Imboni ku mwaka Louise Mushikiwabo amaze ayobora OIF

Yanditswe na Musangwa Arthur
Kuya 1 Ugushyingo 2019 saa 08:05
Yasuwe :
0 0

Umwaka n’iminsi 20 irirenze Louise Mushikiwabo, atorewe kuyobora Umuryango w’Ibihugu bivuga Igifaransa, nyuma y’aho abakuru b’ibihugu byitabiriye inama yatorewemo bamwemeje mu bwiganze busesuye.

Abakuru b’ibihugu na za Guverinoma bagera kuri 40 bitabiriye inama ya Erevan nibo bemeje Louise Mushikiwabo nk’Umunyamabanga Mukuru w’Umuryango w’Ibihugu bikoresha Igifaransa mu myaka ine iri imbere, atsinda Michaëlle Jean, wari usanzwe ayobora uyu muryango

Ni umwaka ukubiyemo icyifuzo cya Mushikiwabo cyo kujyanisha n’ibihe uyu muryango urimo kurwana no kugira ijambo mu ruhando rwa dipolomasi.

Muri Mutarama 2019 nibwo Mushikiwabo yatangiye inshingano zo kuyobora OIF. Kuwa 29 Ukwakira, Mushikiwabo yayoboye inama y’akanama gahoraho ka OIF i Monaco, ahatari harigeze habera inama y’uyu muryango kuva mu 1999.

Ni inama yitabiriwe n’abahagarariye abakuru b’ibihugu binyamuryango, indorerezi n’ibyiyunze ku muryango [ni ukuvuga ibihugu 54 binyamuryango, birindwi byiyunze na 27 by’indorerezi].

Iyi nama yakurikiwe n’iy’abaminisitiri yahurije hamwe umuryango wagutse wa Francophonie, yitabiriwe na ba Minisitiri 39 n’abanyamabanga ba leta batanu, aho yari ifite insanganyamatsiko yo ‘kunga ikiremwamuntu n’umubumbe’.

Mushikiwabo ashishikajwe n’uko iyi nama iba ingirakamaro. Mu minsi ibiri, we n’abitabiriye iyi nama bemezanyije umurava akamaro ko kujyanisha n’igihe OIF, gutuma itanga umusaruro kurenza uko byari bimeze no guhindura imwe mu mikorere kugira ngo irusheho kugira impinduka izana.

Mu gusoza inama y’abaminisitiri ba Francophonie, ibihugu byemeranyije ku ngingo zigamije kongera kwita ku bikorwa n’ingengo y’imari ya OIF. Muri byo harimo; inama zegeranye kandi ziri ku rwego ruciriritse ndetse n’ubushobozi bw’Umunyamabanga Mukuru bwo gushyiraho abamuhagararira mu biro by’umuryango mu turere dutandukanye.

Ikimenyetso kandi cy’uko hari akamenyero kabi karimo kugenda gacika muri Francophonie cyanatangiriye ku kiguzi umuryango watangaga mu gutegura imikino ihuza ibihugu bya OIF, aho iy’ubutaha izabera muri Repubulika Iharanira Demokarasi ya Congo (RDC), kuwa 23 Nyakanga kugeza kuwa 1 Kanama 2021.

Hari kandi no kuri sitati y’ibihugu by’indorerezi mu muryango, aho inshingano zabyo ziyongereye.

Gushaka gusiga amateka

Jeune Afrique yabajije umwe mu baminisitiri bo muri Afurika y’Uburengerazuba niba ibyo Mushikiwabo akora yaba ari ‘intangiriro y’amavugurura mato’, asubiza agira ati “Buri Munyamabanga Mukuru wese aba ashaka kwandika izina, ibi ni ibisanzwe ariko ni ngombwa kubirebera mu bikorwa”.

Ashimagiza imikorere n’umurongo utangwa na Mushikiwabo, uyu Minisitiri yakomeje agira ati “Ni byiza rwose gutangiza amavugurura ariko tugomba kubasha kuyabyaza umusaruro. Abakuru b’ibihugu ni abakuru b’ibihugu ntidushobora kubahatira ikintu”.

Mushikiwabo aganira na Jeune Afrique yagize ati “Abaturage bacu barasaba umusaruro mwinshi ufatika. Gukorera mu mucyo n’imiyoborere myiza ni ingenzi mu kugera ku musaruro mwinshi.”

Mushikiwabo wumva neza ko ari mu gihe cy’impinduka avuga ko ‘Ni intambwe y’ingenzi yo kwinjira mu gihe gishya. Akazi ntabwo koroshye kuko gakeneye impinduka mu mitekerereze’.

Abakozi bari hafi ya Mushikiwabo babajijwe niba ku buyobozi bwe ari igihe cyo gucika ku kamenyero kabi mu muryango, bavuze ko ‘icy’ingenzi cyane ari ugukora ibyiza atari ugukora ibyinshi’.

Umwe yagize ati “Gukora impinduka birakomera, ni ngombwa kubanza kumva abantu bakoraga kuri gahunda runaka mu myaka yashize kugira ngo ubashe kugihindura. Igikomeye ni ukumenya uko utwara buri wese”.

Guhitamo ni ukwigomwa

Ubunyamabanga bwa OIF burashaka gutangiza uburyo bwiza bw’imicungire y’umutungo hakagira gahunda runaka zivaho. Umwe mu bakorana na Mushikiwabo yagize ati “Guhitamo ni ukugira ibyo ushyira ku ruhande. Umuryango wacu ukora ku ngingo nyinshi utanafitiye ubushobozi bw’amafaranga n’abantu bo kubikora uretse ubuvugizi. ni ugutatanya ubushobozi”.

Inzego zimwe na zimwe nk’urw’ubuzima, zishobora gushyirwa ku ruhande kubera gahunda nshya Umunyamabanga Mukuru ashyize imbere zirimo; ikoranabuhanga, urubyiruko ndetse n’uburinganire.

Muri uru rwego, ibibazo bimwe bishobora gusigara bidakemuwe birimo ukutavuga rumwe kuri kandidatire ya Arabie Saoudite, yasubitswe amasaha make ngo inama ya Erevan itangire, ubu kikaba kitakiri kuri gahunda.

Amezi icyenda nyuma yo guhabwa inshingano, Mushikiwabo, aracyasa n’ushaka kwemeza abayobozi bamwe ba Afurika bakigerageza kumva uko yatsinze umunya-Canada Michaëlle Jean.

Umunyamabanga wa Leta ushinzwe Umuryango wa Afurika y’Iburasirazuba Olivier Nduhungirehe, yavuze ku bemezaga ko Mushikiwabo ataramenya neza umuryango wa OIF ariko agomba kuwiga n’uburyo bishobora kuba imbogamizi mu mpinduka zifuzwa.

Ati “Ukunangira ku mpinduka ntabwo bitunguranye ariko niba yaratowe mu bwumvikane ni uko ari we wari ubikwiye”.

Mushikiwabo washyigikiwe cyane na Perezida Kagame, yabaye Minisitiri w’ububanyi n’amahanga imyaka 10 agira uruhare rukomeye mu mpinduka z’iterambere u Rwanda rugezeho. Nduhungirehe asanga umuco wo kugera ku ntego n’umusaruro yakuye mu Rwanda bizamubera akabando.

Ubwo yari yahuye n’abari bagenzi be ba Minisitiri b’ububanyi n’amahanga, Mushikiwabo yashimangiye ko ‘ubunararibonye yakuye muri dipolomasi y’u Rwanda buzamufasha kwemeza abamushidikanyaho’.

Igikorwa kinini OIF iteganya ni ikizaba umwaka utaha mu nama ya 18 izabera i Tunis kuwa 12 na 13 Ukuboza 2020. Guhera kuwa 31 Ukwakira, Tunisie izafata ubuyobozi bw’Akanama k’abaminisitiri ba OIF, isimbuye Arménie nk’uko byemejwe mu nama iheruka.

Ni igihe kidasanzwe ku muryango uzaba wizihiza isabukuru yawo y’imyaka 50, aho kuyizihiza bizatangizwa kuwa 20 Werurwe umwaka utaha i Niamey muri Niger.

Mushikiwabo avuga ko ‘Ni ibihe bikomeye kuri Francophonie. Turi mu mpinduka’. OIF yatangijwe n’ibihugu 21 byiganjemo ibyakolonijwe n’u Bufaransa mu 1970.

Louise Mushikiwabo ashyize imbere gukora impinduka zigamije ko OIF itanga umusaruro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza