00:00:00 IGIHE NETWORK KN KINYARWANDA EN ENGLISH FR FRANCAIS

Impumeko y’abanyarwanda ku nama ya CHOGM ibura iminsi mike

Yanditswe na Ntabareshya Jean de Dieu
Kuya 15 June 2022 saa 09:05
Yasuwe :

Mu gihe habura iminsi mike ngo inama ihuza abakuru b’ibihugu na za Guverinoma bigize umuryango w’ibihugu bikoresha ururimi rw’Icyongereza, iteganyijwe kubera mu Rwanda ibe, Abanyarwanda mu ngeri zitandukanye bakomeje imyiteguro.

Ni inama yitezweho kuzitabirwa n’abatari bake by’umwihariko abakuru b’ibihugu na guverinoma zitandukanye bo mu bihugu 54 b’ibinyamuryango bya Commonwealth.

Iyi nama yiteguwe n’Abanyarwanda mu nguni zose z’iterambere cyane ko yakunze gusubikwa igihe kinini bitewe ahanini n’icyorezo cya Covid-19 cyakomeje kugenda kiba kidobya kuri iyo nama.

Kugeza ubu biteganyijwe inama ya CHOGM 2022 izaba mu cyumweru gitaha, ikaziga ku ngingo zitandukanye zirimo izihangayikishije Isi muri iki gihe no gushakira hamwe ibisubizo birambye ibyo bibazo bihari birimo iby’intambara, ubukungu, ubushomeri mu rubyiruko, ibyorezo ndetse n’ibibazo bifitanye isano n’ihindagurika ry’ikirere.

Mu bihe bitandukanye urwego rw’igihugu rushinzwe iterambere rwagiye rugararariza abashoramari n’abantu batandukanye amahirwe ahari mu kuba u Rwanda rugiye kwakira iyi nama mu minsi ya vuba.

Uretse kwereka abantu amahirwe ahari mu bihe bitandukanye bigendanye ahanini n’ibyo bakora, byanajyanye no guhugura abakora imirimo inyuranye ibigendanye n’imitangire inoze ya serivisi, kongererwa ubumenyi nk’abakora muri Hotel no gukarishya abamotari bagatozwa imikorere iboneye.

Umuvugizi wungirije wa Guverinoma Mukurarinda Alain aheruka gutangaza ko nibura mu bantu babarirwa mu bihumbi bitanu na bitandatu bazayitabira bashobora nibura buri umwe gukoresha 1500$ mu gihe cy’icyumweru bivuze ko yaba ari amafaranga atari make baba basigiye igihugu.

Icyo gihe yagize ati “Kandi $1500 niyo make ubwo, twavuze ayo yakoresha muri hoteli kurya no kuryama, ntabwo tuvuze guhaha. Ubwo rero urumva ibyo CHOGM izazana byo ni byinshi kandi inyungu u Rwanda rufite mu kwakira iyi nama ntabwo zibarika.”

Abanyarwanda bariteguye?

Umuyobozi w’Agateganyo w’Ishami ry’Ubukerarugendo muri RDB, Ariella Kageruka, aheruka gutangaza ko CHOGM 2022 izaba igikorwa kidashingiye ku kwicara mu nama gusa, ahubwo izatanga amahirwe ku bayitabiriye basohoke, bamenye igihugu.

Ubuyobozi bw'Umujyi wa Kigali bugaragaza ko ibikorwa remezo bya ngombwa ngo CHOGM ibe byamaze kuboneka

Hirya no hino mu gihugu, ubona ko imirimo irimo kubaka imihanda no kuvugurura ibikorwaremezo mu rwego rwo kwitegura inama ya CHOGM.

Ntabwo ari ku gihugu gusa kuko n’abaturage bo mu bice bitandukanye by’Umujyi wa Kigali baganiriye na IGIHE bagaraje ko biteguye neza inama ya CHOGM cyane ko bayitezeho byinshi.

Abacuruzi bo mu bice bitandukanye, abaturage batuye mu bice binyuranye by’Umujyi bagarutse ku bintu by’ingenzi biteze kuri iyi nama ya CHOGM by’umwihariko aho biteganyijwe ko abazayitabira bashobora kuzatemberera.

Umunyamakuru wa IGIHE yazengurutse mu bice bitandukanye by’Umujyi wa Kigali aho imirimo yo kwitegura iyi nama ya CHOGM 2022 irimbanyije.

Abaturage bo mu Biryogo, mu Murenge wa Nyarugenge mu Karere ka Nyarugenge ahaherutse kugirwa Car Free Zone, hasohokera abantu b’ingeri zinyuranye baganiriye na IGIHE bagaragaje ko biteguye iyi nama.

Harabura iminsi mike ngo inama ya CHOGM itangire, imihanda ikomeje gutunganywa

Irizabimbuto, Umukozi muri Visit Rwanda Biryogo, yabwiye IGIHE ko biteguye neza kwakira abazitabira inama ya CHOGM bashobora kuzatemberera muri aka gace kahindutse ak’ubukerarugendo.

Ati “Mu Rwanda tuzwiho umuco wo kwakira abantu neza, rero nta mwihariko uhari nk’uko bisanzwe tuzakomeza tubakire neza kuko ari umuco wacu. Uzaza muri ya minsi irindwi bazamara bizamutera kugaruka agaruwe no gutembera u Rwanda.”

Yagaragaje ko kugeza bari mu myiteguro yo kurushaho kuzagararaza ishusho nziza y’u Rwanda cyane ko rumenyerewe mu kwakira na yombi abarutembereramo.

Ati “Nk’abacuruzi twiteze ko nitwakira abatugana neza ndetse n’ibyo tubakirije bikaba byujuje ubuziranenge, tuzunguka mu buryo nka butatu burimo kuzamura ishusho y’igihugu, kwagura ishoramari ryawe ndetse n’inyungu iziyongera.”

Habumugisha Cedric yagaragaje ko nk’urubyiruko bizeye ko iyi nama izazana ibisubizo ku bibazo birwugarije birimo ubushomeri n’ibindi bikibangamiye sosiyete kugeza ubu.

Yakomeje agira ati “Urebye iyi ni inama iba ikomeye cyane, tuyitezeho n’iterambere kuko tuzabona ku madevize urumva ko tuzunguka byinshi cyane. Kwakira abayobozi bizadusigira inyungu nyinshi cyane.”

Biteganyijwe ko uretse inama izahuza abakuru b’ibihugu, indi nama ikomeye ni izahuza abacuruzi, Commonwealth Business Forum. Hari kandi izahuza abagore, urubyiruko, izahuza abaturage izwi nka People’s Forum, ihuriro ry’abanyabugeni n’imikino itandukanye.

Inzego zitandukanye zakunze kugenda zisaba abaturage by’umwihariko abacuruzi cyane abikorera kuzitabira inama, imikino n’ibindi biteganywa no kuba abafatanyabikorwa kugira ngo CHOGM izagende neza.

Abacuruzi kandi basabwa kuzatanga serivisi nziza maze abazitabira inama bakanyurwa,.

Imyiteguro irakomeje, i Kigali hashyizwe n'ikibumbano gishya kiri mu ishusho y'ingagi
Imwe muri iyi mihanda yamaze kuzura
Imihanda iri kubakwa amanywa n'ijoro. Uyu ni umuhanda uva kuri Ambasade y'Amerika mu Rwanda umanuka Kacyiru
Imihandi iri kubakwa ubutitsa, indi igasanwa mu gihe habura iminsi mike cyane ngo CHOGM ibe
Ikirararo cyo mu Kirere cya Kicukiro nacyo cyatangiye kunyurwaho n'imodoka
Abanya-Kigali batandukanye babonye akazi mu bikorwa byo kwitegura CHOGM

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .