Igihano cy’urupfu iyo kidakurwaho kiba gihabwa abatunda ibiyobyabwenge- Busingye asubiza abagororwa

Yanditswe na Evariste Nsengimana
Kuya 1 Ugushyingo 2019 saa 12:35
Yasuwe :
0 0

Minisitiri w’Ubutabera akaba n’Intumwa Nkuru ya Leta y’u Rwanda, Busingye Johnston, yavuze ko iyo igihano cy’urupfu kidakurwa mu mategeko ahana y’igihugu kiba gisigaye gihabwa abacuruza n’abatunda ibiyobyabwenge gusa kuko bigira ingaruka ku buzima bw’abantu benshi babikoresheje.

Minisitiri Busingye yabibwiye abagororwa 100 bayobora abandi muri Gereza ya Nyarugenge iherereye i Mageragere mu Karere ka Nyarugenge, ubwo yabasuraga kuri uyu wa 31 Ukwakira 2019.

Hari nyuma y’uko Nyirandegeya Mwamini, akaba na Perezida wa Njyanama y’Akagari ka Juru muri Gereza ya Nyarugenge, gacumbikiye abagore gusa asabye, Minisitiri Busingye ko bakorerwa ubuvugizi, ibihano byahawe abahamijwe gucuruza no gukoresheje ibiyobyabwenge bafunzwe bikagabanywa.

Yavuze ko hari umuntu ukatirwa imyaka myinshi yagera muri Gereza bikamunanira kwiyakira atekereje igihe azamaramo n’umuryango asize hanze udafite uwitaho.

Ati “Nasabaga nyakubahwa Minisitiri ariya mategeko ahana cyane cyane ibyaha by’ibiyobyabwenge, ko akakaye agatuma biheba…Mugerageze mwongere muduhe agaciro, murebe uburyo ki umuntu yakongera gusubira mu muryango, abana barandagaye kandi ibibazo biri kuvuka muri uko kwandagara ni byinshi kubera ibihano biremereye.”

Yakomeje agira ati “Nabasabaga ngo umuntu umaze imyaka itanu akatiwe muce inkoni zamba asubire mu muryango.’’

Nyuma yo gutanga igitekerezo cye bagenzi be bahise bamukomera amashyi menshi.

Minisitiri Busingye yavuze ko amategeko ahana abantu bacuruza, abatunda n’abakoresha ibiyobyabwenge aremereye koko ariko ko nabyo bigira ingaruka ku muryango Nyarwanda ku buryo bidakwiye kwihanganirwa.

Ati “Ibihano turagabanya iby’iki mwa bantu mwe? Muzi ko dusanga umuntu afite ibiro 200 by’ibiyobyabwenge! Bavuga ngo ikilo kimwe gishobora gutuma abana bari munsi y’imyaka 14 baba imbata y’ibiyobyabwenge? Iyo usanze umuntu afite ibilo 100 biba bivuga ko afite uburozi bw’abana 1000!”

Yakomeje avuga ko uretse ko u Rwanda rwakuye mu mategeko yarwo igihano cy’urupfu, ubundi abatunda n’abacuruza ibiyobyabwenge bari bakwiye kugihabwa kuko nabyo byica benshi babigejejeho.

Ati “None se uwo kuki atakwiye igihano cyo gupfa ko ari uko cyavuyeho gusa? Umuntu witeguye kwica abantu 2000 wowe uramureka ngo bigende gute? Iyo batamufata yajyaga kumara abantu 2000.”

Minisitiri Busingye yavuze ko ibihano ku bacuruza ibiyobyabwenge bikwiye gukazwa kuko nabyo byangiza benshi

Minisitiri Busingye yavuze ko azi neza ko ibihano amategeko agenera umuntu utunda, ucuruza n’ukoresha ibiyobyebwenge bikomeye ariko ‘Uwo muntu iyo batamufata yari kubicuruza bikica abarimo inshuti ze zanamuhaye amafaranga zibigura’.

Ati “Ubwo ibyo bihano ko bikakaye mbizi, impamvu bikakaye ntimuyumva? Ahubwo muganire n’abo muyobora, mubabwire ko ibi bihano, iyo cya kindi [Cy’urupfu] kiba kikibaho, cyavuyeho 2007, ubu cyajyaga kuba gisigaye kuri abo [Batunda n’abacuruza ibiyobyabwenge] gusa.”

Yagaragaje ko icyo cyaha gikomeye ndetse abantu bakwiye kwitandukanya nacyo, ‘Batagicikaho muri iki gihugu, ingaruka zacyo ni izo nyine. Ariya mategeko akakaye kugira ngo aturindire igihugu cyacu’.

Si icyaha cyo gutunda no gucuruza ibiyobyabwenge Minisitiri Busingye yavuze gihangayikishije kuko yanagarutse ku cy’abagabo n’abahungu basambanya abangavu, bakanabatera inda.

Ati “Nibo kiyobyabwenge cya kabiri nabo mwabonye ko amategeko yakakaye. Gufata ku ngufu, guhohotera umwangavu, kumutera inda byo birakomeye, kumwanduza indwara ni sakirirego. Rwose mureke ibihano byabyo tutazabigabanya.”

Yasobanuye ko umugore cyangwa umukobwa wakuyemo inda ashobora guhabwa amahirwe yo kongera kugaruka mu muryango Nyarwanda akisubiraho ariko ‘Uwo turwaye ni umugabo usambanya umwangavu’.

Ingingo ya 263 y’igitabo cy’amategeko ahana y’u Rwanda ivuga ko ‘Umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha’.

Iyo abihamijwe n’urukiko ahanishwa (1) igifungo cya burundu n’ihazabu y’amafaranga arenze miliyoni 20 Frw ariko atarenze miliyoni 30 Frw ku byerekeye ibiyobyabwenge bihambaye; (2) igifungo kitari munsi y’imyaka 20 ariko kitarenze imyaka 25 n’ihazabu y’amafaranga atari munsi ya miliyoni 15 Frw ariko atarenze mililiyoni 20Frw ku byerekeye ibiyobyabwenge bikomeye cyangwa (3) igifungo kitari munsi y’imyaka irindwi ariko kitarenze imyaka 10 n’ihazabu y’amafaranga atari munsi ya miliyoni 5 Frw ariko atageze kuri miliyoni 10Frw ku byerekeye ibiyobyabwenge byoroheje.

Iyo ibikorwa bivugwa mu gika cya kabiri n’icya gatatu by’iyi ngingo bikorewe ku mwana cyangwa bikozwe ku rwego mpuzamahanga, igihano kiba igifungo cya burundu n’ihazabu y’amafaranga y’u Rwanda atari munsi ya miliyoni 30 Frw ariko atarenze miliyoni 50 Frw.

Bamwe mu bayobora abagororwa muri Gereza ya Nyarugenge iherereye i Mageragere mu Karere ka Nyarugenge ubwo baganiraga na Minisitiri w'Ubutabera, Busingye Johnston

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza