Imbamutima z’abanyeshuri ba UR nyuma yo kongererwa bourse ikagera ku bihumbi 40 Frw

Yanditswe na Ndayikunda Josué
Kuya 13 Mutarama 2020 saa 11:30
Yasuwe :
0 0

Guhera muri uyu mwaka w’amashuri 2019/2020, ingano y’amafaranga abanyeshuri bahabwa yo kubafasha mu mibereho yabo ya buri munsi azwi nka ‘bourse’ yarongerewe ava ku bihumbi 35 Frw agera ku bihumbi 40Frw.

Kuva muri Nyakanga 2018, aya mafaranga yarongerewe ava ku bihumbi 25 Frw ku kwezi agera ku bihumbi 35 Frw hagamijwe kubungabunga imibereho y’umunyeshuri.

Mu Ugushyingo umwaka ushize, Minisitiri w’Intebe, Dr Edouard Ngirente, yatangarije abitabiriye ibirori byo gutanga impamyabumenyi ku banyeshuri ba kaminuza y’u Rwanda, ko buruse yakuwe ku bihumbi 35 igashyirwa ku bihumbi 40 y’u Rwanda ku kwezi.

Ibi byose byakozwe nyuma y’ubusabe bwari bumaze imyaka myinshi n’ubuvugizi bwagiye bukorwa n’inzego zitandukanye zirimo n’abagize Inteko Ishinga Amategeko, bagaragazaga ko amafaranga ya bourse ibihumbi 25 ku kwezi atakijyanye n’igihe.

Bavugaga ko bitewe n’aho ibiciro bigeze, ari ibibazo kuyahereza umunyeshuri ngo avanemo icumbi n’ibimutunga, ku buryo byatumaga bamwe mu banyeshuri bajya gushugurika abandi bakiga imyitwarire mibi.

Kongera bourse byakiranywe amashyi n’impundu cyane n’abanyeshuri ba UR n’ababyeyi babo, bagaragaje ko bizatuma biga neza batuje kuko bazajya babona buri kimwe bakeneye.

Bamwe mu baganiriye na IGIHE, bavuga ko ari umwanzuro mwiza muri rusange nubwo hari n’abavuga ko bitewe n’aho ishami ryabo riherereye amafaranga bongerewe nta kinini yahinduye ku buzima bari babayemo.

Tuyishime Gloria wiga muri UR ishami rya Huye, avuga ko kongererwa amafaranga bafataga byamufashije koroherwa no kwishyura restaurant nubwo izo aho yiga zongereye ibiciro.

Ati “Iyo amafaranga yiyongereye ubuzima nabwo burahinduka, niba narishyuraga restaurant bingoye ubu byaranyoroheye. Ikindi ni uko mu bijyanye n’imyigire biramfasha kubera ko ndya neza, ngafotoza amasomo mu mafaranga yanjye bitangoye.”

Ntirandekura Obed nawe wiga mu ishami rya UR i Huye, na we avuga ko indyo yahindutse nziza n’aho kuba hagahinduka.

Agira ati “Hari ukuntu umuntu yabaga mu nzu mbi ariko nyuma y’aho amafaranga yiyongereye twagiye muzisa naho ari nziza. Usanga uwaryaga umuceri kane mu cyumweru ubu avangamo n’agafiriti. Wasangaga umuntu arya ubunyobwa gusa ariko dusigaye tuvangamo n’intoryi.”

Ntirandekura akomeza avuga ko amafaranga yabafashije guhangana n’ibiciro by’ibiribwa nka kawunga n’umuceri basanze byarazamutse ku isoko, ndetse n’inzu ku bataba mu macumbi ya kaminuza.

Nyinawagaga Josephine wiga muri UR ishami ry’i Rukara, avuga ko ubu we yimutse mu nzu ya 15 000Frw akajya mu ya 2 0 000 Frw kandi iri hafi y’ikigo. Ikindi n’uko ubu ngo ku mafunguro ye ashobora no kuba yarya inyama, ibintu bitashobokaga mu gihe yafataga ibihumbi 35 Frw.

Ku rundi ruhande ariko bamwe mu banyeshuri biga muri UR ishami ry’Ubumenyi n’Ikoranabuhanga (UR-CST), bavuga ko impinduka bari biteze zihabanye cyane n’ibyo bari kubona ubu.

Turikumwe Emmanuel Lewis agira ati “Mu by’ukuri bakivuga ko amafaranga bayagize ibihumbi 40Frw twarabyishimiye cyane ariko nyuma twaje gusanga ikintu cyahindutse atari kinini cyane. Uyu mwaka bikimara kuba ibihumbi 40 Frw wagira ngo n’ibiciro byarabimenye birikuba.”

Turikumwe asanga abagena ukwiyongera kwa bourse badakwiriye kujya bashyira muri rusange kuko ngo UR ifite amashami menshi ari hirya no hino mu gihugu kandi ibiciro ku isoko atari bimwe.

Ati “Iyo abantu bari muri Huye, Musanze, Nyagatare cyangwa i Rukara bashobora kuba bumva banyuzwe n’ibihumbi 40Frw bitewe n’uko inzu n’ibyo kurya bidahenze ugereranyije no muri Kigali, aho usanga ibintu byose biba byihagazeho.”

Uyu munyeshuri na bagenzi be basaba ko abiga i Kigali bajya bongererwa ku mafaranga ya bourse bahabwa bitewe n’uko ibiciro byo mu mujyi bitandukanye n’ibyo mu ntara.

Kongerera bourse abanyeshuri ba UR byahinduye imibereho yabo n'imyigire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .