Urubyiruko rwari muri iri torero rwatojwe ibintu bitandukanye birimo kunoza ururimi rw’Ikinyarwanda, indangagaciro na kirazira by’umuco Nyarwanda, n’ibindi birimo imyitozo ya gisirikare y’ibanze nko kurasa, imyitwarire yo ku rugamba, imikino njyarugamba n’ibindi.

Abitabiriye ni abahagarariye ibyiciro bitandukanye birimo Abanyarwanda baba cyangwa biga mu mahanga, abanyeshuri bo mu mashuri mpuzamahanga yisumbuye, abo muri kaminuza, ndetse n’abitwaye neza ku Rugerero rw’Inkomezabigwi icyiciro cya 13.

Uru rubyiruko ruje rusanga abandi 5216 bamaze gutozwa mu byiciro birenga 15 byabanje, ibituma kugeza uyu munsi urubyiruko rwaciye mu Itorero indangamirwa rugera kuri 5985.

Urubyiruko rutandukanye rwari muri iri torero rwagaragaje ko rwigiye byinshi muri iri torero ku buryo ruzakomeza kubigenderaho no mu bundi buzima.

Umwe mu ntore zari muri iki cyiciro, Uwera Agasaro, w’imyaka 22 uba muri Leta Zunze Ubumwe za Amerika yagaragaje ko nk’umuntu wabaga mu gihugu kitari u Rwanda kuba muri iri torero byamufashije kongera kwibuka no kumenya neza umuco Nyarwanda, indangagaciro na kirazira by’umuco Nyarwanda no gusobanukirwa neza igihugu cye.

Ati “Hari hashize igihe kinini ntibona ahantu hari abantu basa nk’aho ari bamwe, bakora ibintu bimwe kandi bagakorera hamwe mbese intego zabo ubona ari zimwe. Muri iri torero nahigiye ibintu byinshi birimo umuco, ndetse no kumenya ko ushobora guhura n’abantu mutumva ibintu kimwe ariko hari aho muba mugomba guhuriza kuko intego yanyu aba ari imwe.”

Akomeza ati “Ikindi nize kugira ikinyabupfura mu bintu byose, kumenya kwita ku mubiri wanjye, uko mbana n’abandi bantu n’ibindi. Nize ko ikinyabupfura ari kimwe mu bintu by’ingenzi umuntu agomba kugira aho yaba ari hose.”

Ange Ineza w’imyaka 18 urangije amashuri yisumbuye, yavuze ko iri torero ryatumye yumva neza ubwitange bw’Inkotanyi mu rugamba rwo kubohora Igihugu, rinamwongerera umuco wo gukunda igihugu.

Ati “Mbere yo kuza hano nari nzi ko Inkotanyi zarwaniye igihugu, ariko sinari nsobanukiwe neza ikiguzi zatanze kugira ngo tugire amahoro n’u Rwanda dufite uyu munsi. Kumenya ubwitange bwazo byatumye nsobanukirwa ko amahirwe twe urubyiruko dufite uyu munsi atapfuye kwizana.”

Ineza yakomeje avuga ko byamfunguye amaso, abona inshingano afite nk’Umunyarwandakazi ukiri muto, bimushishikariza gukunda igihugu biruseho, binatuma yumva ko na we afite uruhare mu kurinda ibyagezweho no gutanga umusanzu mu kubaka ejo hazaza h’u Rwanda.

Karabaranga we yagaragaje ko kimwe mu byo atahanye ari uko nk’urubyiruko bagomba gusigasira ibyagezweho.

Ati “Nk’urubyiruko dufite inshingano zo gukomereza ku by’abatubanjirije natwe tukubaka u Rwanda rwiza. Ikizabidufashamo ni ikinyabupfura kuko ni cyo twigiye hano cy’ingenzi cyane numva buri muntu akwiye kugira.”

Akomeza agaragaza ko ari kwitegura kujya kwiga muri Canada bityo bitewe n’amasomo yahawe muri iri torero yumva azabera abandi urugero.

Ati “Nzabera u Rwanda ambasaderi mwiza, ku buryo aho ngiye bazamenya Abanyarwanda nk’abantu beza bafite indangagaciro n’ikinyabupfura, bakundana n’abandi bantu, iyo akaba ari yo shusho batubonamo”

Uwiduhaye Phocas we yagaragaje ko bimwe mu bintu yigiye mu Itorero ari imyitozo ngororamubiri, ikinyabupfura, amateka y’igihugu n’ibindi yumva bizakomeza kumufasha mu buzima.

Ati “Impamba nkuye hano ni uko ngomba kuba urugero rwiza yaba hano mu Rwanda ndetse no hanze yarwo. Ikindi ni uko ibyo twigiye hano tugomba tubyigisha abandi twasize aho duturuka kugira ngo twese tube mu mujyo umwe.”

Iri torero ryatangiye ku wa 1 Nyakanga risozwa 10 Kanama 2026. Uru rubyiruko rwatojwe ibintu byinshi ndetse ruganira n’abayobozi batandukanye mu nzego nkuru z’igihugu barimo na Perezida Kagame.

Urubyiruko rw'abakobwa n'abahungu 769 rwasoje Itorero ry’Indangamirwa icyiciro cya 16

Abasoje Itorero Indangamirwa icyiciro cya 16 bishimanye na Minisitiri Dr Jean Damascène Bizimana

Urubyiruko rwasoje Itorero ry’Indangamirwa icyiciro cya 16 rwigishijwe imikino njyarugamba

Urubyiruko rwasoje Itorero ry’Indangamirwa icyiciro cya 16 rwigishijwe amwe mu masomo ya gisirikare