00:00:00 IGIHE NETWORK KN KINYARWANDA EN ENGLISH FR FRANCAIS

Ikimwaro ku Muryango wa Lantos ushyigikira ibikorwa by’iterabwoba

Yanditswe na Albert Rudatsimburwa
Kuya 16 Nzeri 2021 saa 09:39
Yasuwe :
0 0

Ku itariki 9 Nzeli, Umuryango wa Lantos wasohoye itangazo risaba Leta y’u Bwongereza kwanga impapuro zemerera Johnson Busingye guhagararira u Rwanda muri icyo gihugu, kubera ‘uruhare’ yagize mu rubanza rwa Paul Rusesabagina ukekwaho iterabwoba.

Itariki y’isohoka ry’iri tangazo yatunguye benshi, kuko ryasohotse mbere gato y’itariki ya 11 Nzeli, umunsi Isi yifatanyije na Amerika mu kwibuka isabukuru y’imyaka 20 ishize habaye ibitero by’iterabwoba ku butaka bwa Amerika, byahitanye abasaga 3000.

Uretse kwifatanya n’ababuriye ababo muri ibyo bitero, uyu ni n’umwanya wo kurwanya iterabwoba ku rwego rw’Isi no kwifatanya na buri wese uri kugira uruhare muri urwo rugamba.

Itangazo ry’Umuryango wa Lantos rivuga ko “wandikiye Ibiro by’Ububanyi n’Amahanga bya Amerika ndetse n’Ibiro by’Imari muri Gicurasi 2021…ndetse ukanageza [izo nyandiko] kuri Leta y’u Bwongereza. [Ariko] nta gihugu na kimwe cyagize icyo gikora [kuri iyi ngingo’.”

[Impamvu ibyo bihugu byirengagije ubusabe bw’Umuryango wa Lantos ni uko] Leta y’u Bwongereza na Leta Zunze Ubumwe za Amerika zirajwe ishinga no kurwanya iterabwoba ndetse n’u Bubiligi bwahaye ubushinjacyaha bw’u Rwanda amakuru ashinja Rusesabagina mu rubanza.

Ntibitangaje rero kuba Leta z’ibyo bihugu zarirengagije ubusabe bw’Umuryango wa Lantos wasabaga ko ibyo bihugu bijya ku ruhande rw’umuntu nka Rusesabagina ukekwaho iterabwoba, nyuma yo kwiyemerera uruhare yagize nk’Umuyobozi Mukuru wa FLN, mu bitero by’iterabwoba uwo mutwe wagabye ku Rwanda bigahitana ubuzima bw’inzirakarengane.

Icyo Umuryango wa Lantos utamenye ni uko utagena dipolomasi hagati y’ibihugu; kuko bigenwa n’inyungu rusange, aho kuba ibinyoma. Icyifuzo cy’Umuryango wa Lantos cyamaganywe na Leta y’u Bwongereza kuko gihabanye n’amahame y’Umuryango wa Commonwealth, kandi iterabwoba ntabwo rigize ayo mahame.

Birumvikana ko buri wese yakifurije ubutabera bwuzuye imiryango y’abagizweho ingaruka n’ibitero bya FLN ya Rusesabagina, byaguyemo abantu icyenda. Kuba abo bantu atari ibyamamare muri filime ntibisobanuye ko badakwiriye ubutabera bwuzuye.

Rusesabagina wakunze kugaragara kuri YouTube ndetse no mu yandi mahuriro avuga ko ihereza rya Leta ya Kigali riri hafi kubera ko ‘abasore be’ bari gukora akazi keza [ko guhungabanya umutekano mu bice by’Amajyepfo ashyira Iburengerazuba bw’u Rwanda], yatinye kugaruka mu Rwanda kuko yari azi ko ategerejwe n’ubutabera.

Hari video uyu mugabo avugamo ko ‘igihe cyo gushaka igisubizo hifashishijwe uburyo bw’ibiganiro’ cyarangiye, bityo ko iterabwoba kuri Leta yatowe n’abaturage ari cyo gisubizo cyonyine gisigaye cyo gukuraho Leta ya Kigali.

Kuba rero Rusesabagina yaratinyaga kuza mu Rwanda, ntabwo byatewe n’uko gusa yari afite ubwoba bw’uko Leta ya Kigali ‘izamugirira nabi’, [ahubwo byatewe n’uko yari azi ibyo yakoze, bitemewe n’amategeko y’u Rwanda ndetse n’amategeko mpuzamahanga]. Niyo mpamvu ibyafuzwe n’Umuryango wa Lantos [by’uko yatinye ko nagaruka mu Rwanda azagirirwa nabi] bidafite ishingiro, ahubwo bigamije kuyobya uburari.

Muri uwo mujyo wo kuyobya uburari, Umuryango wa Lantos uvuga kuba Busingye yaragizwe Ambasaderi mu Bwongereza, bifitanye isano n’urubanza rwa Rusesabagina, ariko nta bindi bimenyetso bishyigikira iki gitekerezo wagaragaje. Busingye yari amaze hafi imyaka 10 akuriye Minisiteri y’Ubutabera, kandi birumvikana ko hari igihe cyari kuzagera manda ye ikarangira.

Ikindi ni uko uyu mugabo yanakoze indi mirimo itandukanye mbere yo kuba Minisitiri w’Ubutabera, kandi manda ze muri izo nshingano zindi nazo zararangiye. Kuba Umuryango wa Lantos ugaragaza ko inshingano nshya yahawe zo guhagararira u Rwanda mu Bwongereza ari igihano, aho kuba andi mahirwe yo gukomeza gukorera igihugu cye, biteye urujijo cyane.

U Rwanda ruha agaciro cyane umubano rufitanye n’u Bwongereza, ku buryo buri muntu wese uhawe inshingano zo kurushaho kuwuteza imbere aba ari umukozi wizewe cyane.

Ikindi kimenyetso cyo kuyobya uburari cyagaragajwe mu itangazo ry’Umuryango wa Lantos, ni uko Leta yishyuye indege yagejeje Rusesabagina mu Rwanda kugira ngo ahabwe ubutabera, nyamara ntihagaragazwe ko Leta y’u Rwanda n’ubundi yishyuye imodoka zagejeje mu Rwanda abandi barwanyi 20 bari kuburanira hamwe na Rusesabagina, kuko atari ibyamamare nka we.

Umuryango wa Lantos ukwiye gutegereza icyemezo cy’Urukiko kizatangazwa vuba. U Bwongereza na Amerika bifitanye ubufatanye na Leta y’u Rwanda, mu ngeri zirimo kurwanya iterabwoba, ndetse ibi bihugu byakabaye byarakoze iyo bwabaga mu gufata Rusesabagina ubwo yari akiri mu mahanga. Gusa igifite agaciro magingo aya ni uko ari imbere y’ubutabera, kuba ‘ibyo bihugu bitaragiye ku ruhande rw’iterabwoba [ngo bishyigikire Rusesabagina]’, ni undi musanzu bagize mu guhangana n’iterabwoba.

Umuryango wa Lantos wakomeje kuyobya uburari ku bitero by'iterabwoba byakozwe na FLN iyobowe na Paul Rusesabagina

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .