00:00:00 IGIHE NETWORK KN KINYARWANDA EN ENGLISH FR FRANCAIS

Imiryango 600 ihora mu makimbirane: Umuzi w’ibibazo bigaragara mu ngo z’abatuye i Nyamagabe

Yanditswe na Prudence Kwizera
Kuya 2 Ukwakira 2022 saa 10:15
Yasuwe :

Ibibazo birimo amakimbirane yo mu ngo n’abashakanye babana bataresezeranye mu buryo bwemewe n’amategeko, biri mu by’ibanze bikomeza gukenesha abatuye Akarere ka Nyamagabe bigateza n’ibindi bibazo bitandukanye.

Ni ibibazo inzego z’ubuyobozi ku bufatanye n’abafatanyabikorwa biyemeje gukemura ndetse n’abaturage ubwabo babigizemo uruhare.

Akarere ka Nyamagabe gatuwe n’ingo 90.198 zibamo abaturage 374.098 bagizwe n’abagabo 183.380 ndetse n’abagore 190.790.

Umuyobozi w’Akarere ka Nyamagabe Wungirije Ushinzwe Iterambere ry’Imibereho Myiza y’Abaturage, Uwamariya Agnes, yavuze ko baherutse kubarura imiryango irenga 600 ibana mu makimbirane kandi ariyo akunze gushingiraho n’ibindi bibazo.

Ati “Mu mibare duheruka mu mezi nk’atatu ashize twari dufite imiryango irenga 600 ibanye mu makimbirane. Ni gahunda twashyizemo imbaraga muri Nyamagabe kuko dushaka kubaka umuryango ushoboye kandi utekanye.”

Yavuze ko mbere na mbere bakangurira abashakanye kubana neza ndetse bagasaba n’abafatanyabikorwa gubibafashamo kuko ari ikintu gikomeye.

By’umwihariko biyemeje ko mu nteko z’abaturage bazajya bita cyane no ku miryango ibanye nabi.

Ati “Ni umwanzuro wafashwe ko mbere y’uko dutangira inteko z’abaturage tugiye kujya dushyira gahunda mu kuganiriza imiryango ibanye nabi.”

Buri murenge wahawe umukoro

Uwamariya yavuze ko nyuma yo gusanga amakimbirane yo mu ngo ari yo muzi w’ibibazo bitandukanye byibasiye imiryango, basabye buri murenge guhanga agashya kakamije kuyakumira no kuyarandura.

Ati “Twatanze umurongo mugari ku rwego rw’imirenge, ko buri murenge wishakamo agashya kagamije kurwanya amakimbirane yo mu ngo. Hari abatangiye, hari nk’umurenge umwe watangiye aho bafatanya n’abafatanyabikorwa babo bagiye bafata ingo bakurikirana bakazibyara muri batisimu.”

Uwamariya yavuze ko basanze amakimbirane yo mu ngo ateza ibibazo birimo igwingira ry’abana, guta ishuri, ubuzererezi, ubukene mu muryango n’ibindi bitandukanye birimo n’uburwayi bwo mu mutwe.

Ibindi bibazo bikomoka ku makimbirane yo mu ngo harimo inda ziterwa abangavu imburagihe.

Ibi ngo biterwa n’uko abashakanye batajya inama yo kwita ku bo babyaye cyangwa ku iterambere ahubwo bahora bahuza bakimbirana.

Muri aka karere habarurwa ingo zirange ibihumbi bine zibana zitarasezeranye kandi nazo ziri mu zigaragaramo amakimbirabe.

Nkurunziza Ildephonse na Kamanyana Consolata bavuga ko bamaze imyaka irenga 30 babana nk’umugabo n’umugore ariko batarasezeranye bigatuma bahorana urwicyekwe n’amakimbirane.

Ati “Twahisemo gusezerana kugira ngo urwicyekwe n’amakimbirane tubivemo.”

Kamanyana na we yavuze ko yishimiye ko basezeranye bityo bagiye gukomeza iterambere bumva ko umutungo wabo bawuhuriyeho bose.

Ati “Usanga umugore utarasezeranye bavuga ngo nta burenganzira afite ndetse n’abana yabyaye bakabima uburenganzira bwabo. Nishimiye ko ndi umugore wemewe n’amategeko kandi twatangiye gukorera hamwe kuko byose ari ibyacu.”

Uwamariya yavuze ko mu byo bakora harimo no guca ubusinzi n’ikoreshwa ry’ibiyobyabwenge kuko biri mu biteza amakimbirane mu ngo.

Umuyobozi w’Akarere ka Nyamagabe Wungirije Ushinzwe Iterambere ry’Imibereho Myiza y’Abaturage, Uwamariya Agnes, yavuze ko amakimbirane yo mu ngo arimo guteza n'ibindi bibazo birimo ubukene n'igwingira ry'abana

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .