Imiryango itari iya leta yasabwe umwihariko mu kuzamura ireme ry’uburezi ihereye ku bana b’incuke

Yanditswe na Ndayikunda Josué
Kuya 11 Ukuboza 2019 saa 10:13
Yasuwe :
0 0

Minisiteri y’Uburezi yasabye imiryango itandukanye itari iya leta kugira umusanzu itanga mu rugendo rwo guteza imbere no kongera ireme ry’uburezi cyane cyane hibandwa ku mashuri y’incuke.

Ubu busabe bwatanzwe kuri uyu wa Gatatu mu kiganiro nyunguranabitekerezo cyahuje Minisiteri y’Uburezi, Ishami ry’Umuryango w’Abibumbye ryita ku Bana (UNICEF) n’abahagarariye imiryango itari iya leta ikorera ku butaka bw’u Rwanda.

MINEDUC yagaragaje ko yifuza ko ubufatanye bwayo n’imiryango itari iya leta bwakwibanda ahanini mu kubaka amashuri y’incuke akaba menshi, kugaburira abana ku mashuri, ikoranabuhanga, kuvugurura amashuri yashaje no kwakira abanyeshuri ku isoko ry’umurimo bakabaha amahirwe yo kwimenyereza.

Umunyamabanga wa Leta ushinzwe Amashuri Abanza n’Ayisumbuye, Dr. Munyakazi Isaac, yasabye imiryango itari iya leta kubafasha mu byo badashobora kuzuza nka leta no gufatanya mu burezi bw’umwana kuva akiri mu mashuri y’incuke.

Ati “Urebye icyerekezo cy’igihugu cyo kubaka ubukungu bushingiye ku bumenyi bisaba ko hejuru y’icyo leta dushyiramo tutabigeraho twenyine hatagize n’abandi babigiramo uruhare. Uruhare rwa mbere rero ni aho twifuza ko abafatanyabikorwa bagerageza kugira icyo bakora mu byo tudashobora kuzuza twenyine nka leta.”

“Urugero nabaha ni ibyo dushora mu mashuri y’incuke, uruhare rw’amashuri y’incuke rurakenewe cyane mu gutegura umwana gutangira amashuri abanza. Ariko iyo urebye imibare dufite uyu munsi n’imibare isaba ko tujyanirana n’aba bafatanyabikorwa. Baramutse bubatse icyumba kimwe cyangwa bibiri hafi y’aho bakorera ni inkunga ikomeye baba baduhaye.”

Umuyobozi wa Kaminuza y’Amahoteli, Ubukerarugendo, Ikoranabuhanga n’Ubucuruzi (UTB), Dr. Callixte Kabera, yasabye bagenzi be guhuriza hamwe ubushobozi bagafatanya na leta.

Ati “Ni ngombwa yuko imiryango itari iya leta yumva neza ko iki ari ikibazo gikomeye kandi nkuko twagiye tugira uruhare mu iterambere rirambye ry’igihugu no mu burezi, ni ngombwa nanone ko haba ubufatanye mu kubaka amashuri, gukora imiganda no gutanga amafaranga mu ikoranabuhanga. Aho hose tugomba guhuriza hamwe ubushobozi ngo tubashe gufatanya na leta.”

Kugeza ubu ingengo y’imari ishyirwa mu burezi yavuye kuri 14% igera 16%, gusa haracyari ikibazo cy’uko 75% by’abana bakagombye kuba baratangiye amashuri y’incuke batiga.

MINEDUC niho yashingiye isaba imiryango itari iya leta gutanga ubufasha mu kwigisha ababyeyi no kuzamura imyumvire yabo bijyana no kubaka amashuri menshi y’incuke.

Minisiteri y’Uburezi yasabye imiryango itari iya leta ko yabatera ingabo mu bitugu mu kongera ireme ry'uburezi cyane cyane mu mashuri y'incuke
Abitabiriye iyi nama bagize umwanya wo kungurana ibitekerezo
Abahagarariye imiryango itari iya leta bitabiriye iki gikorwa
Umuyobozi wa Kaminuza y’Amahoteli, Ubukerarugendo, Ikoranabuhanga n’Ubucuruzi (UTB), Dr. Callixte Kabera, yasabye abikorera guhuriza hamwe imbaraga bagafasha leta mu kubaka amashuri y'incuke
Umunyamabanga wa Leta ushinzwe Amashuri Abanza n’Ayisumbuye, Dr. Munyakazi Isaac, yasabye imiryango itari iya leta ubufatanye mu burezi bw’umwana kuva akiri mu mashuri y’incuke

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza