00:00:00 IGIHE NETWORK KN KINYARWANDA EN ENGLISH FR FRANCAIS

Igura ry’abakinnyi mu Bwongereza ryatwaye miliyari 2400 Frw; Dieng asiga inkuru

Yanditswe na Iradukunda Olivier
Kuya 2 September 2022 saa 01:41
Yasuwe :

Isoko ry’igura n’igurisha ry’abakinnyi ku mugabane w’i Burayi ryasojwe, aho amakipe yose yiyubatse ku buryo bukomeye agatanga amafaranga atubutse cyane cyane ayo mu Bwongereza, kuko yo yatanze agera kuri miliyari 2 z’ama-pound, ni ukuvuga asaga miliyari 2400 Frw.

Chelsea ni yo yatanze amafaranga menshi, kuko yatanze miliyoni zisaga 300 z’amayero habariwemo n’ayatanzwe kuri Pierre-Emerick Aubameyang winjiyemo ku munsi wa nyuma.

Gusa nubwo ariyo yatanze menshi ariko, ntabwo ari yo yaguze abakinnyi benshi, ahubwo ni Nottingham Forest yinjije abakinnyi 19.

Muri ayo mafaranga yose, miliyoni zisaga 100 z’amayero zagiye ku mukinnyi umwe waguzwe na Manchester United witwa Antony, avuye muri Ajax, andi agenda ku bandi basigaye barenga 140 bagiye mu makipe yo muri Premier League.

Brighton and Hove Albion ni yo yungutse amafaranga menshi, kuko ubaze ayo yakoresheje igura abakinnyi ni make ku yo yinjije. Iyi kipe yaguze abakinnyi ba miliyoni 47,8 z’amayero, igurisha aba miliyoni 113 z’amayero.

Hanze y’u Bwongereza, FC Barcelona yinjije abakinnyi barimo Rafinha, Lewandowski, Jules Koundé, Marcos Alonso na Héctor Bellerín.

Mu Butaliyani (Serie A) naho isoko ryararemye. Paul Pogba yavuye muri Manchester United asubira muri Juventus. Iyi Shampiona kandi yongeye gusubirana rutahizamu Romelu Lukaku wavuye muri Chelsea, asubira muri Inter Milan.

Mu Budage, ni ho uwahoze ari rutahizamu wa Liverpool, Sadio Mane, ari kubarizwa muri Bayern Munich kugira ngo azibe icyuho cya Robert Lewandowski.

Iyi kipe kandi yinjije Ryan Gravenberch wavuye muri Ajax na Matthijs de Ligt wavuye muri Juventus. Abakinnyi bose yinjije bayitwaye miliyoni 117,5 z’amayero.

Iri soko ku mugabane w’i Burayi risize bamwe mu bakinnyi bashya baguzwe baratangiye kwerekana ikinyuranyo. Mu Bwongereza Erling Haaland na Lewandowiski muri Espagne, bayoboye abatsinze ibitego byinshi muri shampiyona.

Dieng yabuze ikipe ku munota wa nyuma

Imwe mu nkuru zaranze umunsi wa nyuma w’igura n’igurisha ni iy’umukinnyi wo muri Sénégal, Bamba Dieng, ukinira Marseille yo mu Bufaransa.

Yari yumvikanye na Leeds United yo mu Bwongereza ko agomba kugurwa miliyoni 8,6£ ku buryo n’umuherwe w’iyo kipe, Andrea Radrizzani, yari yatangaje ko uyu musore ari umukinnyi we mushya.

Dieng yahise ashakirwa indege yihariye imukura mu Bufaransa ikamugeza mu Bwongereza, gusa ageze ku kibuga cy’indege, yakira amakuru ko Nice yo mu Bufaransa imushaka cyane, ahita akata aba ariyo ajya gukoramo ikizamini cy’ubuzima.

Mu Bwongereza bari bamutegereje baguye mu kantu ubwo bari bumvise ko yakase akajya gukora ibizamini by’ubuzima muri Nice.

Gusa icyatunguranye ni uko yaje gutungurwa n’uko yatsinzwe icyo kizamini, kuko yasanganywe imvune.

Gusa mu gitondo cyo kuri uyu wa Kane yongeye guhura n’abaganga kugira ngo bemeze uburemere bw’imvune ye.

Aracyafite amahirwe yo kujya muri Nice kuko amategeko yo mu Bufaransa yemera ko amakipe ashobora guhana umukinnyi ku munsi ukurikira uwa nyuma w’igura n’igurisha, ariko bigakorwa ari amakipe y’imbere mu gihugu.

Robert Lewandowski ahagaze neza muri FC Barcelone
Haaland akomeje gutsinda ibitego muri Man City kuko mu minota itanu, ibiri yatsinzemo ibitego bitatu muri buri umwe
Rukaku yasubiye muri Inter Milan yahozemo
Aubameyang yasubiye mu Bwongereza asinyira Chelsea
Dieng yagombaga kujya muri Leeds akatira ku Kibuga cy'Indege ajya muri Nice ahageze atsindwa ikizamini cy'ubuzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .