00:00:00 IGIHE NETWORK KN KINYARWANDA EN ENGLISH FR FRANCAIS

Icy’umutwe … imfura za 12BYE zirangije amashuri yisumbuye

Yanditswe na

Deus Ntakirutimana

Kuya 28 Ukwakira 2014 saa 04:01
Yasuwe :

Abanyeshuri basaga ibihumbi 46 basoza amashuri yisumbuye bagiye gutangira ibizamini bya leta; muri bo harimo imfura muri gahunda y’uburezi bw’ibanze bw’imyaka 12.
Muri gahunda z’ikinyagihumbi (MDGs), u Rwanda rwiyemeje guharanira uburezi budaheza, intego rwashimiwe ubwo harebwaga aho ibihugu bigeze bishyira mu bikorwa iyi ntego.
Mu mibare igaragazwa na Minisiteri y’Uburezi, abanyeshuri 46,236 biyandikishije gukora iki kizamini, biyongeraho 15,183 bingana na 49%, ugereranyije n’umwaka ushize (...)

Abanyeshuri basaga ibihumbi 46 basoza amashuri yisumbuye bagiye gutangira ibizamini bya leta; muri bo harimo imfura muri gahunda y’uburezi bw’ibanze bw’imyaka 12.

Muri gahunda z’ikinyagihumbi (MDGs), u Rwanda rwiyemeje guharanira uburezi budaheza, intego rwashimiwe ubwo harebwaga aho ibihugu bigeze bishyira mu bikorwa iyi ntego.

Mu mibare igaragazwa na Minisiteri y’Uburezi, abanyeshuri 46,236 biyandikishije gukora iki kizamini, biyongeraho 15,183 bingana na 49%, ugereranyije n’umwaka ushize aho bari 31,106.

Iyi gahunda yashyizwe mu bikorwa bitewe n’ibyo Perezida Paul Kagame yari yemereye Abanyarwanda ubwo yiyamamazaga mu mwaka wa 2010 ku mwanya w’Umukuru w’Igihugu nk’umukandida wa FPR Inkotanyi. Iyi gahunda kandi yari ije yunganira indi yari yaratangijwe ndetse igashyirwa mu bikorwa, yemereraga abanyeshuri biga mu cyiciro rusange kwigira ubuntu.

Mu mwaka wa 2008 hatangijwe gahunda y’uburezi bw’ibanze bw’imyaka icyenda, yakurikiwe n’iy’imyaka 12. Kimwe mu byari bigamijwe ni ugushyigikira gahunda yo kugeza uburezi budaheza kuri bose, nta wuvuye mu ishuri kubera ibibazo bitandukanye birimo ubukene. Icyo gihe umubare w’abigaga amashuri yisumbuye warazamutse kubera ko abana babashije kwiga bataha iwabo ndetse byoroheye n’ababyeyi ku bibazo by’amikoro.

Bamwe mu bayeshuri mu Murenge wa Muyumbu mu Karere ka Rwamagana/ Foto: Thebasic

Mu Karere ka Nyabihu, abanyeshuri 13.371 bigira ubuntu babikesha uburezi bw’ibanze bw’imyaka 12 mu mashuri 31 muri 44 abarizwa muri aka karere.

Ubwo hatahwaga ibyumba by’amashuri yahariwe ubu burezi mu Karere ka Kamonyi, umuyobozi wako Rutsinga Jacques yavuze ko aya mashuri y’uburezi bw’ibanze bw’imyaka 12 yabaye umusingi w’iterambere, kuko byatumye abana badakomeza kwandagara hirya no hino kubera kubura uko bakomeza amashuri yabo igihe babaga barangije umwaka wa 6.

Mu bijyanye n’imitsindire, mu Karere ka Muhanga hari abanyeshuri bo mu bigo by’amashuri y’uburezi bw’ibanze bw’imyaka icyenda (9YBE) batsinze ibizamini bisoza icyiciro rusange ku kigereranyo cya 100%.

Mu kiganiro IGIHE yagiranye na Hakizimana Valerien ushinzwe uburezi muri aka karere yavuze ko aba banyeshuri n’ubundi bakunze kwigaragaza mu gutsinda ; ngo bizeye ko bazatsinda kuko bakora ibizamini byo kwimenyereza kandi bigishwa n’abarimu basanzwe bafite inararibonye.

Mu bindi yavuze ko iyi gahunda yashyize igorora abanyeshuri n’ababyeyi kuko bigiye hafi y’iwabo n’ababyeyi boroherwa n’ibibazo birimo amafaranga bashoboraga gukoresha bagiye kubasura cyangwa kubategera ngo bajye kwiga.

Yagize ati «Byakemuye ibibazo byinshi, bose byaraborohereje, binongera n’umubare munini w’abimukira mu mashuri yisumbuye no mu cyiciro cya kabiri cyayo.»

Muri aka karere, abanyeshuri bose hamwe bazitabira ikizamini ni 2.684 barimo abahungu 1261 n’abakobwa 1423.

Mu biga muri 12YBE muri aka Aarere ka Muhanga bagiye gukora ikizamini gisoza ayisumbye bagizwe n’abakobwa 313 n’abahungu 394 mu gihe bose hamwe ari 707 bivuze ko bagize icya kabiri cy’abakora ibi bizamini muri aka karere.

Mu ntangiriro za 2014, Minisiteri y’Uburezi yemeje ko amashuri y’uburezi bw’ibanze bw’imyaka 9 atsinda neza.

Iyi Minisiteri yanyomozaga bamwe mu basebyaga iyi gahunda ko itanga ubumenyi buri hasi, budafite ireme.

Uwari Minisitiri w’Uburezi, Dr. Vicent Biruta, ubwo yari mu muhango wo gushyira ahagaragara amanota y’abanyeshuri bakoze ibizamini bisoza amashuri abanza n’icyiciro rusange, yabwiye abanyamakuru ko iby’abishyizemo ko abanyeshuri bo mu mashuri yo mu burezi bw’ibanze bw’imyaka 12 bahabwa ubumenyi buke, ko atari byo.

Dr Biruta yavuze ko iyo usesenguye abana bava muri ibi bigo bateye nk’abandi kuko nabo batsinda, ahubwo icyo bashingiraho ngo ni uko wenda ababyeyi babigereranya n’ibindi bigo abana biga babamo, ariko usibye imyumvire, ngo nta wari wabitondeka ngo amenye ko ibi bigo ari byo bitanga umusaruro muke, Minisiteri y’uburezi ikaba ari byo ishingiraho.

Minisitiri Biruta avuga ko mu mwaka ushize basanze abana barenga 70% mu bigo by’amashuri y’uburezi bw’imyaka 12 batsinze neza. Yongeyeho ko atabuze kuvuga ko iyo bamaze gushyira aya manota ahagaragara hakurikiraho kureba abatsinzwe, impamvu yabiteye, no gushaka umuti w’ibyo bibazo.

Uru rutonde rugaragaza amwe mu mashuri y’Uburezi bw’ibanze bw’imyaka 9 yatsinze ku kigereranyo kigera ku 100% na 98%.

Mu Ntara y’Iburasirazuba amashuri agera kuri 19 yatsinze ku kigero cyo hejuru, muri aya mashuri, 10 muri yo yatsinze 100% harimo 7 yo mu Karere ka Nyagatare.

Mu Ntara y’Amajyepfo amashuri 16 nayo yatsinze neza harimo 10 muri yo yatsinze 100% (Ibi bivuze ko abanyeshuri bigaga ku kigo iki n’iki cyatsindishije abanyeshuri bose).

Uru rutonde kandi rugaragaza ko mu Ntara y’Iburengerazuba ibigo 14 nabyo byatsinze neza; muri byo 2 byatsinze 100%; naho mu Ntara y’Amajyaruguru ibigo 10 byatsinze neza harimo 8 byatsinze 100% naho mu Mujyi wa Kigali amashuri 6 yatsinze neza harimo ishuri rimwe ryatsindishije 100%.

Ibi bizamini bizatangira kuwa Gatatu tariki ya 30 Ukwakira 2014.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .