00:00:00 IGIHE NETWORK KN KINYARWANDA EN ENGLISH FR FRANCAIS

Inama z’impuguke mu bukungu mu gihe u Rwanda rwaba rutewe n’ikindi cyorezo

Yanditswe na Ndahayo Emmanuel
Kuya 15 July 2022 saa 12:11
Yasuwe :

Mu myaka ibiri ishize, ubuzima turimo uyu munsi bwari bwarabaye nk’inzozi, kuko imibereho ya muntu isanzwe yari yarahindutse, byose bigizwemo uruhare na Covid-19.

U Rwanda ruri mu bihugu byafashe ingamba zikakaye zo kwirinda iki cyorezo, aho ruri mu byabimburiye ibindi mu gushyiraho ingamba za Guma mu Rugo ku Mugabane wa Afurika, iya mbere imara iminsi igera kuri 45 yose, aho iri mu ndende zatanzwe kuri uyu Mugabane.

Icyakora inkingo zaraje, aho abarenga 65% by’Abanyarwanda bakingiwe mu buryo bwuzuye, bigatuma ubukana bw’iki cyorezo bukendera mu gihe ubuzima busa nk’uburi kugaruka ku murongo mu buryo bwuzuye.

Icyakora nubwo bimeze gutyo, haracyari kare gutangaza ko Covid-19 yacitse intege burundu, kuko ishobora kuza yihinduranyije igaca igikuba nanone, cyangwa se indi ndwara nka ‘smallpox’ n’izindi zandura, ikaba yakwira ku Isi bikaba ngombwa ko ingamba za Guma mu Rugo zishobora kongera gukenerwa.

Mu gihe byagenda gutya, hibazwa uko byagenda ku Rwanda na cyane ko nubwo rwabashije guhashya Covid-19, rwashyize ubukungu bwarwo mu bibazo kuko bwagabanutseho 3.4% mu 2020, ndetse n’inguzanyo z’u Rwanda zikagera hejuru ya 70% by’umusaruro mbumbe muri rusange.

Mu nama yahuje Banki Nkuru y’u Rwanda n’Ikigo cya IGC gifasha ibihugu biri mu nzira y’amajyambere mu kubaka ubukungu burambye, yagarutse ku byakozwe mu bihe bya Covid-19, bigafasha ubukungu bw’u Rwanda kwigobotora icyo cyorezo,

Umuyobozi w’Ishami rishinzwe Politiki y’Ifaranga muri Banki Nkuru y’u Rwanda, Prof. Kasai Ndahiriwe, yavuze ko mu gihe hagaruka icyorezo cyangwa ikindi cyago cyakenera ingamba zikomeye nka Guma mu Rugo, icyemezo cyafatwa cyashingira ku kubanza kwita ku buzima bw’abantu.

Yagize ati “Amagara ntaguranwa amagana. Bisobanuye ko nta kintu wasimbuza ubuzima. Nta kintu gifite agaciro kurusha ubuzima. Ku bwanjye, navuga ko kurengera ubuzima ku kiguzi cyose, ntekereza ko buri gihe bitanga umusaruro cyane cyane ku gihugu nk’u Rwanda cyabuze ubuzima bw’abantu benshi mu bihe byashize.”

Uyu muyobozi kandi yashimangiye ko ibyakorwa byose byashingira ku isuzuma ryerekana uko ibintu bihagaze, ati “Ku bijyanye n’icyakora mu gihe haramuka habaye ikindi [cyorezo nka Covid-19]. Icyago gishobora guteganywa hanyuma isuzumwa ryacyo rigakorwa hakurikijwe uko ibintu bihagaze.”

Muri iyi nama, Umuyobozi ushinzwe Ubukungu muri Banki Nkuru y’u Rwanda, Dr. Kalisa Thierry, yavuze ko kimwe mu byo bigiye mu bihe bya Covid-19 ari ukongera umuvuduko mu kazi kabo, ku buryo nka raporo zakorwaga buri gihembwe na buri kwezi, zatangiye gukorwa buri cyumweru na buri munsi, kuko ziri ku byashingirwagaho mu gushyiraho ingamba zo guhashya Covid-19.

Umuyobozi Mukuru ushinzwe Ubucuruzi n’Ishoramari muri Minisiteri y’Ubucuruzi n’Inganda, Antoine Marie Kajangwe, yavuze ko Minicom yihutiye kugenzura ibiciro nyuma y’uko abacuruzi bamwe batangiye kubizamura mu buryo butanyuze mu mucyo.

Denis Mukama Ushinzwe Ubushakashatsi mu Kigo cy’Imisoro n’Amahoro, yavuze ko uburyo bw’ikoranabuhanga bwashoboje abaturage gukomeza kwishyura imisoro mu bihe bya Covid-19.

Mu gihe cya Covid-19, u Rwanda rwafashe ingamba zarufashije kwigobotora ingaruka z'iki cyorezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .