Imiryango isaga 14,800 itishoboye yahawe amashanyarazi inashyirirwa amatara mu nzu nta kiguzi

Yanditswe na Evariste Nsengimana
Kuya 15 Gashyantare 2020 saa 09:53
Yasuwe :
0 0

Sosiyete y’u Rwanda Ishinzwe Ingufu (REG) yatangaje ko hari imishinga minini irimo gukorwa igomba kugeza amashanyarazi ku baturarwanda bose mu gihe cya vuba kugira ngo intego Leta yihaye y’amashanyarazi kuri bose igerweho bitarenze umwaka wa 2024.

Muri iyo mishinga minini, harimo uherutse guha amashanyarazi ingo zigera ku 14,800. Uwo mushinga ukaba warahaye amashanyarazi ingo zituriye imiyoboro y’amashanyarazi [Muri metero zitarenze 37] ariko zikaba zitarabonye ubushobozi bwo gushyira amatara mu nzu ngo zibashe guhabwa ayo mashanyarazi.

REG igaragaza ko iyo miryango yahawe amashanyarazi ibarizwa mu cyiciro cya mbere n’icya kabiri cy’ubudehe, iherereye mu turere 16 ari two; Kirehe, Gatsibo Nyagatare, Nyabihu, Gakenke, Ngororero, Nyarugenge, Rubavu, Kayonza, Bugesera, Rwamagana, Gisagara, Kicukiro, Gasabo, Musanze na Nyaruguru.

Umuyobozi w’ishami rya REG riherereye Kanombe mu Karere ka Kicukiro, kamwe mu two uyu mushinga wagezemo, Munyabugingo Charles, aheruka kubwira IGIHE, ko abahabwa amashanyarazi ari abaturage batishoboye kandi begereye amapoto yayo, binyuze mu mushinga watewe inkunga n’Umuryango Nterankunga w’Abadage (GIZ).

Yagize ati “Ni abaturage bari basanzwe begereye umuyoboro w’amashanyarazi [Muri metero zitarenze 37] ariko batari bafite ubushobozi bwo kuyarahura ngo bayageze mu nzu zabo.”

Abahawe amashanyarazi bagaragaje akanyamuneza batewe n’uko bari bamaze igihe mu kizima barananiwe kwirahurira kubera kubura ubushobozi.

Umuturaage wo mu Kagari ka Cyivugiza mu Murenge wa Muko mu Karere ka Gakenke witwa Bahungura Innocent, yavuze ko nta cyizere yari afite cyo kuba yacana, agashimira Leta yamutekerejeho.

Ati “Ese ubu nari gucana amashanyarazi bigenze gute ? Ndashimira umubyeyi Kagame, Imana imuhe imigisha myinshi. Nabaga mu icuraburindi, ariko ubu ndacana nijoro nkagenda mu nzu ntategwa.”

Mukandori Emerance n’umubyeyi we Nyiramavugo Donatille, bavuze bishimiye cyane aya mashanyarazi.

Umwe yagize ati “Twarabyishimiye cyane rwose, ubu turi gukanda ku gikuta tugacana, ibi ntabwo twari tuzi ko tuzabigeraho, rwose turabyishimiye cyane. Mbere twatekaga ku manywa kugira ngo tubone uko turyama kare kuko twabaga turi mu kizima ariko ubu dushobora no guteka saa yine z’ijoro nta kibazo.”

Ni ibyishimo usanga buri baturage bitewe n’Akarere bakomokamo cyangwa igihe bari bamaze amashanyazi abanyura impande badashobora kwirahurira.

Nshimiyimana Jean d’Amour wo mu Karere ka Rubavu mu Murenge wa Nyakiriba, Akagari ka Nyarushamba, umudugudu wa Runyeheri yavuze ko yari yarabuze ubushobozi bwo gukurura umuriro, ariko ubu kubera uyu mushinga amaze hafi amezi abiri acana.

Ati “Ntabwo nari nzi uko barira ahabona ariko ubu rwose turira ahabona hari umucyo. Ubu rero ndatekereza ko umunsi nabonye ubushobozi, nzagura ibikoresho nkazana abasudira inzugi bakazikorera hano iwanjye batagombye kumpenda nanjye nkakingisha inzugi z’ibyuma ‘metallique’.

Umuturanyi wa Nshimiyimana witwa Kayangwe François na we yavuze ko amashanyarazi yamuhinduriye ubuzima.

Ati “Tukimara kubona amashanyarazi, nashyize hamwe n’umugore wanjye dushyira hamwe udufaranga dutangira akabari, none turimo gutera imbere.”

Nduwamungu Martin wo mu Murenge wa Juru mu Karere ka Bugesera yagize ati “Twari mu icuraburindi none ubu turi ahabona. Abana bazajya babasha kwiga nijoro babona neza habona, twabyakiriye neza kandi turashima Leta yadutekerejeho”.

REG igaragaza ko ubu ingo zifite amashanyarazi zisaga 52.8%, ni ukuvuga izisaga Miliyoni 1.4 ubariyemo izifite amashanyarazi afatiye ku muyoboro mugari ndetse n’adafatiye ku muyoboro mugari, yiganjemo akomoka ku mirasire y’izuba.

Imiryango isaga 14 800 itishoboye yahawe amashanyarazi inashyirirwa amatara mu nzu nta kiguzi
Ni ibyishimo ku baturage bahawe aya mashanyarazi
Umwe mu bahawe aya mashanyarazi arimo kuyacana
Ingo zahawe amashanyarazi ni iziri muri metero zitarenze 37

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza