Impamvu Unesco itarinjiza inzibutso z’u Rwanda mu murage w’Isi

Yanditswe na Evariste Nsengimana
Kuya 14 Nzeri 2018 saa 06:59
Yasuwe :
0 0

Imyaka isaga ine irihiritse u Rwanda rwandikiye Ishami rya Loni ryita ku Burezi, Ubumenyi n’Umuco (UNESCO), rurisaba kwinjiza mu murage w’Isi inzibutso enye za Jenoside yakorewe Abatutsi ariko kugeza uyu munsi ntizirandikwa.

Inzibutso n’umutungo kamere w’ibihugu 1092, zirimo 95 zo ku mugabane wa Afurika nizo ziri mu murage w’Isi ariko u Rwanda nta warwo winjijwemo.

Inzibutso u Rwanda rwasabye ko zinjizwamo ni urwa Bisesero, Kigali, Murambi n’urwa Nyamata.

Komisiyo y’Igihugu yo kurwanya Jenoside (CNLG) itangaza ko yasabye by’agateganyo ko zinjizwamo, Unesco nayo isaba u Rwanda kugira ibyo inoza.

Umunyamabanga Nshingwabikorwa wa CNLG, Dr Jean Damascène Bizimana, yabwiye IGIHE ko Unesco yasanze dosiye isaba ko zinjizwamo itarakozwe n’inzobere.

Ati “Ni ukugaraza ko dosiye yakozweho n’impuguke zisanzwe zibifitiye ubumenyi n’ubuzobere. Iyo twatanze iruzuye ariko ntabwo yakozweho n’inzobere. Yakozweho natwe ubwacu.”

Dr. Bizimana yakomeje agira ati “Niyo mpamvu ubu twifashishije impuguke ibizobereyemo yo muri Cap-Vert ndetse na bagenzi be baje mu buryo bwo kunoza iyo nyandiko.”

Ni impuguke zaturutse mu bihugu 16 bivuga Igifaransa, ziri mu Rwanda mu mahugurwa y’ibyumweru bitatu.

Dr. Bizimana asanga uretse kuba bazahugura abanyarwanda bijyanye no gucunga no kwita ku nzibutso, izo mpuguke zizanazisura, zigatanga ubuhamya niba hari ibyo amahanga yazigiraho.

Ikindi Unesco yasabye u Rwanda, ni ukugaragaza ko rufite abantu bafite ubumenyi bwo kwita kuri izo nzibutso igihe zizaba zinjijwe mu murage w’Isi.

Unesco ivuga ko hari ibihugu bifite site zashyizwe mu murage w’Isi nyuma bikagaragara ko zidafashwe neza.

Dr. Bizimana ati “Twabagaragarije ko Guverinoma y’u Rwanda ifite ubushake. Niyo yabisabye, ishinga CNLG, nka komisiyo ihoraho, ihabwa ingengo y’imari yo gukurikirana ibikorwa byose birebana n’amateka ya Jenoside.”

CNLG ivuga ko kitarenze ku wa 1 Gashyantare 2019 izaba yahaye Unesco dosiye yasuzumwe n’inzobere nk’uko yabisabwe.

U Rwanda ruzunguka iki?

Dr. Bizimana ati “Zizajya zibutsa amahanga ko afite inshingano zo kureba ahantu hose Jenoside ishobora kuba yaba, nk’uko Guverinoma y’u Rwanda ijya gutabara mu bindi bihugu.”

Yakomeje agira ati “Kubungabunga amateka ya Jenoside yakorewe abatutsi, bizaba bigiye ku rwego mpuzamahanga, bitakiri inshingano y’u Rwanda gusa.”

Uretse ibyo, ngo bizanafasha kurwanya no gukumira abapfobya n’abahakana Jenoside yakorewe abatutsi.

U Rwanda bizarworohera gusaba Unesco ishinzwe uburezi ku Isi, ko amateka ya Jenoside yakorewe abatutsi yongerwa mu nteganyanyigisho z’amashuri ku Isi.

Gusa ngo hari n’aho yamaze gushyirwamo harimo Kaminuza yigisha ububanye n’amahanga yo mu Bufaransa n’amwe mu yisumbuye yo mu Bubiligi.

Umunyamabanga Nshingwabikorwa wa CNLG, Dr Jean Damascène Bizimana, yatangaje ko Unesco yasanze dosiye isaba ko inzibutso z’u Rwanda zinjizwa mu murage w’Isi itarakozwe n’inzobere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza