Ikoranabuhanga ryatangiye kwifashishwa mu kugaragaza ubuhamya kuri Jenoside yakorewe Abatutsi

Yanditswe na David Eugène Marshall
Kuya 10 Ukwakira 2018 saa 12:32
Yasuwe :
0 0

Urwibutso rwa Jenoside rwa Kigali rwatangije uburyo buzajya bufasha mu kubona mu mashusho ubuhamya kuri Jenoside yakorewe Abatutsi mu 1994, n’ubushyinguro bw’ubuhamya bwa jenoside zabaye mu Isi busaga ibihumbi 55.

Uburyo buzwi nka iWitness bwifashisha mudasobwa na murandasi mu kubona ubuhamya kuri Jenoside yakorewe Abatutsi mu 1994. Bwitezweho gufasha abarezi cyangwa abanyeshuri, mu kurushaho gusobanura no gutanga inyigisho ku mahoro.

Uyu mushinga wagezweho ku bufatanye bw’Umuryango Aegis Trust, USC Shoah Foundation n’Urwibutso rwa Jenoside rwa Kigali.

Umuyobozi Mukuru Ushinzwe Ubushakashatsi muri Komisiyo y’Igihugu yo kurwanya Jenoside, Dr Jean Damascène Gasanabo, yavuze ko ubu buryo buzafasha urubyiruko rw’u Rwanda kumenya byinshi ku mateka ya Jenoside yakorewe abatutsi.

Yagize ati “Dushimishijwe no gutangiza ku mugaragaro ubu buryo, buzafasha urubyiruko rwacu kwiga no gusobanukirwa neza amateka y’u Rwanda, by’umwihariko aya Jenoside yakorewe Abatutsi, binyuze mu buhamya butandukanye.”

Umuyobozi wa Aegis Trust Africa, Freddy Mutanguha, yashimangiye ko iWitness izafasha mu kuzamura ubumenyi kuri Jenoside binyuze mu kureba ubuhamya butangwa n’abayirokotse.

Kuri uyu wa Kabiri kandi hatangijwe uburyo bw’ishyinguranyandiko ry’ikoranabuhanga, Visual History Archive (VHA). Ni ubushyinguro bw’ubuhamya busaga 55,000 kuri Jenoside yakorewe abatutsi n’izindi Jenoside n’ubwicanyi ndengakamere bwabaye ku Isi.

Ubwo buhamya bushobora kugaragara mu bihugu 15. U Rwanda rwabaye igihugu cya mbere muri Afurika mu kugira uburyo nk’ubwo.

Mutanguha yavuze ko kuba iki kigo gifite amateka ya Jenoside yakorewe abatutsi n’iyakorewe Abayahudi, abantu benshi bazajya bahasura.

Umuyobozi Ushinzwe ibikorwa muri USC Shoah Foundation, Dr. Kori Street, yavuze ko ubu buryo buzafasha abashakashatsi kubona amakuru batabanje gukora ingendo bajya ku yindi migabane.

Yagize ati “U Rwanda ni cyo gihugu cya mbere muri Afurika gifite ubushyinguro mu buryo bw’amashusho. Ni inkuru nziza ku bashakashatsi n’abandi bakora inyigo ku birebana na jenoside bahoraga bashakisha amakuru, ubu bashobora kuza ku Rwibutso rwa Jenoside rwa Kigali.”

Ubufatanye bw’ibi bigo, uretse mu kumenyekanisha amateka ya Jenoside, bwibanda mu gukusanya no kubika neza ubuhamya, ibikorwa by’ubushakashatsi n’ibyibanda ku burezi.

Mu mirimo iheruka kandi ibi bigo bikorana n’Urwibutso rwa Jenoside rwa Kigali, byafashije mu gutegura integanyanyigisho yifashishwa mu kwigisha ibirebana na Jenoside mu Rwanda.

Ibikorwa bya IWitness Rwanda kandi bizanashyirwa ku rubuga rwa internet rwitwa Ubumuntu rwa Aegis Trust.

Ubwo ku Rwibutso rwa Jenoside rwa Kigali hafungurwaga uburyo bwo kwerekana ubuhamya mu ikoranabuhanga kuri uyu wa Kabiri
Dr Gasanabo yagaragaje ko ubu buryo buzafasha mu kwigisha abakiri bato amateka ya Jenoside yakorewe abatutsi
Dr. Kori Street yagaragaje ko u Rwanda ari urwa mbere muri Afurika mu kugira uburyo bwo kwerekana ubuhamya mu ikoranabuhanga

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza