00:00:00 IGIHE NETWORK KN KINYARWANDA EN ENGLISH FR FRANCAIS

Imirimo yo kubaka umuhanda Base-Gicumbi-Nyagatare igeze kuri 94%

Yanditswe na IGIHE
Kuya 22 Ukuboza 2022 saa 08:08
Yasuwe :

Ubuyobozi bw’Ikigo cy’Igihugu Gishinzwe Iterambere ry’ubwikorezi, RTDA, bwatangaje ko imirimo yo kubaka umuhanda wa kaburimbo uhuza Intara y’Amajyaruguru n’Intara y’Iburasirazuba igeze ku kigero cya 94%.

Ni ukuvuga ko mu gihe cya vuba umuntu utuye kuri Base mu Karere ka Rulindo azajya akora urugendo rw’ibilometero bisaga gato 124 agenda muri kaburimbo akarinda agera i Nyagatare.

Uva kuri Base mu Karere ka Rulindo ugera mu Mujyi wa Gicumbi, uyu muhanda ukora ku mirenge irindwi irimo Gashenyi (Gakenke), Base, Cyungo (Rulindo), Ruhunde (Burera), Miyove, Nyankenke na Byumba muri Gicumbi.

Ni umuhanda uteganyijwe kuzuzura utwaye miliyari 53Frw. Watangiye gufasha mu buhahirane hagati y’abaturage bo mu Ntara y’Amajyaruguru n’Iburasirazuba ndetse no koroshya ingendo no kugabanya ikiguzi cy’urugendo.

Ni umuhanda witezweho kandi kongera ubucuruzi n’ubuhahirane mu bice bitandukanye by’igihugu by’umwihariko Amajyaruguru n’Uburasirazuba, kongera urujya n’uruza rw’abantu, kugabanya igiciro cy’ingendo z’abantu n’ibicuruzwa.

Wubatswe mu byiciro bitandukanye birimo icya Base-Gicumbi-Rukomo gifite ibilometero 51. Aha harangiye umwaka ushize.

Ni mu gihe igice cya Nyagatare-Rukomo cyo gifite ibilometero 73,3 cyo giteganyijwe kurangira umwaka utaha.

Iyubakwa ry’uyu muhanda ryabereye bamwe umugisha kuko abaturage bahawe amafaranga y’ingurane ku mitungo yabo yanyujijwemo umuhanda bavuga ko batangiye kuyabyaza umusaruro biteza imbere.

Hari umuturage waganiriye na RBA wagize ati “Twabonye ingurane rwose y’amafaranga y’aha dutuye, twamaze kuyafata tujya kugura akazu i Kigali kuko twabonaga ko dushaje tutagishoboye guhinga, hanyuma iyo nzu niyo itugaburira ikaduha amafaranga tukagura ibyo dushaka byose, nta kibazo dufite.’’

Ku rundi ruhande ariko hari abaturage batuye mu bice byo kuva Cyabayaga kugeza mu Murenge wa Mimuri bavuga ko batarahabwa ingurane kandi barabariwe.

Hari uwagize ati “Baraje baratubarira, bamaze kutubarira turasinya, ntabwo bigeze bansubiza, urwo rutonde baje gusubiza bakuramo abo basaniye njyewe ndasigara nkaba nifuza rero ko izo ngurane nazibona kuko n’inzu yanjye yangiritse.’’

Umukozi ushinzwe ibyo gukurikirana ikorwa ry’uyu muhanda muri RTDA, Shema Joseph yavuze ko nta muturage utazahabwa ingurane ahubwo abatarayihabwa habayeho ibibazo birimo kutuzuza ibisabwa.

Ati “Abafite ibibazo by’ingurane kuri uriya muhanda tubasura tujyanye n’izindi nzego tukareba umuntu ku wundi. N’ejo bundi twari turiyo, nta muntu n’umwe twigeze duha icyo gisubizo.’’

Yakomeje agira ati “Cyakora ku bandi batarabona amafaranga, ni ikibazo cy’uko nta byangombwa byuzuye bafite. Nta muntu wujuje ibyangombwa ngo ibintu bibe bitarishyurwa. Ntawe.’’

Umuhanda wa Base-Rukomo-Nyagatare, Perezida Paul Kagame yawemereye abaturage ubwo yiyamamazaga mu 2003.

Umuhanda wa Base-Gicumbi-Nyagatare witezweho koroshya ubucuruzi n'ingendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .