00:00:00 IGIHE NETWORK KN KINYARWANDA EN ENGLISH FR FRANCAIS

Impinduka zigaragara mu mihanda y’i Kigali nyuma y’uko Camera n’ibyapa bya ‘40’ birikoroje

Yanditswe na Ntabareshya Jean de Dieu
Kuya 8 April 2022 saa 12:06
Yasuwe :

Mu minsi yashize, imwe mu ngingo zavugishije Abaturarwanda ni ijyanye n’amategeko y’umuhanda by’umwihariko ibyapa na camera zishinzwe umutekano.

Icyo gihe abakoresha umuhanda bagaragazaga ko bandikirwa umuvuduko biturutse no ku kuba ibyapa byarangaga umuvuduko wemewe aho hantu wasangaga bidakurikizwa kuri Camera zahashyizweho.

Ubwo yari ari mu muhango wo gushimira abasora wabaye tariki ya 19 Ugushyingo 2021, Perezida Kagame yavuze ku kibazo cyari kimaze iminsi kijyanye n’amande akomeye abantu bakwaga.

Yagize ati “Njya mbibona ku mbuga zihana amakuru, hari ibyo maze iminsi mbona. Abantu mwese muri hano uko mwaje, abenshi mwari mutwaye imodoka, ubanza mwaje musora inzira yose kugera hano.”

Perezida Kagame yavuze ko yabonye abantu bitotomba, binubira ko umuvuduko w’imodoka watumye benshi bahanwa bazira kuba bararengeje uwagenwe.

Ati “Baravuga ngo ntawe uhumeka, abantu bagenda batanga amafaranga, uwarengeje ibilometero ubanza ari nka 40 ku isaha, uwo muvuduko ubanza ari nk’uwo bamwe mu bamenyereye kugendesha amaguru tugenda.”

Nyuma y’iminsi mike mu Mujyi wa Kigali hahise hatangira inkundura yo guhindura ibyapa, aho byari bishinze nabi n’ahari hari ibiranga ko umuvuduko ntarengwa ari 40/km bihindurwa ku wa 60/km uretse mu nsisiro.

Ntabwo bisobanuye ko umuvuduko wa 40/km mu Mujyi wa Kigali wavanyweho nk’uko bamwe babitekereza ariko ibyo byapa byaragabanyijwe cyane ugereranyije n’uko byari bimeze.

Ibyapa by’umuvuduko wa 80/Km bisigaye biboneka muri Kigali

Mu mpinduka zakozwe zikomeye mu muhanda harimo no kongera ibyapa bibuza, ibyapa ndaga n’ibiburira.

Ibi byafashije abakoresha umuhanda kumenya kuwitondera cyane ko mbere hariho ibyapa bibereka ibibujijwe n’ibyemewe.

Ntibyari bisanzwe ko mu Mujyi wa Kigali haboneka ibyapa byinshi biranga umuvuduko bya 80km/h.

Ibi byapa bya 80/Km ntabwo biri hose ariko mu mihanda irambuye nk’i Gahanga birahari.

Bamwe mu bakoresha uyu muhanda bagagaza ko impinduka zakozwe zabagiriye umumaro cyane ko byabadindizaga mu rugendo ariko ubu bisigaye byoroshye.

Bimwe mu byapa byahinduwe byari bifite umuvuduko wa 40/km harimo ibyari biherereye i Gikondo-Merezi na Gikondo kuri Rond Point uva ku i Reberero.

Hari Kandi icyapa cyo ku Muhima urenze kuri Feu rouge ugana i Nyabugogo hashyizweho icyapa cya 60/km ndetse n’ikiri ku muhanda ugana ku Kinamba hafi n’urusengero rw’Abadiventiste b’umunsi wa karindwi.

Hari bamwe batekerezaga ko ibyapa bya 40/km byakuweho ariko si ko biri kuko nko mu muhanda wa Kacyiru ugeze kuri za Minisiteri hari bene icyo cyapa, mu marembo y’icyicaro gikuru cya Polisi ndetse no ku muhanda hafi n’amasangano y’umuhanda uva Kacyiru, UTEXRWA no ku Gisozi kirahari.

Uretse aha kandi no muri ya mihanda mito yo mu ifasi ni ukuvuga imihanda yinjira mu bice bituwemo hafi ya yose usanga hariho ibyapa bya 40/km.

Umwe mu batwara ibinyabiziga waganiriye na IGIHE yagize ati “Mbere twabonaga gukoresha umuvuduko wa 40/km bigoye cyane kugenda mu muhanda. Ahanini byanagiraga ingaruka ku bijyanye n’urujya n’uruza kuko abantu batabashaga kwihuta. Wasangaga bakwandikira buri kanya ukabona ko bigoye.”

Kugeza ubu impinduka nyinshi zakozwe mu buryo bwo kongera gushinga ibyapa ahantu hanyaho, byatanze umusaruro kuko byagabanyije abantu birirwaga bijujuta ku mbuga nkoranyambaga no mu itangazamakuru.

Ntitwakirengagiza kandi ko gukoresha umuvuduko ugereranyije nabyo byagize uruhare mu kugabanya imibare y’abahitanwaga n’impanuka zo mu muhanda nk’igisubizo cyo kugendera ku muvuduko uringaniye.

Inzobere mu bijyanye no gutwara ibinyabiziga, Andrei Gromyko, yavuze ko nubwo hakozwe impinduka mu mihanda hakiri ibyapa biteye mu buryo butubahirije amategeko y’umuhanda.

Yagaragaje ko guhindura ibyapa gusa bitari bihagije kuko hari n’ibyakuweho bigahita bisimbuzwa nyamara byari bisanzwe bishinzwe mu buryo butubahirije amategeko atanga nk’urugero ku cyapa gishinze ku Muhima ku muhanda ugana ku Kinamba.

Yavuze ko kugira ngo amavugurura yo mu muhanda akorwe mu buryo bunoze, bikwiye guhabwa umwanya kandi ko bitakorwa n’umuntu umwe cyangwa urwego rumwe ahubwo bisaba itsinda ry’abantu bavuye mu nzego zitandukanye ariko babifitiye ubumenyi bwimbitse.

Ibyapa bya 60 byasimbuye ibya 40 ahantu henshi muri Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .