00:00:00 IGIHE NETWORK KN KINYARWANDA EN ENGLISH FR FRANCAIS

Imishinga itanu y’intyoza mu ikoranabuhanga yahawe ibihembo

Yanditswe na Ntabareshya Jean de Dieu
Kuya 7 Ukuboza 2021 saa 09:04
Yasuwe :

Uko Isi yihuta mu iterambere, urubyiruko nk’amizero y’ahazaza rutangira guhanga imirimo igamije kuzamura ubukungu no guharanira iterambere.

Nyuma yo kumara iminsi itari mike bahugurwa n’ikigo cyiyemeje gufasha abashoramari b’urubyiruko bafite imishinga y’ikoranabuhanga “250 Startups”, batanu bafite imishinga ihiga indi bahawe ibihumbi bitanu by’amadorali ya Amerika kuri buri umwe.

Abo batanu batoranyijwe mu mishinga isaga 18 iri mu nzego zitandukanye kandi ba nyirayo biteguye gutangira guhatana ku isoko ry’umurimo.

Ni ku nshuro ya gatanu 250 Startups ,ku bufatanye na Minisiteri y’Ikoranabuhaga, Leta ya Israel, Guverinoma y’u Buyapani n’Ikigo cy’Abayapani JICA ihembye imishinga y’urubyiruko.

Kuva mu 2016 bamaze gufasha abagera kuri 50 ariko ni ubwa mbere batanze amafaranga kuko abatoranywaga bahembwaga kujya mu mahanga kwigira ku bandi cyane mu Buyapani.

Umuyobozi Mukuru wa 250 Startup, Shyaka Charles, yavuze ko impamvu yo guhitamo gutanga amafaranga ari uko byahuriranye n’ibihe bya Covid-19 aho ingendo zitaratungana mu buryo bunoze.

Imishinga itanu yahize indi ikubiye mu nzego zinyuranye zirimo ubuzima, ibikorwaremezo, ibidukikije n’ubucuruzi.

Bluemoric ihuza abatekinisiye n’abakeneye ubufasha

Mu mishinga yahembwe asaga miliyoni 5 Frw harimo Bleumoric ifite igisubizo ku baturarwanda bahuraga n’ibibazo byo kubura abakora ibyabo byangiritse.

Ni umushinga ugamije guhuza abantu bakeneye abatekinisiye b’ibikoresho bitandukanye, bijyanye n’ububaji, ubukanishi, amazi, umuriro w’amashanyarazi, iby’ikoranabuhanga nka telefoni, mudasobwa n’ibindi.

Wavuye ku gitekerezo cy’abasore babiri, Moise Nshizirungu na Eric Mubera bifuzaga gukemura ibibazo abantu bakunze guhura na byo birimo gusiragizwa no kubura ibyo bifuza.

Nshizirungu ati “Twabitekereje mu gufasha abantu benshi bagiraga ibibazo byo gupfusha nk’imodoka bakagorwa no kubona abakanishi. Ibi ni byo tuje gukemura kuko tuzahuza abantu n’abatekinisiye batandukanye.”

Uko bizajya bikorwa ni uko abatekenisiye bazajya biyandikisha kuri “Mobile App” ya Bluemoric hanyuma ukeneye umutekinisiye arebe umwegereye bahane amakuru ku kibazo gihari ku buryo ahagera yamenye ibyo agiye gukemura.

Bluemoric yahawe ibihumbi bitanu by'amadolari

Dot Pharma

Ikirezi Willine ni umukobwa ukiri muto watekereje guhuza Pharmacy zo mu Mujyi wa Kigali n’abakeneye imiti.

Iki gitekerezo cyaje kwaguka kiva ku kuranga farumasi bigera ku buryo abantu bashobora kugura imiti banyuze ku rubuga rwa Dot Pharma mu rwego rwo kubarinda gusiragira.

Ni igitekerezo yagize nyuma yo kubona umubyeyi w’inshuti ye arwara agasiragira ashakisha imiti kandi ntayibone. Byatumye atekereza icyo yakora ku buryo umuntu urwaye ashobora kubona imiti mu buryo bworoshye.

Ikirezi ati “ Turi gukorana n’abantu biyishyurira 100% ariko nitumara kwagura ibikorwa twifuza ko nibura mu 2025 twazaba dukorana n’ubwishingizi bwose.”

Kugira ngo umuntu abone umuti bimusaba kunyura ku rubuga rwa internet rwa Dot Pharma agatanga ubusabe bw’umuti yifuza, ahita asabwa kwishyura nyuma y’igihe gito ababishinzwe bakawumugezaho.

Umushinga ugamije gufasha abantu kugura imiti kuri internet uri mu yahembwe

Vision Vot

Ntabwo ari kenshi abafite ubumuga bakunze gutekerezwaho mu mishinga y’urubyiruko ariko kuri iyi nshuro Biziyaremye Adrien wo mu Karere ka Rwamagana yatekereje ku bafite ubumuga bwo kutabona abakorera inkoni yo kubayobora.

Biziyaremye yabwiye IGIHE ko yatekereje uyu mushinga agamije gukemura ikibazo abafite ubwo bumuga bakunze guhura na cyo kirimo kuyoborwa n’abana bato, guhutazwa n’ibindi bibadindiza mu iterambere.

Yagaragaje ko inkoni akora imwe ifite agaciro k’ibihumbi 70 by’amafaranga y’u Rwanda kandi buri munsi akora eshatu bivuze ko ku kwezi akora 90.

Umwihariko w’izo nkoni ni uko zisharizwa kandi iyo umuriro ugiye gushira irabimenyesha, isobanura ingano y’intambamyi uyikoresha agiye guhura na yo, ifite aho kumva intambamyi yo hasi no hejuru kandi yabikika neza kuko ishobora kuzingwa.

Biziyaremye yagaragaje ko hari impinduka agiye gukora ku buryo n’abafite amikoro make bazajya bazibona.

Vision Bot igamije gufasha abafite ubumuga bwo kutabona

Greenalytic

Ni umushiga ugamije gukora utwuma tuzajya dushyirwa mu modoka mu rwego rwo kuganya imyuka ihumanya ikirere.

Ako kuma kazajya gashyirwa mu mudoka z’ubwoko bwose gafashe umuyobozi w’ikinyabiziga kumenya igihe cyatangiye gusohora imyotsi ihumanya kakanamumenyesha ikibazo yagize.

Tuyizere Emmanuel wawutangije yagaragaje ko bagiye kwagura ibikorwa byabo ku buryo bava ku modoka bakagera no ku nganda kuko na zo ziri mu bihangayikishije mu guhumanya ikirere.

Guverinoma y’u Rwanda ifite gahunda yo kugabanya imyuka ihumanya ikirere ikava ku kigero cya 79,9% yariho mu 2018 ikagera kuri 42 mu 2024.

Hamubere

Ni umushinga ugamije gufasha abantu kugurira kuri internet no gukemura ibibazo bikunze kugararamo ku basanzwe bakoresha ubwo buryo.

Yavuze ko bafite gahunda yo gukorana n’abacuruzi barangurira mu mahanga ibicuruzwa byabo bagamije kubona ibicuruzwa byujuje ubuziranenge.

Ukwigize Jean de Dieu yishimira igihembo yegukanye

Ukwigize Jean de Dieu ni Umuyobozi wa Hamubere. Yabwiye IGIHE ko hari umwihariko wayo urimo kwihutisha serivisi, gutanga ibicuruzwa bifite ubuziranenge, gukurikirana umuguzi na nyuma yo kugura.

Minisitiri w’Ikoranabuhanga na Innovasiyo, Ingabire Paula, mu muhango wo kubashyikiriza ibihembo, yasabye uru rubyiruko kubyaza umusaruro amahirwe rubonye ruharanira kwagura ibikorwa byabo.

Yasabye 250 Startups gukomeza gufasha urubyiruko no guharanira ko abafashwa baba urugero rwiza no kongera umubare w’abakobwa bakitinya mu ikoranabuhanga.

Iyi nkoni ifite umwihariko wo gufasha abafite ubumuga
Umunyamakuru akaba n'Umunyarwenya , Arthur Nkusi, niwe wayoboye uyu muhango
Umuyobozi Mukuru wa 250 Startups, Shyaka Charles, yavuze ko bazakomeza gukurikirana abahembwe
Ambasaderi wa Israel mu Rwanda, Ron Adam, yavuze ko abari mu ishoramari badatinya igihombo ahubwo kibabera isomo
Ambasaderi w'u Buyapani mu Rwanda, Imai Masahiro, yasabye uru rubyiruko gukomeza kwagura intekerezo zabo ku buryo imishinga yabo itagarukira mu Rwanda gusa
Ingabire Paula yasabye ko hakomeza gufashwa umubare wisumbuyeho w'abakobwa kuko bakiri bato mu ikoranabuhanga
Umuyobozi wa JICA, Maruo Shin, yasabye uru rubyiruko kwagura ibikorwa byabo
Hafashwe ifoto y'urwibutso hamwe n'abayobozi bitabiriye uyu muhango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .