00:00:00 IGIHE NETWORK KN KINYARWANDA EN ENGLISH FR FRANCAIS

Imiryango idaharanira inyungu ikorera mu Rwanda yasabwe kwiminjiramo agafu

Yanditswe na Ishimwe Deborah
Kuya 2 June 2022 saa 01:12
Yasuwe :

Abahagarariye imiryango idaharanira inyungu basabwe kudatatira intego y’imiryango yabo bakongera kwita ku mahame abagenga, bakorera mu mucyo ndetse banamenyekanisha ibyo bakora.

Ibi byagarutsweho mu biganiro byahuje imiryango ya sosiyete sivile hamwe n’impuzamiryango Pro-femme twese hamwe ku bufatanye n’umuryango utegamiye kuri leta, Care international-Rwanda.

Ibyo biganiro byagarukaga ku bushakashatsi bwakozwe harebwa uko imiryango ya sosiyete sivile yubahiriza amategeko n’amahame ayigenga.

Umuyobozi nshingwabikorwa wa Pro-femme Twese hamwe, Emma Marie Bugingo, yavuze ko ubu bushakashatsi bwakozwe hagamijwe kureba uruhare rwa sosiyete sivile mu guteza imbere igihugu n’aho ifite intege nke hakwiye kwibandwaho.

Yagize ati “Mu by’ukuri ubu bushakashatsi bwagiye bukorwa kwari ukugira ngo turebe ese nihe dufite imbaraga nka sosiyete sivile, nihe dufite intege nke?Kuko twemera ko gukora neza no kugira ibyo abantu bageraho bifite igisobanuro iyo muri gukora kandi mukora murongo mwiza.”

“Twagiraga rero turebe aho dufite imbaraga tuzikomeze n’ahari intege nke tuhashyire imbaraga. Bigana mu kwisuzuma abantu bakareba ese iyo bigeze mu nzego z’ubuyobozi bw’imiryango tubarizwamo ndetse no ku rwego rw’impuzamiryango bimeze bite? Ese amategeko dufite turayubahiriza? Ese iyo habonetse abafatanyabikorwa bafata umwanya uhagije wo kureba ibibazo bihari kugira ngo umushinga uze ubisubiza?”

Yakomeje avuga ko barebaga kandi uburyo bw’imikoranire y’abagize umuryango wa sosiyete sivile ndetse n’abagenerwabikorwa, kugira ngo bagaragaze ibyiza bakora babigaragaze ariko barusheho no gukora neza nka sosiyete sivile mu Rwanda ndetse baha abaturage ibyo bakeneye koko.

Yasoje avuga ko nyuma y’ibi biganiro biteze umusaruro mwiza kuko bazabasha gukora ndetse imiryango igakorera mu bufatanye ndetse bizabafasha kuzuzanya no guhana amakuru bibarinde gushyira izo mbaraga zose ahantu hamwe.

Nizeyimana Balthazal uhagarariye kompanyi yitwa Empowering people ari nayo yakoze ubu bushakashatsi ku bufatanye na Pro-femme na Care international-Rwanda nawe yagarutse ku cyari kigamijwe hakorwa ubu bushakashatsi ndetse n’amahame bagendeyeho mu kubukora.

Yagize ati “Dukora ubu bushakashatsi twarebaga amahame atatu ariyo; kubahiriza amategeko gukorera mu mucyo no kubazwa inshingano, bihagaze he mu miryango itari iya Leta, tunamenye uko iyo miryango yubahiriza ayo mahame ndetse tunamenye imbogamizi iyo miryango ya sosiyete sivile ihura nayo mu gihe irimo igerageza kubahiriza ayo mahame ndetse no mu buzima bwayo bwa buri munsi.”

Nizeyimana kandi yagarutse ku mbogamizi babonye zibangamira imiryango ya sosiyete sivile mu nshingano zayo.

Yagize ati “Imbogamizi ya mbere twabonye ni uko iyo miryango igaragaza ko ayo mahame neza gusa ubushakashatsi twakoze bwo bukaba bugaragaza ko bayasobanukiwe igice kuko imiryango yitiranya uguhabwa ibyangombwa na RGB nk’umuryango no kuba koko bujuje ihame ryo kubahiriza amategeko.”

Yavuze ko kandi usanga abahagarariye imiryango bagaragaza uko bakoresheje amafaranga ku baterankunga bakibagirwa ko bagomba no kubigaragariza abagize umuryango babarizwamo.
Yasoje akangurira imiryango ya sosiyete sivile kongera kwicara bakisuzuma bagasuzuma intege nke bafite mu nzego z’umuryango ndetse bakabikosora ndetse ibyo bakorera abaturage bakabitegura bari kumwe n’abaturage.

Ubu bushakashatsi bwakozwe kuva mu mwaka wa 2020 bushyirwa ahagaragara mu mwaka wa 2021, bugamije kureba uruhare rwa sosiyete sivile mu gufasha Abanyarwanda n’ibyo igomba gushyiramo imbaraga ngo imikorere irusheho kugenda neza.

Sosiyete sivile yasabwe kutayoborwa n'amafaranga y'abaterankunga ngo itakaze intumbero y'umuryango
Umuyobozi wa International Transparency Rwanda yibukije abagize sosiyete sivile ko bagomba gukorera mu mucyo ndetse bakibuka no gutegura abazabasimbura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .