00:00:00 IGIHE NETWORK KN KINYARWANDA EN ENGLISH FR FRANCAIS

Impamvu hari hakenewe Minisiteri y’Ishoramari rya Leta mu Rwanda

Yanditswe na Ntabareshya Jean de Dieu
Kuya 4 August 2022 saa 11:16
Yasuwe :

Inama y’Abaminisitiri iheruka guterana ku wa Gatandatu tariki ya 30 Nyakanga 2022 yemeje ishyirwaho rya Minisiteri nshya ndetse ihita inahabwa Minisitiri mushya ari we Eric Rwigamba.

Ni Minisiteri bivugwa ko izaba ifite mu nshingano gukurikirana ishoramari rya Leta ndetse no kugaragaza aho ishobora gushora imari n’uburyo iyashowe yakunguka.

Igice kinini cy’ishoramari gisanzwe kibarizwa mu rwego rw’Igihugu rw’Iterambere mu Rwanda RDB.

Urebye iyi minisiteri izaba ifite inshingano zo kugaragaza amahirwe ahari y’ishoramari mu Rwanda, gukurura abashoramari bashya ndetse no gukurikirana ahantu hose Leta yashoye imari.

Kimwe mu bibazo byagaragajwe n’Umukuru w’Igihugu mu birebana n’ishoramari ni uburyo Urwego rw’Igihugu rw’Iterambere mu Rwanda RDB na Minisiteri y’Ubucuruzi n’Inganda mu Rwanda byananiwe kuzana mu Rwanda umushoramari ushobora gukora inkweto mu gihe u Rwanda ruri mu bihugu bifite impu nziza muri Afurika.

Perezida Kagame yabigarutseho kuwa 30 Mata, ubwo hateranaga Inama Nkuru y’Umuryango wa FPR Inkotanyi.

Yakomeje avuga ko kugeza n’uyu munsi bitumvikana uburyo mu Rwanda nta ruganda ruhari rukora inkweto mu mpu zikomoka ku matungo kandi rumaze gutera imbere mu bworozi.

Iki ni kimwe mu bibazo bishobora kuzashyirwa mu nshingano za Minisiteri y’Ishoramari rya Leta ku buryo mu Rwanda hagarara ibigo bikomeye bya Leta kandi biri ku isoko ry’Imari n’imigabane, ibintu bizafasha no kubaka urwego rw’abikorera rufite imbaraga.

Depite Munyangeyo Théogene yavuze ko iyi minisiteri yitezweho byinshi

Ni iki twakwitega kuri Minisiteri nshya?

Benshi bakimara kumva ishyirwaho rya Minisiteri nshya y’ishoramari rya Leta, bahise batekereza ku mishinga Leta ishoramo akayabo nyamara ikabura gikurikirana, indi ikadindira nk’uko raporo y’Umugenzuzi Mukuru w’Imari ya Leta idasiba kubigararagaza.

Ibikorwa by’imishinga Leta yashoyemo amafaranga ubusanzwe byakurikiranwaga na ‘Public Investment committee’ igizwe n’Abanyamabanga Bahoraho muri za Minisiteri zitandukanye ariko bashoboraga guhugira mu bindi bikorwa, iby’imishinga ntibihabwe umwanya uhagije.

Perezida wa Komisiyo y’Ubukungu n’Ubucuruzi mu Nteko Ishinga Amategeko, Depite Munyangeyo Théogène, yabwiye IGIHE ko ibyakorwaga n’iyo komisiyo bizashyirwa mu biganza bya minisiteri nshya.

Yavuze ko mu rwego rwo kunoza imikorere iyi minisiteri idakwiye kuzaba mu buryo bwo gutegura politiki y’imishinga ya Leta ahubwo ikwiye kujya no mu ishyirwa mu bikorwa ryayo kandi bizatuma ya mishinga idindira izajya ikurikiranwa hakiri kare.

Munyangeyo yavuze ko bizafasha n’igihugu gutegura imishinga migari ku buryo bizafasha na ya mishinga yegurirwa urwego rw’abikorera kuba ifite ingufu.

Ati “Mbese bicare bavuge bati ‘iyi mishinga ifitiye inyungu igihugu ariko kubera ko abikorera badafite amafaranga yo gushoramo wenda Leta ishoremo. Ku buryo ninageza hagati imaze kubona urwego rw’abikorera rukomeje kugenda rwiyubaka izajya igenda iyegurira abikorera gahoro ariko bayikoreye inyigo ari ibintu bigaragara.”

Ubusanzwe hari imishinga ikomeye yanagira uruhare mu iterambere ry’igihugu ariko kubera ko abikorera baba bafite impungenge badashobora guhita bihutira gushoramo imari bigasaba ko Leta itangiza urugamba nk’urwo hanyuma imishinga ikazegurirwa abikorera hagatangira ishoramari rishya.

Aho leta yashoye imari hose hazakurikirwanwa

Hari nk’inzego Leta ishoramo imari ariko ntibikurikiranwe neza nk’uko abasesenguzi batandukanye mu birebana n’ubukungu bagenda babigarukaho ari na byo Munyangeyo yagaragaje ko iyi minisiteri ishobora kuzashyira ku murongo.

Ati “Hari ahantu Leta yashoye imigabane ugasanga nta kubikurikirana, nk’imishinga y’abahinzi b’umuceri. Hari imishinga Leta yagiye yegurira abikorera ariko igasigaranamo imigane ariko wabaza amakuru ugasanga ntibanabizi. Iyi minisiteri rero izafasha mu gukurikirana ahantu hose hari ifaranga rya Leta.

Impuguke mu bukungu, Teddy Kaberuka yabwiye IGIHE ko ishyirwaho rya Minisiteri y’Ishoramari rya Leta rizatanga umusaruro ariko bisaba ko hazibandwa cyane ku kurebera hamwe ishoramari ryunguka kandi rifite icyerekezo no kwirinda idindira rya hato na hato.

Gushyiraho Minisiteri nshya ishinzwe ishoramari bizatuma n’ibigo bya Leta bikora cyane ku buryo bizamura imbaraga bigatuma n’abenegihugu babiguramo imigabane ku buryo bizazamura n’ibigo nyarwanda ku isoko ry’Imari n’Imigabane.

Iyi minisiteri kandi yitezweho gukurikirana ifaranga rya Leta aho ryagiye kugira ngo ryunguke batarindiriye raporo z’umugenzuzi mukuru w’Imari ya Leta.

Umuturage azayivomaho

Kuba hashyizweho minisiteri ishinzwe ishoramari rya Leta bigiye gutuma habaho kwegereza abaturage ibikorwa by’ishoramari rya Leta.

Ibi bisobanuye ko nibura iyi minisiteri izajya imanuka no mu mirenge gukurikirana amahirwe y’ishoramari ahari mu rwego rwo kugabanya urujya n’uruza rw’abava mu byaro bajya gutura mu mijyi.

Kugira ngo hagabanywe abantu bimukira mu mijyi bava mu byaro ni uko ibice by’ibyaro na byo byigirwa inyigo z’imishinga y’iterambere igatanga akazi ndetse n’ishoramari mu bice by’icyaro rigahinduka.

Bijyanye n’ishingano zitezwe kuri iyi minisiteri y’ishoramari rya Leta harimo kuyifasha mu kugera ku cyerekezo cya 2050 aho u Rwanda rwifuza kugira igihugu gifite ubukungu buteye imbere.

Imibare igaragaza ko mu mwaka ushize wa 2021, mu mwaka ushize mu Rwanda haranditswe ishoramari ryari rifite agaciro ka miliyari 3,7 z’amadolari, mu gihe mu mwaka wa 2020 hari haranditswe irifite agaciro ka miliyari 1,3 z’amadolari.

Teddy Kaberuka avuga ko Minisiteri y'Ishoramari rya Leta ikwiye kwita cyane ku mishinga idindira
Eric Rwigamba ni we wagizwe Minisitiri w'Ishoramari rya Leta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .