00:00:00 IGIHE NETWORK KN KINYARWANDA EN ENGLISH FR FRANCAIS

Ikibazo cy’imirire mibi mu Ruhango cyahagurukije inzego

Yanditswe na Prudence Kwizera
Kuya 21 Ugushyingo 2022 saa 08:49
Yasuwe :

Hagamijwe kurandura imirire mibi mu bana no guca umwanda, mu Karere ka Ruhango hatangijwe amarushanwa y’isuku no kurwanya igwingira mu kwezi kwahariwe ibikorwa bya Polisi y’u Rwanda.

Ayo marushanwa azibanda ku isuku n’isukura no kurwanya igwingira ry’abana hanozwa itegurwa ry’amafunguro yabo.

Muri uko kwezi kwatangiye tariki ya 15 Ugushyingo 2022 kukazasozwa tariki 18 Ukuboza 2022 hazibandwa ku bikorwa birimo gukora isuku aharemera amasoko,restaurant ,gare n’ahandi hatandukanye hahurira abantu benshi.

Hari kandi isuku mu ngo mbonezamikurire y’abana bato n’amarerero; isuku mu ngo z’abaturage n’ahazikikije; ubukangurambaga n’ubudasa bw’ingamba zihariye buri murenge washyizeho mu guhangana n’isuku nke n’igwingira ry’abana.

Umuyobozi w’Akarere ka Ruhango Wungirije Ushinzwe Iterambere ry’Imibereho y’Abaturage, Mukangenzi Alphonsine yabwiye IGIHE ko bifuza ko isuku igaragara hose, umwanda ugacika burundu.

Yavuze ko ubusanzwe bamaze imyaka ine baratangije gahunda ya ‘Ruhango Icyeye’ bityo uyu ari umwanya ku bufatanye na Polisi babonye wo gukora igenzura no kureba ahakiri icyuho kugira ngo bakizibe.

Yagize ati “Nta byacitse ihari ngo tuvuge ngo abana barwaye inzoka bameze nabi cyane cyangwa ngo abaturage barasa nabi cyane ariko ntabwo twavuga ngo twarabirangije, isuku isaba guhozaho no guhora wibutsa buri wese kugira ngo adahuga na gato.”

Abana 12 barwariye imirire mibi mu bitaro

Mukagenzi yavuze ko muri uku kwezi kwahariwe ibikorwa bya Polisi y’u Rwanda bazibanda no ku gutoza ababyeyi kwita ku gutegura indyo yuzuye bakumira imirire mibi n’igwingira bikunze kwibasira abana bari munsi y’imyaka itanu y’amavuko.

Yavuze ko igenzura bakoze mu 2021 ku bufatanye n’Abajyanama b’Ubuzima ndetse n’Abakozi bo mu rwego rw’ubuzima basanze bagifite abana bangana na 29,5% bagwingiye.

Ubushakashatsi bwakozwe n’Ikigo cy’Igihugu cy’Ibarurishamibare mu 2015 bwagaragaje ko mu Karere ka Ruhango abana bagwingiye bangana na 38,5%.

Yavuze ko kuri ubu bategereje ubundi bushakashatsi buzemeza neza intambwe yatewe mu kugabanya igwingira mu bana.

Mukagenzi yavuze ko kugeza ubu bafite abana 12 bari mu bitaro kubera ko barwaye imirire mibi.

Ati “Gahunda twafashe ni ukubashyira mu bitaro kugeza igihe bakiriye bakabona gutaha. Ubu dufitemo abana 12 bari mu mirire mibi, bari mu ibara ry’umuhondo ntabwo barembye ni ibintu bikosoka mu gihe gito.”

Yasabye abaturage kwimakaza isuku kuko nayo iri mu bitera imirire mibi abibutsa ko umuntu uriye ibiryo byanduye ntacyo bimumarira usibye kumutera indwara.

Muri ayo marushanwa, akarere kazahiga utundi kazahembwa imodoka nshya naho umurenge uhembwe miliyoni 25 Frw.

Abaturage bo mu Karere ka Ruhango bavuze ko biteguye kwegukana ibyo bihembo kandi bazakomeza kwita ku isuku
Umuyobozi w'Akarere ka Ruhango Wungirije ushinzwe iterambere ry'imibereho myiza y'abaturage, Mukangenzi Alphonsine atanga ibinini by'inzoka ku bana
Umuyobozi wa Polisi mu Karere ka Ruhango, SP Nkeramugaba Sano yijeje abaturage ubufatanye mu kurwanya imirire mibi n'isuku nke
Basabwe kurangwa n'isuku muri byose bakayigira umuco

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .