Ikorwa ry’uyu muhanda uzahuza imirenge itandatu ikora ku Kiyaga cya Kivu, ni igikorwa cyashimishije abatuye akarere ka Rutsiro n’abakunze kuhatemberera, by’umwihariko abahafite ibikorwa by’ubucuruzi, n’amahoteli.

Aba bashoramari bahuraga n’ibihombo kubera ko uyu muhanda utari nyabagendwa.

Rutsiro ni akarere k’imisozi miremire gakunze kwibasirwa n’ibiza. Akenshi wasangaga ibiraro byo kuri uyu muhanda byaracitse, ahandi ugasanga amazi anyura muri uyu muhanda yarawangije bikabangamira ubuhahirane n’imigenderanire hagati y’abatuye iyi mirenge n’abayisura.

Umuhanda Mushububati-Nkomero-Nkora uhuza imirenge ya Mushubati, Gihango, Boneza, Mushonyi, Musasa na Kigeyo bivuze ko uzanyura mu mirenge itandatu muri 13 igize Akarere ka Rutsiro.

Imirenge uyu muhanda unyuramo ni imirenge yiganjemo abakora imirimo y’ubuhinzi n’ubworozi, abacuruzi n’abanyamahoteli.

Uzagabanya ibihombo

Abafite ibikorwa by’ishoramari mu mirenge uyu muhanda bishimiye ikorwa ryawo, bavuga ko kuba utari ukoze byateraga igihombo mu bijyanye n’ubwikorezi bw’ibicuruzwa.

Kubwimana Chrisologue ufite uruganda rwa kawa na hoteli mu murenge wa Boneza mu karere ka Rutsiro, yabwiye IGIHE ko mu byo biteze kuri uyu muhanda harimo kwihutisha iterambere ry’ubuhinzi n’ubukerarugendo.

Ati “Aka gace ko ku nkengero za Kivu kabamo ikawa, kabamo nubwo bukerarugendo. Umuhanda rero uje wari utegerejwe rwose turawukeneye”.

Kubwimana avuga ko kugira ngo apakire toni 10 za kawa byamusabaga kuzipakira inshuro enye kuko ikamyo itashoboraga kugera ku ruganda rwe rutunganya umusaruro wa kawa.

Ati “Ni igihendo, ni ibintu byaduhombyaga. Ku kilo kimwe kugira ngo kigere mu ikamyo hiyongeragaho ikiguzi cy’amafaranga 20Frw y’umwikorezi”.

Uyu muhanda biteganyijwe ko uzashamikiraho undi wa kaburimbo uzagera ku mwaro w’ikiyaga cya Kivu, ahari umucanga ukundwa na ba mukerarugendo n’ amahoteli afite ibyumba birenga ku 100.

Musabyimana Alex ufite ibikorwa by’ubucuruzi mu isantere y’ubucuruzi wo ku ishusho mu kagari ka Bushaka mu murenge wa Boneza, yavuze ko yavaga kurangura yagera mu Nkomero imodoka ikabipakurura akabitwara ku magare.

Ati “Nta modoka yatugezagaho ibicuruzwa kubera umuhanda mubi. Ibicuruzwa iyo bigeze hano birahenda kubera ko biba byagiyeho ikiguzi kinini cy’ubwikorezi. Nk’urugero umufuka w’umuceri wakagombye kugura ibihumbi 30 Frw, iyo ugeze hano ugura ibihumbi 32 Frw”.

Musabyimana ucuruza ibicuruzwa birimo ibiribwa, ibiryamirwa n’imyenda avuga ko uyu muhanda numara kuzura, ibihombo bahuraga nabyo bizagabanyuka.

Ati “Icyifuzo dufite ni uko wakorwa vuba ukarangira kuko turawukeneye cyane kandi tumaze igihe kinini tuwutegereje”.

Umuyobozi w’Akarere ka Rutsiro, Kayitesi Dative yabwiye IGIHE ko ikorwa ry’uyu muhanda ari amahirwe akomeye kuko ari akarere kera, gasurwa na ba mukerarugendo ari ko katari gafite imihanda ihagije.

Ati “Uyu muhanda ni igisubizo ku mugezi wa Koko wari umaze iminsi utwara abantu. Ni amahirwe ko hagiye guca umuhanda wa kaburimbi kiriya kiraro kigagorwa”.

Uyu muhanda aho uzakatira werekeza ahazubakwa icyambu cya Nkora hasanzwe haremera isoko nyambukiranyamipaka, haba hasigaye ibirometero bitageze kuri bitatu ngo ugere ku gice cyubatseho amahoteri y’abashoramari.

Meya Kayitesi avuga ko uwo muhanda ujya ku mahoteri nawo uri gukorerwa inyingo kugira ngo uzagendanye n’uyu watangiye gukorwa birangirire rimwe.

Ati “Icyo dusaba abatuye aho uyu muhanda uzanyura ni ugusigasira ibyagezweho. Uyu muhanda bakazawukorera isuku bakanawubungabunga kuko ni igikorwa cy’iterambere cyiza cyane rero bakwiye kuzawurinda ikintu cyose gishobora kuwangiza”.

Uyu muhanda biteganyijwe ko uzaba wuzuye bitarenze ukwezi kwa Kane umwaka utaha wa 2025, ukababa uzatwara ingengo y’imari ya miliyari 19Frw.

Imirimo yo kubaka umuhanda Mushubati-Nkomero-Nkora irarimbanyije

Uyu muhanda uzohereza abarwayi bakenera kujya kwivuza ku bitaro bya Murunda

Ibicuruzwa byagendaga ku magare kubera ko umuhanda utari mwiza

Abacuruzi bavuga ko uyu muhanda niwuzura batazongera kugorwa no kugezwaho ibicuruzwa baranguye