Imishinga irindwi y’Abanyarwanda yemerewe ubufasha na Africa Gen

Yanditswe na Akayezu Jean de Dieu
Kuya 11 Ukwakira 2018 saa 01:31
Yasuwe :
0 0

Umushinga uzafasha abanyarwanda kugurisha ibiribwa by’amatungo hakoreshejwe ikoranabuhanga rigezweho rya Blockchain, uri muri irindwi igiye gufashwa n’Umuryango Nyafurika ‘Africa Gen’.

Ni nyuma y’amahugurwa y’iminsi itatu yahabwaga urubyiruko 60 rwo mu Rwanda, yo kubafasha gusobanukirwa uburyo bwo gukoresha ikoranabuhanga mu gushakira umuti ibibazo bya Afurika.

Muri aya mahugurwa, abayitabiriye bakoze imishinga bayimurika ku mugoroba wo kuri uyu wa Gatatu ubwo yasozwaga.

Umuryango Nyafurika ‘Africa Gen’ uhuza urubyiruko rugamije gushaka umuti ku bibazo binyuranye rukoresheje ikoranabuhanga rya Blockchain, watoranyijemo irindwi izahabwa ubufasha mu kuyishyira mu bikorwa.

Blockchain ni uburyo bugezweho bwo guhererekanya ibicuruzwa n’izindi serivisi binyuze muri mudasobwa y’ugura n’ugurisha, bigafasha umukiliya kwizera ibyo agiye kugura kuko aba abona amakuru yose y’ibyo agiye kugura.

Bahire Zita uri mu bamuritse imishinga ku giti cyabo, yagaragaje uko abantu bashobora kugura imigabane muri banki, mu bigo bya leta cyangwa ibigo by’ubucuruzi bakoresheje ikoranabuhanga rya Blockchain.

Yagize ati “Icyatumye ntekereza uyu mushinga ni uko nyuma yo guhugurirwa gukoresha blockchain nabonye ko ari uburyo bwiza bufasha kubika amakuru ntabe yabasha kwibwa cyangwa kugerwaho n’undi muntu wese”.

“Umushinga wanjye rero nasanze ukoze ubucuruzi bwo kugura imigabane ukoresheje blockchain byafasha”.

Mu matsinda abiri yegukanye intsinzi harimo rimwe ryakoze wo kugurisha ibiryo by’amatungo kuri internet, aho abantu bashobora kujyaho bagasaba ingano n’ibyo bakeneye, bagahita babyohererezwa aho bari.

Hari kandi n’iryakoze umushinga wafasha abaturage kugurisha umusaruro w’amata bakoresheje ikoranabuhanga rigezweho.

Emmanuel Christian wari muri itsinda ryakoze uyu mushinga wa Gabura yagize ati “Dukoresheje iryo koranabuhanga twakoze uburyo bwo guhererekanya ibiryo by’amatungo, abantu bakabikora bakoresheje Blockchain.”

Umuyobozi wa Africa Gen, Haguma Norbert yabwiye IGIHE ko nyuma yo kubona ko urubyiruko rufite ubushake n’ubushobozi mu guhanga imishinga y’ikoranabuhanga ikirakurikiraho ari ukureba uko bazafashwa kuyishyira mu bikorwa.

Yagize ati “Icyo twashakaga ni ukubanza kumenya niba urubyiruko rwacu rufite ubushake bwo gukoresha iri koranabuhanga mu guteza imbere Afurika. Barabigaragaje kandi imishinga yabo itanga icyizere niyo mpamvu tuzakomeza kubafasha mu buryo bw’amahugurwa kandi turi kuvugana n’abafatanyabikorwa kugira ngo turebe niba twazajya tugenera amafaranga iyi mishanga.”

Amatsinda abiri y’abantu 16 kongeraho abandi batanu bamuritse imishinga ku giti cyabo ikaba indashyikirwa, bazakomeza gufashwa n’uyu muryango wa Africa Gen, bahabwa amasomo azabafasha kunonosora no gushyira mu bikorwa imishinga yabo.

Abitabiriye aya mahugurwa bafashe n'umwanya wo gusabana
Sebera Antoine yabwiye itangazamakuru ko amarushanwa nk'aya afasha urubyiruko gutangira gushaka ibisubizo by'ibibazo bya Afurika bakoresheje ikoranabuhanga
Urubyiruko rwabanje guhugurwa ku buryo bwo gukoresha ikoranabuhanga rigezweho rya Blockchain
Urubyiruko rwagaragaje ubuhanga mu guhanga imishinga y'ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza