Imirimo yo kwagura ibitaro by’umwami Faisal izarangira mu kwezi gutaha

Yanditswe na Ndahayo Emmanuel
Kuya 21 Mutarama 2021 saa 09:06
Yasuwe :
0 0

Imirimo yo kwagura ibitaro byitiriwe Umwami Faisal irarimbanyije, aho byitezwe ko mu kwezi gutaha bizatahwa ku mugaragaro.

Ni imirimo yatangiye umwaka ushize, ndetse biteganyije ko ari nabwo igomba kurangira gusa si ko byagenze bitewe n’uko ingamba zirimo Guma mu Rugo zashyizweho mu rwego rwo kwirinda ikwirakwira rya Coronavirus zadindije imirimo yo kubaka ibyo bitaro, bitewe n’uko umubare w’abakozi wagabanyijwe ndetse n’ibikoresho, cyane cyane ibituruka hanze, bitabonekeye igihe cyari cyateganyijwe.

Mu bice birimo kubakwa, harimo igice cyagenewe kwakira abanyacyubahiro, ndetse hakaba haranongerewe umubare w’ibyumba bisuzumirwamo abarwayi, biva kuri 20 bigera ku byumba 45 ubwo ibi bitaro bizaba bimaze kuzura.

Usibye kubaka inyubako nshya muri ibyo bitaro, harimo no kuvugururwa inyubako zisanzwe z’ibyo bitaro bimaze imyaka 30, aho hari kubakwamo imiyobora mishya ibihuza n’inyubako nshya ziri kubakwa. Izi nyubako zisanzwe ziri gusanwa mu rwego rwo kuzijyanisha n’igihe.

Umuyobozi Mukuru w’Ibitaro by’umwami Faisal, Miliard Derbew, yabwiye The New Times dukesha iyi nkuru ko imirimo yadindijwe n’icyorezo cya Coronavirus.

Yagize ati “N’ubwo ingamba za Guma mu Rugo zorohejwe, hari ibikoresho byatinze kutugeraho. Muri Kanama imirimo yo kubaka yari igeze kuri 60%, igera kuri 90% mu Ukuboza. Ubu rero turitegura gusoza kandi muri iki cyumweru turatangira kwitegura ibikorwa by’ihererekanyabubasha”.

Biteganyijwe ko iki cyiciro cy’iyubakwa nikirangira, hazatangira ikindi cya kabiri, kizaba kigizwe n’ibyumba bikorerwamo ubushakashatsi muri rusange, byose hamwe bikazatwara miliyoni 20$ (arenga miliyari 19 Frw)

Usibye ibikorwa byo kwagura inyubako, Ibitaro by’Umwami Faisal bimaze igihe biri muri gahunda yo gushaka inzobere z’abaganga batandukanye bizakoresha, aho hari abaherutse guhabwa akazi muri ibi bitaro baturutse mu bihugu bya Cameroon, Repubulika Iharanira Demokarasi ya Congo ndetse na Ethiopia. Byari biteganyijwe ko ibi bitaro bizaba bimaze kubona abaganga hagati ya 10 na 15 b’inzobere mu mwaka ushize.

“Turashaka kugera ku ntego yacu yo kongera umubare w’inzobere z’abaganga mu Rwanda. Twikwishimiye kugarura abahanga b’Abanyarwanda bakora hanze bagakorera mu gihugu cyabo. Turi kuvugana na bo kandi turi kubikurikirana. Kugeza ubu twabashije gukorana n’abahanga baturutse mu bindi bihugu bya Afurika”.

Ibi bitaro kandi bimaze iminsi bigura ibikoresho bigezweho bikoreshwa mu kuvura akenshi indwara zitari zisanzwe zivurirwa mu Rwanda, muri gahunda y’igihugu yo gufasha Abanyarwanda kubona ubuvuzi buhendutse hafi yabo.

Zimwe mu ndwara zizatangira kuvurirwa mu Rwanda nyuma y’iyubakwa ry’ibi bitaro harimo kanseri zimwe na zimwe, indwara zo kubaga umutima, gusimbuza imbyiko n’ibindi bitandukanye.

Ibitaro by’Umwami Faisal ni bimwe mu biri ku rwego rwo hejuru kurusha ibindi mu Rwanda ndetse Leta y’u Rwanda ifite gahunda yo gukomeza kubyagura binyuze mu kubifasha kubona ibikoresho bigezweho n’abaganga b’inzobere.

Imirimo yo kuvugurura ibi bitaro iri hafi kugera ku musozo
Kuvugurura ibi bitaro byari kuba byararangiye gusa COVID-19 iza gutuma imirimo idindira

Amafoto: TNT


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .