00:00:00 IGIHE NETWORK KN KINYARWANDA EN ENGLISH FR FRANCAIS

Igisobanuro cy’impano Musenyeri Rukamba yageneye Perezida Kagame

Yanditswe na Prudence Kwizera
Kuya 13 Ugushyingo 2022 saa 06:56
Yasuwe :

Musenyeri wa Diyoseze Gatolika ya Butare, Philippe Rukamba, yizihije Yubile y’imyaka 25 amaze abaye Umwepisikopi, agenera impano Perezida Paul Kagame, amushimira uko yafashije u Rwanda gutera imbere no kugira umutekano usesuye.

Kuri uyu wa Gatandatu, tariki ya 12 Ugushyingo 2022, ni bwo Musenyeri Rukamba yizihije Yubile y’imyaka 25 amaze abaye Umwepisikopi, inshingano yahawe ku wa 12 Mata 1997.

Ibirori byo kwizihiza iyo yubile byabereye imbere ya Kiliziya ya Cathedrale ya Butare bitangizwa n’igitambo cya misa cyayobowe na Arkiyepiskopi wa Kigali, Antoine Cardinal Kambanda.

Umushyitsi mukuru yari Minisitiri w’Intebe, Dr Ngirente Edouard, wahagarariye Perezida Kagame.

Musenyeri Rukamba yavuze ko yagizwe Umwepisikopi mu bihe bitoroshye ariko yakoze umurimo we nk’umugaragu.

Ati “Hari ku wa Gatandatu tariki ya 12 Mata 1997 ni cyo gihe naherewe Ubwepisikopi muri iyi Kiliziya. Cyari igihe gikomeye, icyo gihe mu gihugu hose hari umutima mubi w’agahinda n’urwango, cyari igihe cy’amarira menshi nyuma y’imyaka itatu gusa Jenoside yakorewe Abatutsi ibaye.”

Yavuze ko yavutse ari umwana wa Kiliziya, ahabwa amasakaramentu yose, ababyeyi be bamurera neza ari naho Imana yanyuze imuha imirimo y’ubupadiri n’ubwepisikopi.

Yasobanuye ko mbere yo kuba Umwepisikopi yigishijwe n’Abapadiri babiri aribo Paul Bourgeois na Rwahundi Claver.

Ati “Mu nyigisho Padiri Rwahundi yampaye yanyumvishije ko ndi umugaragu kandi ko akora igishimisha shebuja. Yambwiye ko ntagomba kubwira Imana ngo nagukoreye iki none na we urampe kiriya.”

Yabibukije ko mu Kinyarwanda bavuga ngo ‘Imana iraguha ntimugura kuko iyo muguze iraguhenda’.

Ati “Umurimo wanjye rero nk’umushumba w’iyi diyoseze nawukoze nk’umurimo w’umugaragu ugerageza gukora icyo shebuja yifuza mu mbaraga mfite ntiganyira."

Yavuze ko mu myaka 25 amaze ari Musenyeri amaze guha ubupadiri abagera ku 106 n’umwepisikopi umwe.

  Yageneye impano Perezida Kagame

Musenyeri Rukamba mu gusoza ijambo rye yavuze ko ashaka gutanga impano yageneye Perezida Kagame, asaba Minisitiri w’Intebe kuzayimushyikiriza.

Yagize ati “Iyi mpano twagiraga ngo tubasabe nyakubahwa Minisitiri w’Intebe kuzayishyikiriza Nyakubahwa Perezida wa Repubulika. Muzamubwire ko tumushima kubera umutekano dufite no kubera intumbero ngari yo kubana neza no kumvikana byo gukora umurimo unoze no kwigira no kugira amajyambere agera ku muturage.”

Ni impano y’igihangano kigizwe n’amashusho agera kuri atandatu arimo ishusho y’u Rwanda; Kirisitu Umwami, Bikira Mariya; abantu bafatanye urunana; inuma n’ibiti by’imizeti.

Yakomeje avuga ko iyo mpano ifite igisobanuro cyihariye bitewe n’amashusho ayiriho.

Yavuze ko ishusho ya mbere igaragaza Kirisitu Umwami isobanura uko tariki ya 27 Ukwakira 1946 Umwami w’u Rwanda Mutara III Rudahigwa yatuye u Rwanda Kirisitu Umwami abikorera i Nyanza muri Diyoseze ya Butare.

Yakomeje avuga ko ishusho ya Bikira Mariya isobanura uko ku wa 28 Ugushyingo 1981 yabonekeye abana b’abakobwa i Kibeho kugeza ku wa 28 Ugushyingo 1989. Icyo gihe i Kibeho hari muri Diyoseze ya Butare.

Yasobanuye ko icyo gihe Bikira Mariya ‘yari yaje kutuburira no kutubwira guhinduka no gusenga kugira ngo icyago gikomeye kitatugwaho’.

Ati “Iri shusho mureba rero mbere na mbere hari Kirisitu Umwami, ni ishusho rijyana n’iyobokamana ryacu; hakaba n’umubyeyi Bikira Mariya bombi basigasiye u Rwanda.”

Yakomeje ati “Ubumwe no gushyira hamwe, gufatana urunana ni byo bigize umutima w’iki gihugu, ni nabyo biduha amahoro. Abanyarwanda bose ntibashobora kujya muri iriya shusho ariko hari abantu bakeya bafatanye urunana, ni wo mutima w’igihugu cyacu.”

Musenyeri Rukamba yavuze ko Kiriziya yerekana Roho Mutagatifu uhora amurikira abantu akabaha amahoro.

Ati “Ni yo mpamvu mubona ishusho y’inuma, ni roho mutagatifu ni inuma y’amahoro, noneho munsi mukabona amababi y’umuzeti avuga amahoro. Amahoro kandi agaragazwa n’ariya mashami y’imizeti ari muri iriya shusho, bitwereka nyine ko aho tugana ariho Imana yifuza ari kuri ariya mahoro.”

Yavuze ko iyo mpano isobanuye ko umutima wa gikirisitu w’u Rwanda ugomba gutuma abantu babana neza nk’abavandimwe.

Ati “Kiriya gihangano rero kiratubwira ko umutima wa gikirisitu w’u Rwanda ukomoka kuri Kirisitu na Bikira Mariya ugomba gutuma tuba abavandimwe tukabana mu rukundo kandi tukaba abanyamahoro kuko amahoro yerekana Imana.”

Musenyeri Rukamba yashimiye abepisikopi n’abapadiri ndetse n’abakirisitu bakorana uburyo bafatanya muri byose bagamije ineza ya muntu.

By’umwihariko yashimiye inzego zitandukanye za Leta bafatanya guteza imbere igihugu n’imibereho myiza y’abaturage.

Musenyeri wa Diyoseze Gatolika ya Butare, Philippe Rukamba, yatumye Minisitiri w’Intebe, Dr Ngirente Edouard, kuri Perezida Kagame ngo azamushimire ku musanzu we wo gufasha u Rwanda gutera imbere no gutekana bisesuye
Musenyeri Rukamba mu gusoza ijambo rye yavuze ko ashaka gutanga impano yageneye Perezida Kagame, asaba Minisitiri w’Intebe, Dr Ngirente Edouard, kuzayimushyikiriza
Impano Musenyeri Philippe Rukamba yageneye Perezida Kagame ifite igisobanuro cyerekana ko ubumwe bukwiye kwimakazwa
Abihayimana batandukanye bitabiriye ibirori byo kwizihiza Yubile y'imyaka 25 Musenyeri Rukamba amaze abaye Umwepisikopi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .