00:00:00 IGIHE NETWORK KN KINYARWANDA EN ENGLISH FR FRANCAIS

Impuruza ku bujura bwifashishije telefoni: RIB yasabye abantu kugira amakenga (Video)

Yanditswe na Israel Ishimwe
Kuya 13 Mutarama 2023 saa 09:32
Yasuwe :

Umwaka uracyari mu ntangiriro zawo! Imwe mu nama y’ingenzi yo kwitwararika ni ukurushaho kugira amakenga ku byo ubwirwa n’ibyo wizezwa mu kwirinda ko hari abagucucura utwawe waruhiye, ukarara amajoro utagohetse kugira ngo utugereho.

Muri iki gihe, abajura bahinduye umuvuno, bakajije umurego mu butekamutwe by’umwihariko ubukorwa hifashishijwe telefoni.

Akenshi usanga muri ibi bikorwa, umuntu ahamagara undi bikarangira amubwiye ibintu bituma amutwara amafaranga ye, mu buryo atazi cyangwa bitewe no kuba atagize amakenga.

Umuvugizi w’Urwego rw’Igihugu rw’Ubugenzacyaha, RIB, Dr Murangira B. Thierry, yifashishije imibare yabwiye IGIHE ko ubu butekamutwe bugenda bwiyongera ndetse bikaba bigaragarira mu birego bitangwa.

Yagize ati “Ubwambuzi bushukana hifashishijwe telefoni guhera mu 2020 kugera mu 2022, twakiriye ibirego 667, zirimo 135 zo mu 2020, mu 2021 [247] na 285 zo mu 2022.’’

Yakomeje agaragaza ko uko ibirego bitangwa byiyongera ari na ko amafaranga yibwa abaturage na yo aba menshi.

Ati “Muri izi dosiye gusa hibwemo arenga miliyoni 38 Frw. Ayo mafaranga si make kandi ntibikwiye kwemerwa.’’

Ubu bujura bukorerwa ab’ingeri zose barimo n’abasobanutse kandi bize kuko amayeri akoreshwa yabaye menshi ku buryo buri wese ‘atabaye maso’ ngo agire amakenga bishobora kumugeraho.

Yakomeje ati “Isesengura RIB ikora isanga kenshi aba bantu bakina n’amarangamutima y’abantu bashaka kwiba.’’

Ibi babikora bakangisha abantu kubafungira Sim Card zabo cyangwa se bakifashisha ibyuho bishobora kuba biri mu ikoranabuhanga ry’ibigo by’itumanaho cyangwa iby’imari.

  Amayeri mashya abantu bakwiye kumenya

Ubusanzwe amayeri amenyerewe ni aho abatekamutwe bahamagaraga ababyeyi bababwira ko abana babo bagiriye ikibazo ku ishuri, abababwira ko batomboye n’andi magambo atuma umuntu ashiduka yatanze amafaranga atashishoje.

Dr Murangira yavuze ko kuri ubu basigaye bakora nk’itsinda aho umwe aguhamagara akubwira ko watomboye, undi agahita aguhamagara akubwira ko umwana yagiriye ikibazo ku ishuri, bagamije kugutesha umutwe.

Ati “Abo bose kuko amayeri yabo aba azwi, hahita hahamagara undi muntu mu ijwi ryitonze akubwira ko ari umukozi w’Ikigo cy’Itumanaho. Akabanza kugutera ubwoba akubaza impamvu ngo uvugana n’abajura; akakubwira ko agiye gufunga SIM Card yawe. Akagutegeka ibyo ukora ngo abajura batakwinjirira. Iyo amaze kugutwara amafaranga, akubwira kuguma ku murongo ku buryo utanashobora kwisubiza amafaranga cyangwa kuyahagarika hanyuma akaza kukubwira ko wavuganaga n’abajura.’’

  Inama ku cyacogoza ubujura bwifashishije telefone

RIB ivuga ko hakozwe byinshi ariko hari ibikeneye kunozwa ahanini bishingiye ku gukosora no kuziba ibyuho birimo ibishingiye ku bumenyi buke bw’abaturage mu by’ikoranabuhanga no kutagira amakenga; kwandikisha Sim Card cyangwa uburyo zibonekamo; guhabwa nimero nshya mu gihe indi yibwe; gufunguza konti muri banki mu buryo bw’iyakure n’amakuru y’abantu yandagaye aho usanga imyirondoro y’abantu ishobora kuboneka byoroshye, ukaba wabaruza nimero ya telefone ku indangamuntu y’undi muntu ukajya uyifashisha ukora ibyaha.

Dr. Murangira yavuze ko hari ibikwiye gukorwa n’ibigo by’itumanaho kugira ngo ubujura bucogozwe.

Ati “Umuti ukwiye gushakirwa mu kongera kubarura Sim Card buri wese bikajyanishwa n’indangamuntu ye, bagafata n’ibimenyetso birimo ibikumwe n’amafoto (fingerprint, biometris). Icya kabiri bakwiye gushyiraho uburyo niba hari ushatse kukubaruzaho Sim Card utabizi, ubona ubutumwa kuri telefoni yawe ya mbere, niba ari iyawe ugakanda ubyemeza. Gukuraho Sim Card y’umuntu witabye Imana kuko byagaragaye ko zimwe zifashishwa mu gukora ibyaha.’’

Yavuze ko ibigo by’imari na byo bikwiye kubaka ikoranabuhanga ryizewe kandi ritanga umutekano ku buryo igihe hari umuntu ushaka gufungura konti muri banki akoresheje bwa buryo bw’iyakure; banki yajya imenya ko uwafunguye ko yakoresheje ibyangombwa bye koko. Ikindi ni uko igihe habaye ho Sim Swap konti ya Mobile Money yajya yitandukanya na konti yo muri banki (automatic disconnection) igihe izo konti zombi zahujwe.

Yakomeje ati “Hari aho twakurikiranye tugasanga indangamuntu yakoreshejwe mu gufungura konti ni iy’umuntu wapfuye mu myaka itanu ishize ariko ugasanga konti yafunguwe mu mezi abiri ashize. Aho na ho hari icyuho mu buryo konti zifunguzwamo.’’

Bitewe n’imiterere y’ubujura bugezweho bwifashisha telefone abantu bakwiye kuba maso, bakagira amakenga kugira ngo birinde kwibwa.

Dr. Murangira yaburiye abantu bishora mu bujura bakoresheje telefoni ko “nubwo hari ibyo byuho, bitinde bitebuke barafatwa bakabiryozwa.’’

Ati “Ntushobora kwicara hariya ngo wumve ko uzatungwa no kwihesha ibintu by’abandi, uzatungwa n’ubujura nta mwanya bafite. Nubwo hari ibyuho ariko barafatwa.’’

Itegeko risobanura ubu bujura bwifashishisha telefoni babeshya abantu nko Kwihesha ikintu cy’undi hakoreshejwe uburiganya (Escroquerie). Iki cyaha gihanwa n’ingingo ya 174 ivuga ko umuntu wese wihesha umutungo w’undi, imari ye yose cyangwa igice cyayo mu buryo bw’uburiganya yiyitiriye izina ritari ryo cyangwa umurimo adafitiye ububasha cyangwa akizeza icyiza cyangwa agatinyisha ko hari ikibi kizaba, aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka ibiri ariko kitarenze imyaka itatu n’ihazabu y’amafaranga y’u Rwanda atari munsi ya miliyoni 3 Frw ariko atarenze miliyoni 5 Frw.

Umuvugizi w’Urwego rw’Igihugu rw’Ubugenzacyaha, RIB, Dr Murangira B. Thierry, yashimangiye ko abantu bumva ko bazabeshwaho no kwihesha iby'abandi bakoresheje uburiganya batazigera bihanganirwa

Camera: Munyakazi Emile

Editing: Iraguha Jotham


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .