Impamvu zibumbatiye ubwiyongere bwa gatanya mu muryango Nyarwanda

Yanditswe na Iradukunda Serge
Kuya 30 Kanama 2020 saa 04:28
Yasuwe :
0 0

Buri munsi abayobozi b’igihugu, ab’amadini n’ab’imiryango itegamiye kuri Leta ntibasiba kugaragaza ikibazo cy’uko umubare w’abashakanye batandukana ugenda urushaho kwiyongera ari nako bishyira ahazaza h’umuryango nyarwanda n’ah’igihug mu kaga.

Kuba gatanya zirushaho kwiyongera ni ibintu binagaragazwa n’Imibare y’Ikigo cy’Igihugu gishinzwe Ibarurishamibare (NISR).

Muri Raporo NISR yashyize hanze yitwa ‘Rwanda Vital Statistics Report 2019’ yagaragazaga ko mu 2019, imiryango 8941 mu Rwanda yemerewe n’inkiko gutandukana, ni imibare yazamutse cyane kuko mu 2018 hari hatanzwe gatanya 1311, ni ukuvuga ko zikubye inshuro 6.8.

Umugenzuzi Mukuru w’iyubahirizwa ry’Ihame ry’uburinganire n’Ubwuzanye mu Rwanda, Rose Rwabuhihi avuga ko hari impammvu nyinshi zihishe inyuma y’ubu bwiyongere bwa gatanya mu Rwanda kandi zikaba zacyemuka gusa igihe abitegura gushakana bagize umwanya uhagije wo kuganira ku bintu by’ingenzi urugo rwabo ruzubakiraho.

Uko abagiye kubana bamenyana n’ibyo baganira

Rose Rwabuhihi yavuze ko ibibazo bigaragara mu ngo z’uyu munsi biziganisha kuri gatanya bituruka mu buryo abazubaka baba baramenyanye, ndetse ntibagire n’umwanya wo kuganira ku bintu by’ingenzi urugo rwabo ruzagenderaho.

Yagize ati “Ikibazo gihari mu bato murahurira mu kabari, murahurira mu nzira no kuri Twitter, sinshaka ngo dusubire mu bya kera ngo utume so ku kurebera ariko ni abakundana bangahe bajya kurushinga bakabanza kwicara hasi ngo baganire ibibazo by’ingenzi, ngo ubanze umubaze uti ‘ese uzemera kwicara mu rugo gusa ko njye nshaka ko uzajya wicara gusa ukambyarira abana akubwire ati ‘reka reka’ umureke hakiri kare.”

Rwabuhihi yavuze ko abasore n’inkumi b’uyu munsi bahera mu kuganira ibiganiro by’urukundo bakibagirwa kuvuga ku bibibazo bishobora kuzabo igihe bazaba bashakanye.

Ati “Mu byo mwishimishamo byose ni mugaruke ku bibazo muzahura nabyo kuko ntabiriho bitungurana bitazwi. Muganire ku kibazo cyo kurera abana, muganire ku kibazo cy’uburinganire umubaze uti ‘ese ubundi uremera ko njye nawe turi kimwe’ amenye umuntu ajyanye nawe niba mu mutwe we aziko aje kumukorera, kumusarira no kumumesera amasogisi.”

“Tuzi n’abakobwa bavuga ngo ntantunze neza, ntangurira imyenda n’imodoka mubyumvikaneho hakiri kare. Mwumve ko muhuje imitekerereze niba wowe ufite kumva ko umugabo ari hejuru wumve ko abyemeye, niba nawe yumva ko akwiye kwicara umugabo akamuzanira byose wumve ko nawe ubyemeye.

Ibihe byarahindutse abantu barinangira

Zimwe mu mpamvu Rwabuhihi avuga zitera kuba uyu munsi haboneka gatanya nyinshi ugereranyije na mbere ni uko imibereho yahindutse ariko abantu bo ntibashake kubyumva bakifuza ko byakomeza kumera nka mbere.

Ngo kera inshingano zabaga zigabanyije ku buryo umugabo yabaga afite ibyo akora umugore nawe akagira ibyo akora kandi ntihagire ubangamira gahunda z’undi.

Kuba kuri ubu inshingano z’abagore zarahujwe n’iz’abagabo bituma buri umwe atabasha kuzuza za nshingano yagiraga kera.

Ati “Inshingano zari zigabanyije mu buryo bworoshye ariko ubuzima bwarahindutse ubu urabyuka mu gitondo ujya ku kazi n’umugore wawe akabyuka ajya ku kazi. Nta kuntu izo impinduka zitagira ingaruka, mutabishyizemo ubushake bwanyu n’ubwumvikane nta kuntu ibyo bintu bitatera ibibazo kubera ko hahandi natahaga nka ruhuka ndasanga umuntu nawe unaniwe nkanjye.”

Yakomeje agira ati “Ha handi umuntu yabaga yasigaye inyuma agatoragura utwenda tw’umwana agashyira ibintu ku murongo urasanga ibyo bidahari. Ikibazo ni bya bindi twarerewemo dushaka kugira ngo dukomeze kandi u Rwanda rw’uyu munsi rutabitwemerera kuko uburinganire ni ukuvuga ngo buri muntu wese uramuha amahirwe.”

Rwabuhihi avuga ko uku kugira akazi kenshi bituma hari bimwe uruhande rumwe rutuzuza. Ati “Ntabwo uzamubonamo bya bintu byose wari unyitezemo kubera ko imirimo yambanye myinshi.”

Gukoresha umutungo nabi no kutagira gahunda ngenderwaho

Indi impamvu ngo iri ku isonga mu gutuma ingo z’uyu munsi zisenyuka ni ugukoresha umutungo w’urugo nabi ndetse no kuba ingo nyinshi zitagira gahunda zigenderaho bigatuma abashakanye hari aho bagongana kandi bitari ngombwa.

Ati “Ikindi gikunda kuzana amakimbirane ni ugucunga umutungo gutandukana kwinshi kuraba kubera imicungire y’umutungo kuvuga ngo umutungo njye ndawukoresha uko nshaka undi nawe akavuga ati ndawukoresha uko nshaka. Ntutekereze ko mugomba kumvikana uburyo uwo mutungo ugomba gukoreshwa.”

“Ntabwo uzamara amafaranga ugura imideri igezweho, ntabwo uzamara amafaranga ugura imodoka zigezweho ngo wibagirwe ko ejo abana bazajya kwiga.”

Ikindi Rwabuhihi ashyira mu majwi gisenya ingo z’uyu munsi ni ukutagira gahunda abashakanye bagenderaho ngo umwe naba ari gukora iki undi abe akora kiriya.

Yavuze ko abashakanye bakwiye kumva ko gupanga gahunda yo kugenderaho bitaba mu kazi gusa.

Ati “Kuki mu rugo mutagira gahunda? Mwari mwicara ngo mupange umunsi wanyu ngo wicare umubwire ati njye uyu munsi ndava ku kazi saa mbili, nimvayo ndanyura mu isoko mpahe nawe akubwire ati “ ntacyo ubwo ujya guhaha nanjye ndataha kare nite kubana, ariko nimutabyitaho uzataha akubaze niba waguze umugati w’abana ubundi murwane mupfa umugati.”

Yakomeje agira ati “Ikintu cyo gupanga abirabura tuzi ko bikorwa mu kazi gusa ariko no mu rugo ningombwa.”

Kubura ubujyanama

Rwabuhihi avuga ko kimwe n’ubu, kuva kera abashakanye batashoboraga kubura aho batumvikana ariko bagafashwa n’inshuti n’imiryango mu gukemura amakimbirane bakongera bakabana neza, agatotsi bari bafite mu mubano wabo kakavamo.

Kimwe mu bitera gatanya kwiyongera mu ngo zishingwa muri iyi minsi, Rwabuhihi avuga ko harimo no kubura ababafasha gukemura amakimbirane yabo bitewe n’uko uyu munsi abantu babaye ba nyamwigendaho, ndetse no kuba abagiye kubana bahitamo nabi abakabagiriye inama.

Yagize ati “kera amakimbirane yo mu ngo yakemurwaga n’indi miryango cyane cyane ababyeyi n’abaturanyi ubu ushobora kuba utuye ahantu ariko utazi umuntu numwe, rero ntabwo wifuza kujya guhamagara kanaka mutaziranye ngo aze kumva ibibazo by’umuryango.”

Yakomeje avuga ko abagiye kubana bahitamo nabi abakabagiriye inama. Ati “Kera abantu bagiraga ba Parrain na Marraine babakurikirana bakababwira akaba yanaguhanura atarinze kujya kwa so cyangwa kwa nyoko.”

“Ariko ubu parrain ni uwo mureshya ni uwo munganya umubyimba, ni uwo musokoza kimwe. Parrain ntacyo akivuze ni uwo kugira ngo mugaragare neza ko mwambaye amakote, ko mureshya, ko muberewe ntabwo ari wa muntu uvuga uti yazambera parrain akangira inama kuko afite urugo rwiza.”

Rwabuhihi yavuze ko nta buryo ushobora gushaka Parrain cyangwa Marraine b’abasore n’inkumi ubitezeho inama zo kubaka urugo kandi nabo ntarwo bagira.

Zimwe mu zindi mpamvu Rwabuhihi ashyira mu majwi mu gutuma abashakanye barushaho gutandukana harimo ubusinzi, kujya mu bagore kw’abagabo n’abagore bajya mu bagabo no kutubahana kw’abashakanye, agaheraho asaba abagiye kurushinga kwicara hasi bakaganira ku buzima bw’urugo bashaka gushinga kandi bakarangwa no kwihanganirana.

Ubuyobozi bw’igihugu burasabwa iki ?

Uretse kuba gatanya zigira ingaruka kuri ba nyirazo zinahungabanya igihugu kuko umuryango uba uri gusenyuka kandi ariwo cyubakiyeho.

Rose Rwabuhihi avuga ko kimwe n’uko ubuyobozi bw’u Rwanda rushishikariza urubyiruko kwihangira imirimo no guhanga udushya, bakwiye no kurwibutsa ko aribo babyeyi b’ejo bakabafasha kwitegura izo nshingano binyuze mu biganiro bitandukanye bahuriramo n’urubyiruko.

Ati “Dukwiriye gufasha urubyiruko kugira ngo rwumve inshingano zarwo mu gushinga urugo. Dukunda kubabwira cyane inshingano zabo mu kubaka igihugu ariko tujya twibagirwa nk’abayobozi kubabwira inshingano zabo mu kubaka urugo, niba mwagize inama y’urubyiruko twe kubabwira ku guhanga udushya, ikoranabuhanga no kwihangira imirimo gusa.

Twebwe nk’abayobozi dufite inshingano zo kubategura kuzubaka urugo ntabwo tugomba kubareba gusa nk’abantu bazakora imirimo, tugomba kubareba nk’abantu bazabyara abandi, tugomba kubareba nk’abantu bazarera abandi.”

Imibare yatanzwe n’Urukiko rw’Ikirenga umwaka ushize igaragaza ko imanza za gatanya zakiriwe hifashishijwe ikoranabuhanga mu 2016 zari 21, mu 2018 ziba 69 naho 2018 zigera 1311.

Umugenzuzi Mukuru w’iyubahirizwa ry’Ihame ry’uburinganire n’Ubwuzanye mu Rwanda, Rose Rwabuhihi, agira inama abagiye kurushinga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .