00:00:00 IGIHE NETWORK KN KINYARWANDA EN ENGLISH FR FRANCAIS

Imbamutima za Sankara wayobotse Leta: Yageneye ubutumwa abamwita ’akabwa’

Yanditswe na Ferdinand Maniraguha
Kuya 26 May 2022 saa 06:02
Yasuwe :

Nsabimana Callixte uzwi nka Sankara yatangaje ko yahisemo kuyoboka Leta y’u Rwanda, kuko yasanze nta mpamvu yo kuyirwanya, anasaba Kayumba Nyamwasa n’abandi bagifite uwo mugambi kuzibukira.

Yabigarutseho mu kiganiro yahaye abanyamakuru ubwo muri Gereza ya Mageragere hakorwaga umuhango wo guha impamyabushobozi abagororwa basoje amasomo y’imyuga.

Sankara yakatiwe gufungwa imyaka 15 nyuma yo kwemera no gusaba imbabazi ku byaha by’iterabwoba yari akurikiranyweho n’ubushinjacyaha.

Yatangaje ko muri gereza aho afungiye abayeho neza, nta muntu n’umwe uramuhohotera ku buryo ahubwo afite gahunda yo gutangira amasomo y’imyuga.

Ati “Nanjye nifuza kwiga imyuga. Ndakubwiza ukuri, nko mu bihugu nabayemo bya Afurika y’Amajyepfo, narebaga ukuntu abantu bize imyuga basarura amafaranga, twe ntayo twarize amategeko, nkavuga nti ’iyo biba gusubira inyuma nari kwiga imyuga aho kwiga amategeko.”

Yavuze ko abantu bo hanze ya gereza bahora iteka bumva abagororwa ari abantu bagowe, bahora ku nkeke bakubitwa ariko ko atari ko biri.

Ati “Hari abatekereza ko tubyuka dukubitwa, tukarara dukubitwa, batugendesha za makeri, ntabwo ari ko bimeze. Njye nkurikije ibyo nari ndimo hariya hanze, nibura hano uyu munsi, abavandimwe banjye, bashiki banjye baransura.”

“Ariko hanze namaze imyaka itandatu ntashobora kubonana n’umuryango wanjye [...] aho kugira ngo nsubire mu buhungiro nahitamo kuba muri gereza.”

Nsabimana yemera ko kubera ibyaha yakoreye Sosiyete, ari ngombwa kugororwa kandi ko iyo uranzwe n’ikinyabupfura uba ufite amahirwe yo kwandikira Umukuru w’Igihugu ukamusaba imbabazi kandi ko na we ari byo ateganya.

Ati “Sankara w’uyu munsi atandukanye na Sankara wa kera mwatekerezaga, hari n’abantu bavuga ngo uriya bamurekuye ashobora gusubira muri biriya, utazi imihangayiko twaciyemo ashobora kubitekereza. Ubu hano ndaryama nkasinzira ariko hanze ntitwasinziraga.”

Yatanze urugero kuri Kayumba Nyamwasa uri mu buhungiro muri Afurika y’Epfo, avuga ko aho ari adasinzira kuko ibyo akora aba ahanganye na Leta.

Yavuze ku buzima bwa Rusesabagina

Nsabimana yavuze ko yo bibaye ngombwa ahura na Paul Rusesabagina na bagenzi be bareganwaga hamwe, ariko ko nta byinshi baganira.

Ati “Rusesabagina duherukana tukiri mu byo kuburana, urumva njye nari narafashe umwanzuro wo kuburana we yarafashe uwo kutaburana, urumva harimo ikibazo. Ikarita yo gukomeza guhangana njye si yo nakinaga.”

Nsabimana yavuze ko ari kwandika igitabo ku buzima bwe

Yemera ko Ingabo za FLN yari abereye umuvugizi zakoze ibyaha, ari nayo mpamvu yafashe umwanzuro wo kwemera no gusaba imbabazi ku byaha ashinjwa.

Ati “Nkanjye iyo nabonaga hariya mu rukiko, umugore wiciwe abantu na FLN ari kurira, hari aho byageze nkumva amarira arashaka kugwa nkihagararaho kigabo ariko numvaga amarangamutima andenze.”

Yageneye ubutumwa abashaka guhungabanya umutekano w’u Rwanda

Sankara yasabye Lt. Gen Habimana Hamada uzwi nka Komada, wari umwe mu basirikare bakuru ba FLN na mugenzi we Gen Jeva wayoboraga ingabo za FLN, ko bareka ibyo barimo kuko batazigera batsinda.

Ati “Icyo nababwira cyane cyane abari abayobozi b’igisirikare cya FLN nka Gen Hamada, kuko nzi ko azabibona na Jeva niba akibaho; nababwira nti ’akari inyuma karahanda’. Nta kintu njye ntakoze mu myaka itandatu namaze muri Opozisiyo.”

“Twaragerageje kuva mu 2013 ku bwa Kikwete, njye ninjiye muri Opozisiyo Karegeya na Kayumba bahita bansamira hejuru, dukorana inama imbonankubone, twagerageje ibintu byinshi kugira ngo duhungabanye iyi Leta ariko byaratunaniye.”

Sankara yavuze ko bamufashe yumva ko kera kabaye ubutegetsi bw’u Rwanda bugiye kuba amateka, ariko ko yibeshyaga.

Ati “Kugeza ku munota wa nyuma ubwo njye bamfataga, nari mfite amasezerano menshi nari maze guhabwa n’ubutasi bw’u Burundi n’ubwa Uganda, nizeraga ko ari igihe nyacyo cyo kwatsa umuriro nk’uko twabyifuzaga.”

“Leta y’u Rwanda ifite ubutasi bukomeye, ifite Umuyobozi ukomeye, iyi Leta irasobanutse, ifite amafaranga, ntabwo bazayirwanya ngo bayishobore.”

Yavuze ko hari abamunenga bavuga ko “yabaye akabwa” cyangwa se ko yayobotse. Ngo ntabwo ibyo abyitayeho kuko yemera ko mu gihe udashoboye kurwanya umuntu ngo umutsinde, icyo ukora ari ukumwiyungaho.

Ati “Njye narayobotse, niteguye kugororwa hano muri gereza, nkitegura kuba nasubira mu muryango nyarwanda tugafatanya kubaka igihugu.”

Yabwiye abantu bo mu ishyaka rye rya RRM bari hanze y’u Rwanda yaba muri Afurika y’Epfo, Canada, Amerika n’ahandi, ko Leta y’u Rwanda ntacyo yigeze imutwara kuva yafatwa, bityo ko nabo bakwiriye kumva ko intambara barwana batazayitsinda.

Yavuze ko we na bagenzi be bashutswe na Kayumba Nyamwasa mu bihe bitandukanye uhereye igihe yababwiraga ko mu Rwanda nta matora azaba, akabashuka bagatanga imisanzu ngo bazi ko igiye gukoreshwa mu kugura imbunda.

Ati “Yarangiza akayiguriramo amakamyo abantu bagasigara bavuga ngo twakurikiye igisambo [...] ikintu cyatuma abantu twari kumwe bakira uko gutenguhwa, ni ukuyoboka bakiyambura ishati y’ubugarasha bakambara iy’ubutore.”

Yavuze ko hari abacuruzi bari muri Malawi, Zimbabwe, Afurika y’Epfo n’ahandi badafitanye ikibazo n’u Rwanda ariko bahora bububa, badafite amahoro. Ati “Bazibukire ibyo barimo bashake uko bafatanya n’abandi twubake igihugu.”

Nsabimana yavuze ko muri gereza ari kwandika igitabo kivuga ku byo yanyuzemo byose.

Nsabimana Callixte yavuze ko umwanya yamaze arwanya Leta y'u Rwanda yawupfushije ubusa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .