Igitangaza! Ubuhamya bwa Uwase wakize mu munsi umwe ubumuga yari amaranye imyaka itanu

Yanditswe na Hakizimana Jean Paul
Kuya 18 Nzeri 2019 saa 01:29
Yasuwe :
0 0

Igitangaza cyabaye! Umukobwa w’imyaka 16 witwa Uwase Noella wari umaze imyaka itanu atavuga, zimwe mu ngingo z’umubiri we zaramugaye ku buryo atabashaga kugenda cyangwa kwicara, zarambutse aragenda nyuma yo kubonekerwa na Yezu ubwo yari aryamye iwabo mu rugo.

Iki gitangaza cyabaye kuwa Kane tariki 12 Nzeri 2019 ahagana saa tatu z’amanywa kibera mu Mudugudu wa Kizenga, Akagari ka Gatugunda, mu Murenge wa Zaza, Akarere ka Ngoma.

Kuva muri Werurwe 2015 uyu mwana w’umukobwa wigaga mu wa gatanu w’amashuri abanza yafashwe n’indwara itazwi, ananirwa kuvuga, amaguru arikunjakunja ku buryo atabashaga no kwicara. Ngo kugira ngo avugane n’abantu byasabaga kumuha telefone akandikamo cyangwa agakoresha ikaramu n’urupapuro.

Agifatwa ngo ababyeyi bahise batangira kumuvuza bamujyana ku Kigo Nderabuzima cya Zaza, mu bitaro bikuru bya Kibungo, ibitaro bya Gahini n’ahandi henshi hakomeye biba iby’ubusa kuko hose baburaga indwara.

Rushengura Telesphore, ubyara uyu mwana yagize ati “ Uburwayi bwe bwarantunguye cyane kuko bwaje buhita bumumugaza, mujyana mu bitaro bishoboka byose bakambwira ko indwara yarwaye babona batayizi”.

Abaganga b’i Gahini bavura ibijyanye n’imitsi n’ingingo barasuzumye bavuga ko nta kintu arwaye ndetse hifashishijwe n’abanyamasengesho birananirana.

Yezu yaramubonekeye amwemerera kumukiza

Uwase Noella yabwiye IGIHE ko ajya kwiyumvamo ko azakira byatangiye mu ntangiriro z’uyu mwaka, ubwo yabonaga abandi bana bagiye ku ishuri agahinda n’amarira akabitura Imana.

Ati “Nari nababajwe nuko abandi bana bajya kwiga njye nkasigara ndyame ndangije nsenga Imana nyereka akababaro kanjye nyisaba ko yampa ubushobozi bwo kugenda no kuvuga nk’abandi, hashize umwanya ndasinzira mbona Yezu araje ankozeho ansaba kurambura ukuguru ndakurambura kukajya kundya nkongera nkahina.”

“Kuva uwo munsi natangiye kugira icyizere ko nzakira, najya nsigara njyenyine nkagerageza kurambura amaguru gake gake, ejo bundi kuri 31 Kanama, Yezu yarongeye aransura ansaba kwiyiriza, bukeye ndabikora arongera aransura ansaba kubwira ababyeyi ngo bangurire kamambiri z’ubururu n’imbago ngo kuko ngiye gukira mu minsi mike.”

Uwase akomeza avuga ko yabwiye ababyeyi be kumukorera ibyo Yezu yamubwiye bakabanza kwanga kwemera ahubwo bakamuhata imiti bakuye kwa muganga, nyamara Imana yari yaramubwiye ko izamukiza bidasabye imiti yo kwa muganga.

Uko igitangaza cyabaye Uwase agakira

Uwase avuga ko igitangaza cyabaye ku itariki 12 saa tatu z’amanywa ubwo yari aryamye.

Ati “Yezu yarongeye arambonekera ansaba kujya mu cyumba nkafata inkweto ziriyo, ngenda nkambakamba ndazifata, mpagurutse mbona biremeye, mbumbuye umunwa ngo mvujye nabyo biremera mpita nsuka amazi ndakaraba ubundi nicara ku irembo ndindira ababyeyi banjye ngo bave guhinga.”

Ababyeyi bakihagera ngo amarira n’ibyishimo byarabasaze bararira bahamagara abaturanyi bafatanya gushima Imana ngo kuko bari bamaze imyaka myinshi bamuvuza, bamujyana mu nsengero ariko byaranze.

Amasengesho no kwizera bihindura byinshi

Uwase avuga ko kimwe mu byatumye akira harimo kwizera Imana ubundi akanya kose akayisenga akayereka ikibazo cye, asaba abantu kwizera Imana mu byo bakora byose.

Ati “Buri munsi uko nasengaga nasabaga Imana kunkiza nanjye nkazagirira umumaro umuryango wanjye. Nahoraga nshengurwa no kuba naramugaye nta ruhare nabigizemo gusa nkizera ko nzakira kuko uko nasengaga Imana yarampumurizaga.”

Yasabye abantu kwizera Imana ngo kuko iriho kandi ivugana n’abayizera, ngo ushaka kubihakana azamurebe abimuhamirize.

Mukakimana Theresa uturabye n’uyu muryango we avuga ko akurikije igihe uyu mwana yari amaze arwaye yabwiwe ko yakize akanga kubyemera.

Ati “Bakimbwira ko yakize ntabwo nabyemeye kuko nazaga hano kenshi nkasanga araryamye ntavuga, ntahindukira nkibaza amaherezo bikancanga, nuko mama we aza kundeba ambwira ko umwana we yakize mbanza gushidikanya mpageze nsanga aragenda mfatanya nabo gushima Imana.”

Kugeza ubu Uwase ari kwifashisha imbago kugira ngo zimufashe kumenyereza amaguru ye kugenda no gukomeza imitsi yari imaze imyaka itanu ihinamiranye.

Uwase Noella ari kumwe n'ababyeyi be gusa aracyagendera ku mbago ngo imitsi irambuke
Ababyeyi be baguye mu kantu basanze agenda yari amaze imyaka itanu aryamye
Uwase avuga ko yabonekewe na Yezu akamukiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza