Imbere y’icyaha nta gifi kinini kibaho-Umuvunyi Nirere ahererekanya ububasha na Murekezi

Yanditswe na Iradukunda Serge
Kuya 3 Ukuboza 2020 saa 03:20
Yasuwe :
0 0

Umuvunyi Mukuru, Nirere Madeleine, yatangaje ko imbere y’icyaha nta muntu ukwiye kwitwa igifi kinini kuko amategeko asobanutse ahubwo igikwiye kwitabwaho ari uburyo ashyirwa mu bikorwa neza.

Nirere yabigarutseho kuri uyu wa 3 Ukuboza 2020 nyuma yo guhererekanya ububasha na Murekezi Anastase yasimbuye.

Umuvunyi Mukuru Mushya, Nirere Madeleine, yavuze ko azagendera ku mpanuro Umukuru w’Igihugu yamuhaye ubwo yakiraga indahiro ye ku wa 2 Ukuboza 2020 zo kwigisha abaturage uburenganzira bwabo n’amategeko abarengera.

Abajijwe icyo yiteguye gukora mu guhangana na ruswa by’umwihariko mu bayobozi bakomeye, bitwa ibifi binini, yavuze ko ari urugamba ruzatsindwa buri wese abigizemo uruhare.

Yagize ati “Imbere y’icyaha nta gifi kinini n’igito kibaho. Njye ni ko mbyumva mu myumvire yanjye. Umuntu wese ukoze icyaha wese aba yagiye munsi y’itegeko, agomba kwitegura kwemera icyaha yakoze, akagihanirwa.’’

“Umuntu wese w’umunyacyaha aba yacishijwe bugufi. Amategeko arasobanutse arahari ahubwo icyangombwa ni ukuyashyira mu bikorwa neza, amategeko y’icyaha cya ruswa nk’icyaha kidasaza.’’

Nirere yasobanuye ko mu gukurikirana icyaha habanza gushakwa ibimenyetso bifatika, bishinja umuntu kugira ngo kimuhame.

Yakomeje ati “Ntiwashinja umuntu utarabona ibimenyetso bimuhamya icyaha. Icyiza kiri mu mategeko ni uko ufite umutungo adashobora gusobanura, azajya agaragaza inkomoko yawo, niba waravuye kuri ruswa, uwo si uwe, ni umutungo wa rubanda ugomba gusubiza.’’

Urwego rw’Umuvunyi kandi ruzakomeza gushishikariza abaturage kugaragaza abaturage cyangwa abayobozi bakekwaho ruswa kugira ngo iranduke burundu.

Nirere yakomeje ati “Buri wese akwiye kubigiramo uruhare, tukabyiyumvamo n’umwana akabyumva.’’

Yagaragaje ko mu gihe umuntu yahamwe n’icyaha akemera kwicuza, agasaba imbabazi bishobora gutuma abandi muri sosiyete bamukuraho isomo.

Leta y’u Rwanda yakajije ibihano bihabwa uwahamijwe ruswa, kuko ahanishwa igifungo kirenze imyaka irindwi ariko kitarenze imyaka 10 n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’indonke yasabye, yakiriye, cyangwa yasezeranyijwe.

Nirere avuga ko “Buri wese yagakwiye gutinya ruswa no kumva umuronko igihugu cyihaye wo kumva ko ari ngombwa kugendera ku mategeko, ko ruswa itihanganirwa, bikwiye kuba umuco.’’

Umuvunyi ucyuye igihe, Murekezi Anastase, yashimiye Perezida Kagame ku mirimo yamushinze mu myaka itatu yari amaze ayobora Urwego rw’Umuvunyi, yizeza umusimbuye ubufatanye n’ubujyanama butandukanye.

Nirere Madeleine wabaye Umuyobozi wa Komisiyo y’Igihugu y’Uburenganzira bwa Muntu, yabaye uwa kane uyoboye Urwego rw’Umuvunyi kuva rwajyaho mu 2003. Yasimbuye Murekezi Anastase (2017- Ugushyingo 2020), wagiyeho asimbuye Aloysie Cyanzayire (2014 – 2017), mu gihe babimburiwe na Tito Rutaremara (2004 – 2012).

Murekezi Anastase wari Umuvunyi Mukuru areba inyandiko yahererekanyije na Nirere Madeleine wamusimbuye
Umuvunyi Mukuru, Nirere Madeleine, yahamagariye Abanyarwanda bose gufatanya mu rugamba rwo kurwanya ruswa
Murekezi Anastase wari umaze imyaka itatu ari Umuvunyi Mukuru ahererekanya ububasha na Nirere Madeleine wamusimbuye
Umuvunyi ucyuye igihe, Murekezi Anastase, yijeje Nirere wamusimbuye ubufatanye n’ubujyanama
Umuvunyi Mukuru Nirere Madeleine yavuze ko imbere y'icyaha nta gifi kinini gikwiye kubaho
Umuvunyi ucyuye igihe, Murekezi Anastase, yashimiye Perezida Kagame ku mirimo yari yamushinze mu myaka itatu ishize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .