Ibyo wamenya ku mushinga washowemo miliyari 32 Frw uzafasha gukumira ubutayu ku Mayaga

Yanditswe na Prudence Kwizera
Kuya 22 Ukwakira 2020 saa 07:00
Yasuwe :
0 0

Ikigo cy’Igihugu gishinzwe kubungabunga Ibidukikije, REMA, cyatangije umushinga wo gutera amashyamba no kubungabunga urusobe rw’ibinyabuzima mu gice cy’Amayaga, hagamijwe gukumira ko kiba ubutayu kuko inyigo yerekanye ko hakwiye kugira ikihakorwa byihuse.

Uwo mushinga w’imyaka itandatu watangijwe mu 2020 uzakorera mu gice cy’Amayaga mu turere twa Kamonyi, Ruhango, Nyanza na Gisagara two mu Ntara y’Amajyepfo.

Kuri ubu hasojwe igice cya mbere cy’umushinga kigizwe no gutubura ingemwe z’ibiti bizaterwa birimo ibivangwa n’imyaka, iby’imbuto ndetse n’iby’amashyamba. Haciwe n’imirwanyasuri, hagiye gukurikiraho gutera ibyo biti.

Hazasubiranwa amashyamba ku buso bwa hegitari ibihumbi 263; haterwe ibiti bivangwa n’imyaka n’iby’imbuto kuri hegitari ibihumbi 25 ndetse haterwe n’amashyamba mashya ku buso bwa hegitari igihumbi.

Imirima y’abaturage yose izaterwaho ibiti bivangwa n’imyaka izanacukurwaho imirwanyasuri kandi bigishwe kuyisibura barinda ko yajyamo itaka.

Bazatera n’ibiti ku mihanda ndetse no ku nkengero z’imigezi kandi abaturage bazahabwa ibiti by’imbuto mu rwego rwo kurwanya imirire mibi.

Umuhuzabikorwa w’uwo mushinga mu gice cy’Amayaga cy’uturere twa Kamonyi na Ruhango, Songa Remy, yavuze ko babonye muri icyo gice hashobora kuzaba ubutayu, bafata umwanzuro wo kubukumira.

Ati “Uko iminsi yagiye ishira abantu bagiye batema amashyamba ibiti bigera aho bishize muri iki gice cy’Amayaga, noneho umushinga ugiye kwiga kuri icyo kibazo usanga mu Mayaga hashobora kuzaba ubutayu ndetse n’imvura yagwa igateza isuri.”

Mu Karere ka Kamonyi mu cyiciro cya mbere cy’uwo mushinga mu 2020/21 hazaterwa ibiti bivangwa n’imyaka ku buso bwa hegitari 336 z’ubutaha buhingwa kandi hacukurwe n’imirwanyasuri. Hazaterwa kandi ibiti by’ishyamba birimo inturusu na gereveriya ku buso bungana na hegitali 129.

Mu Karere ka Ruhango hazaterwa ibiti bivangwa n’imyaka mu mirima ihingwa ku buso bwa hegitari 1250 hacukurwe n’imirwanyasuri, ndetse haterwe n’ishyamba kur hegitali 129. Hazaterwa kandi imigano ku nkengero z’imigezi kuri kilometero 19.

Bamwe mu baturage batuye mu bice umushinga uzakoreramo bavuga ko bawitezeho kubakemurira ikibazo cy’ubutaka bwakayutse ndetse no gukumira isuri ikomeje kwangiza imyaka bahinga.

Uwariraye Marie Grace wo mu Murenge wa Mugina ati “Ibiti tugiye gutera bizadufasha gufata ubutaka no kurwanya isuri kuko hano iyo twabuze imvura ntiduhinga ngo tweze kandi n’iyo iguye ari inyinsi iduteza isuri nabwo imyaka ikagenda bikaba ibibazo.”

Gasangwa Gaspard we avuga ko umushinga bazaniwe bawitezeho kubakiza ubutayu kuko ibiti byahabaga kera babitemye bigashira.

Ati “Uyu mushinga rwose twarawishimiye cyane kuko ibiti bigiye kwiyongera ubutayu bugabanyuke, noneho na ya suri yaduteraga iragabanyuka kandi hano dukeneye ibiti by’amoko yose.”

Ibiti bigiye guterwa birimo inturusu, gereveriya, avoka, imyembe na pinusi. Gusa ngo uko umushinga uzakomeza gushyirwa mu bikorwa hazongerwamo ibindi.

Niyibizi Emmanuel wita ku ngemwe z’ibyo biti mu Karere ka Kamonyi, avuga ko uwo mushinga wabahaye akazi babasha kwikenura kandi nibimara gukura abazabikuraho imbuto zo kurya no kugurisha ndetse bazabona n’imbaho hamwe n’inkwi zo gucana.

Muri uwo mushinga wa REMA uterwa inkunga na UNDP ku bufatanye na Global Environment Facility (GEF) hazatangwa imbabura zirondereza ibicanwa ku miryango ibihumbi 60 hatangwe n’amatungo magufi ku miryango 7500.

Bitaganyijwe kandi ko muri rusange umushinga wose uzagera ku baturage miliyoni imwe n’ibihumbi 300, naho abantu bagera ku bihumbi 150 biganjemo urubyiruko n’abagore bafashwe guhanga imirimo.

Abaturage batuye mu gice cy'Amayaga bishimira ko batangiye guhabwa akazi muri uwo mushinga
Imirima y’abaturage yose izaterwaho ibiti bivangwa n’imyaka izanacukurwaho imirwanyasuri kandi bigishwe kuyisibura barinda ko yajyamo itaka
Mu biti bizaterwa hazibandwa ku by'imbuto n'ibivangwa n'imyaka
Ibiti bigiye guterwa birimo inturusu, gereveriya, avoka, imyembe na pinusi
Igice cya mbere cy'umushinga kigizwe no gutubura ibiti kiri kurangira
Umuhuzabikorwa w’uwo mushinga mu gice cy’Amayaga cy’uturere twa Kamonyi na Ruhango, Songa Remy, avuga ko babonye muri icyo gice hashobora kuzaba ubutayu, bafata umwanzuro wo kubukumira

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .