00:00:00 IGIHE NETWORK KN KINYARWANDA EN ENGLISH FR FRANCAIS

Imibereho igoye n’uko yakinnye umupira w’amaguru: Byinshi kuri Mukanemeye wihebeye Mukura VS

Yanditswe na Prudence Kwizera
Kuya 8 September 2022 saa 11:42
Yasuwe :

Mukanemeye Madeleine w’imyaka 100 y’amavuko wo mu Murenge wa Save mu Karere ka Gisagara, ni umufana ukomeye w’Ikipe y’Umupira w’Amaguru ya Mukura VS ku buryo adashobora gusiba umukino iyi kipe.

Uyu mukecuru bakunze kwita ‘Mama Mukura’ kubera ko ari umukunzi ukomeye wa Mukura VS akunze kugaragara yambaye imyenda y’iyo kipe.

Amaze iminsi agaragara ku mbuga nkoranyambaga yitabiriye imikino ya Mukura VS ariko by’umwihariko yavuzweho cyane ubwo yafotorwaga yubitse umutwe arira, ababajwe n’uko Ikipe y’Igihugu Amavubi itsindiwe na Ethiopia kuri Stade Huye ku gicamunsi cyo ku wa 3 Nzeri 2022.

Mu kiganiro yagiranye na IGIHE yagarutse kuri byinshi byaranze ubuzima bwe kuva akiri muto ndetse n’uko yisanze ari umukunzi n’umufana ukomeye wa Mukura VS.

Kuva aho atuye mu Murenge wa Save mu Karere ka Gisagara atega moto ya 3000 Frw agiye gufana ikipe ya Mukura VS i Huye. Gusa abafana b’iyo kipe nibo bakunze kubimufashamo kuko we ari umukene utabasha kwibonera ayo mafaranga dore ko no kubona ibyo kurya bimugora.

Mu 1922 ni bwo Mukanemeye yaboneye izuba mu Mudugudu wa Kabitoki mu Kagari ka Munazi mu Murenge wa Save ho mu Karere ka Gisagara; ni umuhererezi mu bana umunani bavukana.

Yize amashuri abanza hafi y’iwabo ariko ageze mu mwaka wa gatatu arayacikiriza ajya gukora akazi ko gutekera ababikira i Kibeho mu Karere ka Nyaruguru.
Ati “Ishuri narivuyemo nicarana na mama ariko nyuma yaho njya kubana n’ababikira i Kibeho banyigisha guteka nkajya mbatekera.”

Avuga ko yabanye n’Ababikira igihe kirekire kugeza mu 1964 ubwo yajyaga gukora akazi ko gutekera abanyeshuri mu yahoze ari Kaminuza Nkuru y’u Rwanda i Butare.

Mu 1965 nibwo yashatse umugabo afite imyaka 43 y’amavuko ariko nta mwana n’umwe bigeze babyarana.

Umugabo we yishwe muri Jenoside yakorewe Abatutsi mu 1994 na ho Mukanemeye baramutema arakomereka ariko abasha kurokoka.

Uko yisanze akunda umupira w’amaguru

Mukanemeye yabwiye IGIHE ko yatangiye gukunda umupira w’amaguru akiri muto yiga mu mashuri abanza ndetse akagerageza no kuwukina.

Yagiye akunda kujya kureba umupira w’amaguru aho abahungu bari gukinira karere rimwe na rimwe na we agakinana na bo.

Yibuka ko ubwo yari inkumi yagiye kureba imikino y’umupira w’amaguru yitabiriwe n’Umwami Mutara III Rudahigwa.

Ati “Nakundaga kujya kureba umupira i Nyanza n’i Butare nkabona Rudahigwa yaje kuwureba.”

Mukanemeye w'imyaka 100 y'amavuko ni umukunzi akana n'umufana ukomeye wa Mukura VS

Mu 1963 ubwo Ikipe ya Mukura VS yashingwaga yamenye ayo makuru atangira no kujya ajya kureba imikino yayo yisanga ari umukunzi n’umufana wayo kugeza n’ubu.

Ni kenshi Mukanemeye agaragara kuri Stade Huye na Stade Kamena mu Mujyi wa Huye yitabiriye imikino ya Mukura VS.

Ati “Mukura ndayikunda kuva kera kugeza n’ubu; ni yo kipe nkunda. Iyo yatsinzwe ndababara yatsinda nkishima.”

Yavuze ko ayikunda kuko ari ikipe nziza kandi adashobora kuyireka ngo ni uko yatsinzwe.

Icyo avuga ku Amavubi

Mukanemeye avuga ko ubusanzwe ikipe afana kandi akunda ari Mukura VS ariko akunze no gukurikira amakuru y’Ikipe y’Igihugu ‘Amavubi’ binyuze kuri radiyo afite mu rugo yahawe.

Ati “Iyi radiyo nayihawe n’umunyamakuru wa Radio Rwanda witwa Gatera Edmond akorera hariye i Huye. Ni we wayimpaye kugira ngo njye numva amakuru ya Mukura. Yaramfashije cyane kuko ni yo imfasha kumenya amakuru yose.”

Yabwiye IGIHE ko yamenye ko Amavubi azakina na Ethiopia kuri Stade Huye yiyemeza kujya gushyigikira ikipe y’u Rwanda ariko ababazwa no kubona itsinzwe.

Ati “Bayitsinze igitego numva mpise ndwara ndarira. Ni nko kugukubitira mu rugo iwawe. Byarambabaje cyane bintera agahinda. Agahinda yanteye kazashira nitsinda.”

Asanga abashinzwe ikipe y’igihugu ari bo bakwiye kwiga ku kibazo ifite cy’uko ikunda gutsindwa.

Mukanemeye yari yabukereye ku wa 3 Nzeri 2022 kuri Stade ya Huye yisiga amarangi mu gushyigikira Ikipe y'u Rwanda

Abayeho mu buzima bugoye

Mukanemeye ageze mu zabukuru ariko abayeho nabi kuko acumbitse ku mwisengeneza we witwa Ntezumuremyi Véneranda mu Murenge wa Save mu Karere ka Gisagara mu nzu iva.

Nta bikoresho by’ibanze mu mibereho bafite, barya iyo uwo Mwisengeneza we yagiye guca inshuro kandi na we imbaraga ze ni nkeya kuko afite imyaka 64 y’amavuko.

Iyo nzu bayibamo bonyine kuko nta mwana n’umwe uhaba ushobora kubavomera amazi cyangwa kubashakira inkwi zo gucana.

Ntezumuremyi ati “Tumaze imyaka itanu tubana hano ariko ubuzima buragoye kuko njya guca inshuro kugira ngo tubone ibyo kurya, gusa nanjye imbaraga zimaze kuba nkeya nawe urabibona.”

Mukanemeye avuga ko akenshi iyo yagiye gufana Mukura VS ajya gucumbika mu bagiraneza mu rugo ruri ku Itaba mu Mujyi wa Huye.

Avuga ko abafana ba Mukura VS ari bo bakunda kumufasha akabona ibyo kurya n’itike yo gutega moto imuvana aho acumbitse mu Karere ka Gisagara yerekeza i Huye.
Gusa ngo na Mukura VS yigeze kumuha amafaranga yo guhaha ibiribwa mu mpera z’umwaka ushize.

Mu buzima bwe akunda kunywa amata ariko kuyabona biragoye.

Ati “Iyo mbonye umugiraneza duhuriye mu mujyi i Butare angurira amata yo kunywa. Amata ndayakunda cyane kuko na kera nkiri muto narayakundaga.”

Akunda no kurya umuceri n’indagara gusa na byo kubibona biragoye. Ntezumuremyi avuga ko mu rugo bakunze guteka ibijumba n’ibishyimbo n’imboga kuko ari byo babasha kubona.

Ati “Ibyo bijumba biramunanira kuko kuko atabikunda kandi urabona ko ageze mu zabukuru. Akunda kurya umuceri ariko ntabwo kuwubona byoroshye.”

Akenshi bakunze kurara ubusa kuko ubwo umunyamakuru yabasuraga ku mugoroba wo ku wa Mbere yasanze batigeze bashyira inkono ku ziko kuko ntabyo guteka bari bafite.

Inzu Mukanemeye n'Umwisengeneza we Ntezumuremyi babamo mu Murenge wa Save mu Karere ka Gisagara
Mukanemeye abana n'Umwisengeneza we mu Murenge wa Save mu Karere ka Gisagara mu nzu itameze neza
Iyo agiye cyangwa avuye gufana Mukura VS agenda na moto
Akunze kugaragara no mu Mujyi wa Huye yambaye umupira wamamaza Mukura VS; aha ni mu 2020 ubwo irushanwa ry'amagare rya Tour du Rwanda ryerekezaga i Huye
Mukanemeye ni umufana ukomeye wa Mukura VS ariko akunda n'Ikipe y'Igihugu, Amavubi
Amavubi amaze gutsindwa na Ethiopia, Mukanemeye yubitse umutwe ararira

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .