Icyo iyandikwa rya MTN Rwanda ku Isoko ry’Imari n’Imigabane risobanuye ku banyamigabane ba Crystal Telecom

Yanditswe na Ndahayo Emmanuel
Kuya 23 Ukuboza 2020 saa 12:00
Yasuwe :
0 0

Ikigo Crystal Telecom (CTL) cyatangaje ko kigiye kugurisha imigabane ingana na 20% cyari gifite mu kigo cy’itumanaho cya MTN Rwanda, bikazakorwa nyuma y’uko MTN Rwanda yanditswe ku Isoko ry’Imari n’Imigabane, igikorwa cyitezweho kuzashyirwa mu bikorwa mu ntangiriro z’umwaka wa 2021.

Mu itangazo ry’ibyemezo by’Inama y’Ubutegetsi ya CTL, rivuga ko abanyamigabane ba CTL bazaguranirwa, bagahabwa imigabane muri MTN Rwanda.

Umugabane uzaguranwa uwundi, bivuze ko umuntu wari ufite umugabane umwe muri CTL azajya aguranirwa, agahabwa umugabane umwe muri MTN Rwanda. Ubuyobozi bwa CTL kandi buvuga ko iri gurana rinyuze mu mucyo, ndetse bikaba byaremejwe n’ikigo gitanga ubujyanama mu by’imari cya Faida Securities Rwanda Ltd.

Bagize bati “Inama y’Ubutegetsi yakoranye na Faida Securities Rwanda Ltd, ikigo gitanga ubujyanama mu by’imari, cyagaragaje ko iri gurana ry’imigabane ndetse no [gutuma abanyamigabane ba CTL] batunga imigabane yabo bwite muri MTN Rwanda nk’uko byasabwe n’Inama y’Ubutegetsi, binyuze mu mucyo kandi bikwiye”.

Iri guranwa rizemezwa nyuma y’Inama Rusange Idasanzwe y’Abanyamigabane muri CTL, igomba kuritorera ku kigero kiri hejuru ya 75%.

Nyuma y’iri guranwa, abahoze ari abanyamigabane ba CTL, kuri ubu bazaba bamaze kuba abanyamigabane ba MTN Rwanda, bazaba bemerewe kugurisha imigabane yabo uko babishaka nk’uko bisanzwe bigenda ku Isoko ry’imari n’Imigabane.

Inama y’Ubutegetsi kandi yasabye ko nyuma y’iri gurana, ikigo CTL kiziyandukuza ku Isoko ry’Imari n’Imigabane, kuko intego cyari gisanzwe gifite ari ugutuma abanyamigabane bacyo bagira imigabane muri MTN Rwanda mu buryo buziguye, gusa nyuma yo kuyibaguranira, inshingano zacyo zizaba zirangiye kuko abanyamigabane bayo bazaba bitungiye imigabane muri MTN Rwanda mu buryo butaziguye.

Inama y’Ubutegetsi kandi irateganya kwandukuza ikigo cya CTL mu bigo by’ubucuruzi ndetse kigafunga, ibi byose bikazemezwa na 75% by’abanyamigabane ba CTL mu Nama Rusange Idasanzwe izaterana mu minsi iri imbere.

Byitezweho ko iri gurana rizungura cyane abanyamigabane bashya mu Kigo MTN Rwanda, kuko gisanzwe ari ikigo gifite inyungu iri hejuru kandi cyihariye isoko ry’u Rwanda mu bucuruzi bw’itumanaho, internet ndetse n’ihererekanya-mafaranga (Mobile Money).

Nko mu mwaka ushize, iki kigo cyungutse miliyari 6.8Frw nyuma y’umusoro, inyungu iri hejuru cyane kandi yitezweho kuzamuka bitewe n’uburyo n’ubundi ubukungu bw’igihugu buhagaze neza ndetse n’uburyo ikoreshwa rya serivise zirimo itumanaho, internet n’ihererekanya-mafaranga riri kuzamuka ku muvuduko ushimishije mu gihugu.

Nko mu kwezi gushize, Iki kigo cyageze mu Rwanda mu 1998, cyatanze serivisi z’itumanaho ku bantu barenga miliyoni 6,5, barimo miliyoni 3,2 bakoresheje serivisi z’ihererekanya-mafaranga (Mobile Money) ndetse n’abandi miliyoni 1,6 bakoresheje serivisi za internet.

Imigabane ingana na 20% by'iya MTN Rwanda igiye kwandikwa ku Isoko ry'Imigabane ry'u Rwanda (RSE)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .