Ihohoterwa rishingiye ku gitsina rikorerwa abana bari munsi y’imyaka 10 rikomeje kwiyongera cyane

Yanditswe na Uwimana Abraham
Kuya 17 Ugushyingo 2020 saa 11:17
Yasuwe :
0 0

Raporo ya Komisiyo y’Imibereho Myiza y’Abaturage n’Uburenganzira bwa Muntu muri Sena y’u Rwanda, yerekana ko kuva mu 2018 kugeza mu 2020, mu birego by’ihohoterwa rishingiye ku gitsina byakiriwe n’Urwego rw’Igihugu rw’Ubugenzacyaha, RIB, harimo 2167 by’ihohoterwa ryakorewe abana bari munsi y’imyaka icumi.

Nk’uko imibare yo muri iyo raporo iri bumurikirwe Inteko Rusange ya Sena kuri uyu wa 17 Ugushyingo 2020 ibigaragaza, mu 2018/19 gusa, hatanzwe ibirego by’ihohoterwa rishingiye ku gitsina 3215, muri ibyo 3135 ni ibyakorewe abakobwa naho 80 ni ibyakorewe abahungu.

Muri uwo mubare kandi 928 ihwanye na 29% ni ibirego by’ihohoterwa ryakorewe abana bari munsi y’imyaka icumi, mu gihe 2287 ari ibyakorewe abana bari hagati y’imyaka 11 na 17.

Ni mu gihe mu 2019/2020 hatanzwe ibirego 4265; muri byo 4154 ni ibyakorewe abakobwa, naho 111 byakorewe abahungu.

Muri byo kandi 1239 ni ibyakorewe abana bari munsi y’imyaka 10, mu gihe 3026 ari ibyakorewe abari hagati y’imyaka 11 na 17.

Iyi raporo yizweho na Komisiyo y’Imibereho myiza y’Abaturage n’Uburenganzira bwa Muntu muri Sena, iri mu biganirwaho kuri uyu wa wa 17 Ugushyingo mu Nteko Rusange ya Sena, hacukumburwa impamvu zihishe inyuma y’ubwiyongere bw’inda ziterwa abangavu.

Iyi raporo yakozwe nyuma y’uko bisabwe na Sena muri Gashyantare uyu mwaka, hamaze kurebwa raporo y’ibikorwa by’umwaka wa 2018/19 ya Komisiyo y’Uburenganzira bwa Muntu, yagaragagaje ikibazo cy’ubwiyongere bw’ihohoterwa rishingiye ku gitsina rikorerwa abana n’inda ziterwa abangavu.

Icyo gihe Komisiyo y’Imibereho myiza n’Uburenganzira bwa muntu n’ibibazo by’abaturage, yahise isabwa gucukumbura icyo kibazo, ikagaragaza impamvu abakuze bakomeza guhohotera abana, ingaruka z’icyo kibazo ndetse n’inama yatanga kugira ngo icyo kibazo kiranduke burundu.

Umuntu wese uhamijwe n’urukiko icyaha cyo gusambanya umwana ufite cyangwa uri hejuru y’imyaka 14, ahanishwa igifungo kitari munsi y’imyaka 20 ariko kitarengeje imyaka 25. Iyo uwahohotewe ari munsi y’imyaka 14, igihano kiba igifungo cya burundu.

Ubwiyongere bw’ibyaha by’ihohoterwa rishingiye ku gitsina rikorerwa abana, bwatumye benshi bahaguruka bakavuga, basaba ko hafatwa izindi ngamba zikarishye kugira ngo iki kibazo gicike burundu.

Muri Nyakanga uyu mwaka, Umunyamabanga Mukuru wa RIB, Rtd Col Ruhunga Jeannot, yavuze ko hakenewe ubukangurambaga bwisumbuyeho kugira ngo abantu bashishikarire kurwanya iki kibazo.

Yagize ati “Byose biterwa n’ubukangurambaga n’uburyo ayo makuru yakirwa, n’uburyo abantu biteguye kumva ko birambiranye bagahitamo kubitangaza. Iyi ni intambara itatsindwa n’uruhande rumwe, dukwiye twese kubigiramo uruhare.”

Kuva mu 2015 kugeza mu 2019, abana 78.000 bavutse ku bangavu, imibare iheruka igaragaza ko umwe mu bakobwa batanu b’Abanyarwandakazi, ni ukuvuga 20.8% y’abafite imyaka 19 aba abyaye umwana wa mbere.

Umuyobozi wa Centre Marembo, ikigo cyita ku bangavu bahohotewe bagaterwa inda, Nsabimana Nicolette, yabwiye The New Times ko impamvu abana benshi batarega ababahohoteye biterwa n’ihungabana ndetse no kwicira urubanza.

Ati “Abakobwa benshi bahohotewe bagira ubwigunge, bagahezwa, bigatuma bicira urubanza. Bicira urubanza bakumva ko na sosiyete izabacira urubanza, uko kwirenganya nibyo bituma batareka ababahohoteye.”

Impirimbanyi y’uburenganzira bw’abagore n’abana yatangaje ko igihe kigeze kugira ngo ababyeyi batangire baganirize abana babo ku byerekeye ubuzima bw’imyororokere, akavuga ko idini n’umuco bitakwiye gutuma abantu bumva ko abana badafite uburenganzira bwo kumenya iby’ubuzima bw’imyororokere kuko ibihe byahindutse.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .