Ikibazo cy’umugezi wa Sebeya kizaba ari amateka mu 2022

Yanditswe na Mukwaya Olivier
Kuya 11 Nyakanga 2020 saa 12:36
Yasuwe :
0 0

Ubuyobozi bw’Ikigo cy’Igihugu gishinzwe Umutungo Kamere w’Amazi mu Rwanda (RWB) bwatangaje ko ibibazo by’ibiza Umugezi wa Sebeya uteza bigasenya inzu z’abaturage, bigiye gucyemuka mu myaka ibiri iri imbere.

Ubuyobozi bwa RWB bwemeje ko bidasubirwaho ibibazo biterwa n’Umugezi wa Sebeya bizaba amateka kubera umushinga w’amaterasi y’indinganire arimo kubakwa mu misozi ihanamye mu Murenge wa Kanama mu Karere ka Rubavu ndetse no kubungabunga uyu mugezi.

Uyu mushinga ukaba ugamije kubungabunga ahantu nyaburanga hanyurwa n’utugezi duto tuvamo Sebeya hagamijwe kuzamura imibereho no kurengera umutungo kamere, hakazakorwa ahantu hareshya na kilometero kare 286 zinyura mu turere twa Rutsiro, Ngororero, Nyabihu na Rubavu.

Niyonzima Claude, umwe mu baturage bakunze gusenyerwa n’Umugezi wa Sebeya mu Murenge wa Nyundo, ashima ibi bikorwa agasaba ko byakorwa mbere ya Kanama imvura itaragaruka.

Ati “Badufashe rwose kuko Sebeya yataye umurongo wayo bigatuma ijya mu nzu z’abaturage, babikemuye byatuma tugira umutima utuje kuko ntidusinzira imvura iragwa ukikanga ngo iraje. Badufashe mu kwezi kwa munani bazabe barafunze bahereye aho yakunze kunyura iza mu baturage.”

Umuyobozi w’Akarere wungirije ushinzwe Iterambere ry’Ubukungu, Nzabonimpa Déogratias, agendeye ku bikorwa birimo gukorwa, avuga ko ikibazo cy’Umugezi wa Sebeya kizaba amateka.

Ati “Tumaze kubaka amaterasi y’indinganire ku buso bungana na hegitari 154.8 kandi tumaze guca amaterasi yiyubaka ku buso bungana na hegitari 158 n’imirwanyasuri yaciwe ku buso bungana na hegitari 805 ku materasi y’indinganire.”

“Hari ibyatsi bifata ubutaka n’ibiti bivangwa n’imyaka, icyizere kirahari cy’uko ibibazo bya Sebeya bizaba amateka kubera imbaraga n’amafaranga byashyizwe mu kubungabunga Sebeya, kubaka inkuta, ingomero zifata amazi ngo acike intege.’’

Umuyobozi w’Ikigo cy’Igihugu gishinzwe Umutungo Kamere w’Amazi mu Rwanda (RWB), Ngabonziza Prime, avuga ko iyi mirimo irimo gukorwa izagabanyiriza umuvuduko n’imbaraga Umugezi wa Sebeya.

Ati ’’Iyi mirimo igamije kubungabunga gufata neza icyogogo cya Sebeya duhereye aho imigezi irema Sebeya ihurira. Hano ni amaterasi y’indinganire aho dusanga hagomba amashyamba araterwa aho dusanzwe ari imirwanyasuri turayikora cyangwa ibiti. Mu kwezi kwa munani turatangira kubaka ingomero zigabanya umuvuduko w’amazi.’’

“Ibi bikorwa bigamije guhangana n’ingaruka z’ihindagurika ry’ikirere kuko tumaze iminsi tubona hagwa imvura nyinshi cyane uko itari iteganyijwe, ikagwa mu gihe tutari tumenyereye kandi ikaza ari nyinshi kandi bigatera isuri nayo ikisuka mu kabande muri Mahoko abantu bakimuka, hari naho tugira ibyago abantu bakitaba Imana’’.

Yakomeje avuga ko uyu mushinga watangiye muri Kamena 2019 bikaba biteganyijwe ko uzarangira mu 2022.

Ngabonziza avuga ko miliyari 22 Frw zirimo gukoreshwa mu kurangiza ibibazo byose biterwa n’Umugezi wa Sebeya.

Uyu mushinga w’imyaka itatu uri gushyirwa mu bikorwa n’Ikigo Gishinzwe Umutungo Kamere w’Amazi mu Rwanda ku bufatanye n’Umuryango Mpuzamahanga wita ku kubungabunga Ibidukikije (IUCN) ndetse n’Ikigo cy’Abaholandi gishinzwe Iterambere (SNV) ku nkunga y’Ambasade y’Abaholandi.

Mu Murenge wa Kanama, uyu mushinga umaze gukora hegitari zisaga 65 z’amaterasi y’indinganire, ni mu gihe mu Karere kose ka Rubavu hakozwe amaterasi afite hegitari zisaga 150. Uyu mushinga ukaba uri gukorera mu turere twa Rubavu, Rutsiro, Nyabihu na Ngororero.

Amaterasi aratunganywa agaterwaho ubwatsi bw'amatungo n'ibiti bivangwa n'imyaka
Amwe mu materasi yamaze gutunganywa
Amwe mu materasi yatewe mu Murenge wa Kanama
Ubuyobozi bwemeza ko mu 2022 ikibazo cy'umugezi wa Sebeya kizaba ari amateka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .