Imbamutima ku biga mu yisumbuye basubiye ku ishuri nyuma y’amezi 7 batabonana na mwarimu (Amafoto)

Yanditswe na Ishimwe Alain
Kuya 29 Ukwakira 2020 saa 08:23
Yasuwe :
0 0

Nyuma y’amezi asaga arindwi amashuri ariho imiryango mu kwirinda ikwirakwira ry’icyorezo cya Coronavirus, abiga mu mashuri yisumbuye bongeye gusubira kwiga.

Kuva umuntu wa mbere urwaye COVID-19 yagaragara mu Rwanda ku wa 14 Werurwe, amashuri ari mu byahise bifungwa ku ikubitiro [ku wa 16 Werurwe] mu rwego rwo kwirinda ko ikwirakwira rya Coronavirus.

Nyuma yaho ibikorwa bimwe na bimwe byarakomorewe ndetse Inama y’Abaminisitiri yo ku wa 25 Nzeri 2020 ni yo yemeje ko amashuri yongera gufungurwa.

Amagenzura atandukanye yakozwe na Minisiteri y’Uburezi yanzuye ko abanyeshuri batangira gusubira ku mashuri, tariki ya 29 Ukwakira 2020, mu byiciro.

Kuri uyu wa Kane, nibwo abiga mu yisumbuye batangiye gusubira ku mashuri yabo; aho ku ikubitiro habanje abo mu mwaka wa Gatatu, uwa Gatanu n’uwa Gatandatu.

Umunyamakuru wa IGIHE wageze kuri Stade ya Kigali i Nyamirambo aho abenshi bahagurukiye yasanze bitegura kurira imodoka berekeza ku ishuri.

Usibye ingamba zisanzweho zo kwirinda Coronavirus nko kwambara agapfukamunwa, gukaraba neza intoki no guhana intera, wasangaga abana baherekejwe n’ababyeyi babo ndetse n’abavandimwe, babatwaje ibikoresho birimo ibikapu, ibiryamirwa n’indobo.

Mbere yo kwinjira muri stade buri wese yabanzaga gukaraba umuti wabugenewe, akanapimwa umuriro mbere yo kwinjira mu modoka zibajyana ku ishuri.

Bamwe mu banyeshuri baganiriye na IGIHE bari bafite akanyamuneza batangaje ko bishimiye gusubira ku mashuri.

Kabatesi Ange wiga mu Mwaka wa Gatanu muri Collège de la Paix Rutsiro mu Burengerazuba yavuze ko bishimiye gusubira ku ishuri.

Yagize ati “Kuba dusubiye ku ishuri twabyakiriye neza cyane, byadushimishije nawe urabibona ko twishimye. Amasomo yo narayakurikiraga ariko hari nayo ntagiye nkurikira bitewe n’uko nabaga ndi mu mirimo itandukanye ariko hari ayo nabashije gukurikira.”

Yavuze ko yiteguye gukomeza ingamba zo kwirinda no kurinda bagenzi be COVID-19.

Ati “Ngiye no gukurikiza gahunda Leta yashyizeho yo kwambara agapfukamunwa, n’andi mabwiriza yose twiteguye kuyakurikiza. Icyo nasaba abayobozi b’ikigo ni uko ‘hand sanitizer’ yagera kuri buri muntu naho baduca amafaranga ariko atari menshi nyine ariko bakaziduha.”

Karekezi Robert wiga muri Ecole Technique de Kabgayi i Muhanga, yatangaje ko nubo bitari byoroshye mu bihe bya Corona virus ariko bishimiye gusubira ku mashuri.

Yanakomoje ku myitwarire igomba kuranga abanyeshyuri mu gihe bari mu kigo kugira ngo bataba intandaro yo kwanduzanya.

Yagize ati “Twebwe twiga tuba mu kigo, ibyo gutoroka ni ukubigendera kure, kuko natwe turabibona ko Coronavirus igihari. Icyo nasaba ubuyobozi bw’ikigo, buzareke tujye tumenya uko hanze byifashe. Gahunda ni ugukaraba intoki, guhana intera no kwirinda gukora ku bikoresh by’undi utabanje gukaraba intoki.”

Ababyeyi b’abanyeshuri bashimangiye ko bahanuye abana babo mbere y’uko basubira ku mashuri ku buryo bizeye ko bazitwara neza ndetse batazandura icyorezo.

Musabyimana Ferdinand yavuze ko yaherekeje umwana we ngo arebe ko ahagurutse atekanye, agana ku ishuri.

Yagize ati “Abagiye ku ishuri tuzakomeza tuvugane n’abayobozi b’amashuri kugira ngo bakomeze bacunge abana ku buryo batazahura na Coronavirus. Njye aho aho uwanjye yiga narahasuye ndeba uko biteguye ku buryo numva ko nta kibazo bazahagirira keretse banduye batari bahagera kandi murabona ko ariyo mpamvu nabaherekeje kugira ngo ndebe uko bubahiriza amabwiriza yo kwirinda.”

Undi mubyeyi wifuje ko izina rye rigirwa ibanga yavuze ko hari abatarabashije guteganya uburyo abana bazajya ku mashuri ku mpamvu zitandukanye.

Yagize ati “Ubundi kwiga kw’abana ni igenamigambi, aho bitandukanira n’ibindi ni uko ari iry’igihe kirekire. Hari ababyeyi batajya bagorwa no kwishyurira abana hakaba n’abo bigora ariko bagakoresha uburyo bwo gutegura hakiri kare ubwo bushobozi bukamoneka.’’

"Hari na ba bandi umwana aza mu biruhuko bakirirwa bamugaburira inyama n’amafiriti, bakongera gutekereza ishuri ari uko bagiye gutangira. Abo ni bo bigora by’umwihariko muri iki kiruhuko kirekire gutya cya COVID-19 nubwo tutakwirengagiza ko hari n’abatakaje imirimo yabo.”

Umukozi wa Minisiteri y’Uburezi ushinzwe igenzura mu mashuri abanza n’ayisumbuye, Hirwa Benjamin, yatangaje ko ibigo byiteguye kwakira abanyeshuri ku bufatanye n’inzego z’ibanze.

Yagize ati “Ifungurwa ry’amashuri ryatangiye harakozwe ubukangurambaga haba ku rwego rw’intara, uturere no mu mirenge n’abayobozi b’ibigo bose. Abakozi ba minisiteri bafatanyije n’inzego zose bireba bamaze igihe bategura uko itangira ry’amashuri rizagenda.’’

Yavuze ko Mineduc yahisemo kujyana abanyeshuri muri stade mu kwirinda ko bahurira muri gare nto bigatera umuvundo ndetse bamwe bakaba batakaza ibintu.

Akomeza agira ati “Turasaba ababyeyi ko bazana abana ku gihe kuko ku itariki ya kabiri ari umunsi wo kwiga atari uwo kugera ku ishuri. Icyo nsaba ababyeyi ni ukubahiriza ingengabihe abana bakazatangirira amasomo ku gihe.”

Abanyeshuri bagiye ku mashuri ni abiga mu Mwaka wa Gatatu, uwa Gatanu no mu wa Gatandatu mu mashuri yisumbuye. Ibindi byiciro bizatangira amasomo ku wa 23 Ugushyingo 2020.

Ababyeyi baherekeje abana babo mu rwego rwo kubatera akanyabugabo
Ababyeyi baherekeje abana babo nabo bagomba kubahiriza amabwiriza yo gukaraba intoki
Abanyeshuri akanyamuneza kari kose
Abanyeshuri bakoze ibishoboka byose kugira ngo bahagerere ku gihe
Abanyeshuri bari ku mirongo bajya gu katisha amatike
Bariteguye bihagije ntacyo basize inyuma n'ibiryamirwa ntibabyibagiwe
Abanyeshuri basobanukiwe neza akamaro ku guhana intera
Ntawinjiraga adakarabye intoki
Bazi neza ibijyanye no guhana intera
Abanyeshuri ntacyo bazashinja ababyeyi kuko babageneye n'akabando ko kwicumba ku rugendo
urukumbuzi rwari rwose
Imodoka zo gutwara abanyeshuri zari zihari ku bwinshi
Umubyeyi ntatana no guha umwana we impanuro zitandukanye
Umugenzuzi w'amashuri abanza n'ayisumbuye yavuze ko biteguye ku buryo buhagije
Ababyeyi banze gutaha batarabona ko abana babo bafashe imodoka

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .