Abari abayobozi ba koperative MCM (Muhima Cooperative Motar) bayihombeje amafaranga asaga miliyoni eshatu n’ibihumbi Magana atanu harimo n’ayo abanyamuryango batangaga ngo bazagurizwe Moto ariko ntibyakorwa. Ubuyobozi bushya bwabahije kuziba icyo cyuho Moto ziraboneka.

Kuwa 17 Ukwakira 2014, nibwo iyi koperative ikorera mu karere ka Nyarugenge mu murenge wa Muhima yafashije abanyamuryango bayo 15 kugurizwa Moto zifite agaciro ka Miliyoni 18 n’ibihumbi Magana abiri na cumi, hakazishyurwa Miliyoni 22 n’ibihumbi magana inani na mirongo icyenda (22 890 000 Frw) mu gihe cy’umwaka umwe.

Tubanambazi Viateur umuyobozi mukuru wa “MCM” yavuze ko iki gikorwa kigezweho nyuma yo guhura n’ibibazo bitandukanye byatumye haba impinduka mu buyobozi bwa Koperative, biturutse ku mikorere idahwitse ya Komite Nyobozi. Icyo abanyamuryango bahurizaho ni ukuba nyuma yo kwizezwa (na Komite yahozeho) kugurizwa Moto amaso agahera mu kirere, ubu noneho abamotari barabyinira ku rukoma, kuko byose byashobotse.

Yagize ati “Tumaze amezi atandatu gusa dukora, twaraje duhera munsi ya zeru kuko rwose wabonaga ko koperative iri munsi y’umurongo w’ubukene. Komite twasimbuye yagiyeho mu mwaka wa 2013, yari iyobowe na Kayisire Innocent, yahombeje koperative amafaranga asaga miliyoni eshatu, harimo imisanzu y’abanyamuryango, hamwe n’ayo batangaga ngo bazagurizwe Moto .

Impinduka zabaye muri Gashyantare 2014 hakajyaho ubuyobozi bushya mpagarariye twahise dutangira urugamba rwo gukosora amakosa yakozwe n’abo twasimbuye, dutangira ibikorwa byo guteza imbere abanyamuryango nk’uko biri mu nshingano za Koperative.”

Mbarimombazi akomeza avuga ko igikorwa cyo kuguriza abamotari Moto bakigezeho ku bufatanye na Banki “Amasezerano” hamwe n’abashoramari.

Yagize ati “ Uwahawe Moto hashingiwe ku kuba yujuje imari shingiro y’umunyamuryango kandi atangirwa ubuhamya na bagenzi be mu nteko rusange, hamwe n’imyitwarire ye mu kazi, uwahawe Mota akazajya yishyura ibihumbi mirongo itatu buri cyumweru.”

Abanyamuryango ba MCM mu nama rusange

Mbarimombazi yavuze kandi ko bari mu nzira zo kwishyura igihombo cyose cyatejwe n’ubuyobozi bwari buriho , hamwe no kubakurikirana mu nkiko nk’uko byemejwe n’inteko rusange ya MCM.

Nizeyimana Kassim ni umwe mu banyamuryango ba MCM, avuga ko abona igenda ibagezaho iterambere. Yagize ati “ Nagiye njya muri koperative nyinshi ariko iyi ngiyi yo mbona irenze kabisa, yubaha abanyamuryango bayo. Iyi Moto mpawe izanteza imbere muri byinshi .”

Moto zahawe abanyamuryango ho inguzanyo

Hafashimana Jean Baptiste nawe ni umwe mu bahawe Moto . Yagize ati « Mu mibereho yajye nta bushobozi nari mfite ku buryo nabasha kwigurira Moto , nkaba nshimira koperative cyane kuko ubu nanjye ngiye kujya nkora nikorera nkanabasha kwiteza imbere. »

Uyu mu motari akaba yakomeje avuga ashishikariza bagenzi be gutanga umusanzu ku gihe kugirango koperative yabo ikomeze itere imbere.

[email protected]