhanga ari kimwe mu bifasha kunoza imikorere n’ubunyamwuga muri rusange ku buryo ryitezweho gutanga ibisubizo ku mbogamizi zagiye zigaragara mu bihe bitandukanye.

Ati “Rizihutisha serivisi ritume n’aho kwiba byari byoroshye cyangwa imikorere mibi igabanuka kuko urumva ikosa ribaye rihita rigaragara ako kanya kuruta uko wajya kurishakira mu mpapuro bikamara igihe kirekire.”

Si ibyo gusa kuko ngo rizananoza imitangire ya serivisi ku buryo ikintu cyakorwaga n’abantu benshi kandi bigatwara umwanya munini bikorwa mu gihe gito cyane.

Koperative Umurenge Sacco zashinzwe mu 2009 nyuma y’uko leta ibonye ko serivisi z’imari zitagera ku baturage neza nk’uko bikwiye.

Kuri ubu zikorera mu mirenge 416 yo hirya no hino mu gihugu. Umwaka ushize zari zifite abanyamuryango basaga miliyoni 2.7 mu gihe zifite umutungo urenga miliyari 120Frw n’ubwizigame burenga miliyari 60Frw.

Ab'inkwakuzi batangiye kuganura kuri iri koranabuhanga

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza