00:00:00 IGIHE NETWORK KN KINYARWANDA EN ENGLISH FR FRANCAIS

Igikomangoma Charles yagaragaje ko urugamba rwo guhashya malaria atari urwa bamwe

Yanditswe na IGIHE
Kuya 24 June 2022 saa 04:20
Yasuwe :

Igikomangoma cya Wales mu Bwami bw’u Bwongereza, Charles yagaragaje ko hari ubushakashatsi butandukanye bwagiye bwerekena ko ikibazo cy’ihindagurika ry’ibihe gishobora kuzatuma indwara ya malaria irushaho kwibasira benshi, ariko yemeza ko abatuye Isi nibatahiriza umugozi umwe bazayihashya nk’uko byagenze ku mbasa.

Ibi Charles uri mu ruzinduko mu Rwanda yabigarutseho ku wa Kane tariki 24 Kamena 2022 ubwo yari yitabiriye inama yiga kuri malaria n’izindi ndwara zikunze kwibasira ibice birimo Afurika ariko ibikorwa byo kuzirwanya ntibihabwe agaciro.

Iyi nama ibaye mu gihe malaria igifatwa nk’imwe mu ndwara zihangayikishije Abanyafurika kuko imibare y’Ishami ry’Umuryango w’Abibumbye ryita ku Buzima, igaragaza ko mu 2020 uyu mugabane wari wihariye 95% by’ubwandu bwa malaria miliyoni 241 bwabonetse muri uwo mwaka.

Ibi ni na ko byari bimeze no kubicwa n’iyi ndwara kuko OMS igaragaza ko ku Isi yose hapfuye abantu ibihumbi 627,abagera kuri 95% bakaba bari abo muri Afurika biganjemo abana bari munsi y’imyaka itanu.

Igikomangoma Charles yavuze ko nubwo Isi imaze gutera intambwe mu kurwanya malaria, hari impungenge ko ikibazo cy’imihindagurikire y’ibihe gishobora kongera gutiza umurindi iyi ndwara.

Ati “Imihindagurikire y’ibihe iri gutuma ibihe malaria yiyongeraho birusha kuba birebire mu bice bitandukanye by’Isi. Ubushakashatsi buheruka bwakozwe na ‘London School of Health and Tropical Medicine’ bwagaragaje ko mu gihe ubushyuhe bw’Isi bwakomeza kuzamuka ku kigero cya dogere 3,7, iki kinyejana kizajya kurangira abantu miliyari 4,7 baba mu duce tubashyira mu byago byo kwandura malaria n’izindwi ndwara zandura nkayo.”

Yakomeje avuga ko ibihugu bigize Commonwealth bikwiye gukorera hamwe kugira ngo Isi izagera ku ntego yo kurandura malaria bitarenze mu 2023.

Ati “Nkomeje gushyigikira umuhate dusangiye wo kurandura malaria bitarenze mu 2023. Ikindi dukwiye kumenya ni uko ibi byorezo bidahabwa agaciro byibasira Afurika na byo ari ikibazo gikomeye, usanga izi ndwara ari ikibazo mu bihugu 46 muri 54 bigize Commonwealth, ku bw’ibyo ugasanga ni umutwaro kuri kimwe cya gatatu cy’isi.”

Yavuze ko abatuye Isi nibahuriza hamwe imbaraga bazabasha guhashya malaria nk’uko byagenze ku mbasa zafatwaga nk’icyorezo gikomeye kuva mu 1987.

Mu Rwanda ihagaze ite?

Indwara ya malaria ni imwe mu zigeze guhangayikisha Abanyarwanda bikomeye kuko imibare yerekana ko abagannye amavuriro bagiye kuyivuza mu myaka yashize ari benshi kuko nko mu 2017 bageze hafi kuri miliyoni eshanu.

Ibyo biri mu byatumye Leta y’u Rwanda ifata ingamba zikomeye mu kuyihashya, zirimo guha abaturage inzitiramibu no kubashishikariza kuyiraramo, gutera umuti wica imibu mu nzu, kwica imibu bayisanze mu ndiri yayo, gukura ibihuru n’ibidendezi hafi y’ingo n’izindi zitandukanye.

Imibare y’Ikigo cy’Igihugu cy’Ubuzima, RBC, igaragaza ko izo ngamba zagiye zitanga umusaruro kuko abarwaye Malaria mu 2017 bavuye kuri 4.812.883 bagera kuri 3.609.323 mu 2019.

Nyuma y’umwaka umwe mu 2020 baragabanutse bagera ku 1.866.421 bisobanuye ko bagabanutseho 48% naho mu 2021 bagabanukaho 38% bagera ku 1.152.439.

Abarwaye Malaria y’igikatu na bo baragabanutse kuko mu 2017 abayirwaye ni 11.303 naho mu 2018 bagera ku 8293, mu 2019 bakomeje kugabanuka baba 6249.

Mu 2020 abayirwaye ni 3423 naho mu 2021 babaye 1915 mu gihe muri aya mezi atanu ya 2022 ashize abamaze kuyirwara ari 162.

Abahitanwa na malaria na bo bakomeje kugabanuka kuko mu 2017 yishe abantu 394, mu 2018 ihitana 336 na ho mu 2019 yica 218. Mu 2020 yishe 142, mu 2021 yica 69 naho muri aya mezi atanu ashize ya 2022 yishe abantu barindwi.

Imibare igaragaza ko mu 2021, Intara y’Amajyepfo ari yo yagize umubare munini w’abantu barwaye Malaria kuko barenga ibihumbi 481, igakurikirwa n’Uburasirazuba bwagize abasaga ibihumbi 296 naho Uburengerazuba bwagize abarenga ibihumbi 199, Umujyi wa Kigali bagera hafi ku bihumbi 88 naho Amajyaruguru agira abarenga ibihumbi 48.

Igikomangoma Charles yagaragaje ko urugamba rwo guhashya malaria atari urwa bamwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .